މައްކާ، ސައުދީ އަރަބިއްޔާ (ފެބްރުއަރީ 10) - ސައުދީ ޕްރޮފެޝަނަލް ލީގުގައި މިރޭ އަލް-ވަހްދާ ކޮޅަށް ކްރިސްޓިއާނޯ ރޮނާލްޑޯ ޖެހި ހަތަރު ގޯލުން އަލް ނަސްރު 4-0 އިން މޮޅުވިއިރު، ރޮނާލްޑޯ ކެރިއަރުގައި 500 ލީގު ގޯލު ހަމަކޮށްފި އެވެ.
މިދިޔަ އާދިއްތަ ދުވަހު، 38 ވަނަ އުފަން ދުވަސް ފާހަގަކުރި ރޮނާލްޑޯ، ރޭގެ މެޗުގައި ޖެހި ހަތަރު ގޯލު ޖެހިއިރު، ސީނިއާ ކެރިއަރުގައި އޭނާ ކުޅުނު ލީގު މެޗުތަކުގައި ޖުމްލަ އެކު ވަނީ 503 ލީގު ގޯލު ޖަހައިފަ އެވެ. އެއީ ތަފާތު ފަސް ގައުމެއްގެ ފަސް ލީގުގަ އެވެ. އެންމެ ފުރަތަމަ ޕޯޗުގީސް ލީގާގައި ސްޕޯޓިން ލިޒްބަން އަށް ތިން ގޯލާއި ސްޕެނިޝް ލީގުގައި ރެއާލް މެޑްރިޑަށް 311 ގޯލާއި އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑަށް 103 ގޯލާއި އިޓާލިއަން ލީގުގައި ޔުވެންޓަސް އަށް 81 ގޯލުގެ އިތުރުން ސައުދީ ޕްރޮފެޝަނަލް ލީގުގައި އަލް ނަސްރަށް ފަސް ގޯލެވެ.
އަލް ވަހްދާ ކޮޅަށް ގޯލު ޖެހުމަށް ފަހު ރޮނާލްޑޯ އުފާފާޅުކުރަނީ: ސައުދީ ޕްރޯ ލީގުގައި ރޮނާލްޑޯ ވަނީ ހަތަރު މެޗުން ފަސް ގޯލު ޖަހާފައި.
މީގެ އެއް މަސް ކުރިން ދުނިޔާގެ އެންމެ މުސާރަ ބޮޑު ފުޓްބޯޅަ ކުޅުންތެރިޔާގެ ގޮތުގައި އަލް ނަސްރަށް ބަދަލުވުމަށް ފަހު ރޮނާލްޑޯ އަށް ފުރަތަމަ އުނދަގޫތަކެއް ކުރިމަތިވި ނަމަވެސް އޭނާ އަންނަނީ އެ މާހައުލަށް ހޭނި މެޗަކަށް ފަހު މެޗެއް ކުޅުން ރަނގަޅުކުރަމުންނެވެ.
މެޗުގެ 21 ވަނަ މިނިޓްގައި އޭރިއާތެރެއިން ރޮނާލްޑޯ އަށް ލިބުނު ފުރުސަތުން އޭނާ ވަނީ ތިރިތިރިން ގޯލުގެ ދުރު ކަނަށް ފޮނުވާލައިފަ އެވެ. ފުރަތަަމަ ހާފު ނިމުމުގެ ތެރެއިން އަލް ވަހްދާ އޭރިއާތެެރެއިން ލިބުނު ބޯޅަ ރޮނާލްޑޯ ވަނީ ގޯލުގެ ކައިރީ ކަނަށް ވައްދާލައިފަ އެވެ. ދެ ވަނަ ހާފުގެ ކުޅުން ފެށިގެން އަށް މިނިޓް ތެރޭ ރޮނާލްޑޯ ވަނީ ހެޓްރިކް ފުރިހަމަކޮށްފަ އެވެ. މިއީ ޕެނަލްޓީ އަކުން ޖެހި ގޯލެކެވެ. މިއީ އަލް ނަސްރަށް ބަދަލުވި ފަހުން ރޮނާލްޑޯގެ ދެ ވަނަ ޕެނަލްޓީ އެވެ.
އަލް-ވަހްދާގެ ޑިފެންސްގެ އޮފްސައިޑް މަޅިން ސަލާމަތްވެ، ރޮނާލްޑޯ ވަނީ މެޗުގެ 61 ވަނަ މިނިޓްގައި އޭނާގެ ހަތަރު ވަނަ ގޯލު ޖަހައިފަ އެވެ.
މި ނަތީޖާއާ އެކު، އަލް ނަސްރު ސައުދީ ޕްރޯ ލީގުގެ އެއް ވަނައިގައި އޮތީ ދެ ވަނައިގައި އޮތް އަލް ޝަބާބާ އެއްވަރަށް 37 ޕޮއިންޓް ހޯދައިގެންނެވެ. ސޯޅަ ޓީމު ކުޅޭ މި ލީގުގެ އެއް ވަނައިގައި އަލް ނަސްރު އޮތީ 16 މެޗު ކުޅެގެންނެވެ. އަލް ޝަބާބް ވަނީ 17 މެޗު ކުޅެފަ އެވެ.
