ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި ރޭ ހއ. ވަށަވަރާއި ދިއްދޫން މުބާރާތުގައި ކުޅުނު ދެ ވަނަ މެޗުން މޮޅުވެ، އަތޮޅު ބުރުގެ ނޮކައުޓަށް ދަތުރުކުރިއިރު، ހދ. ވައިކަރަދޫން ފުރަތަމަ މެޗުގައި ހދ. ނެއްލައިދޫ އަތުން 2-1 އިން މޮޅުވެއްޖެ އެވެ.
ވަށަފަރުން ރޭ ވަނީ ހޯރަފުށި އަތުން 2-1 އިން މޮޅުވެފަ އެވެ. ދިއްދޫ އިން ވަނީ ފަހަތުން އަރައި، ފިއްލަދޫގެ މައްޗަށް 2-1 އިން ކުރިހޯދައިފަ އެވެ. ހއ. ތިން ގްރޫޕް އޮންނައިރު، ކޮންމެ ގްރޫޕަކުން ގަދަ ތިން ޓީމު ނޮކައުޓަށް ކޮލިފައިވާއިރު، ދިއްދޫ އާއި ވަށަފަރު މި ވަނީ ދެ މޮޅު ހޯދައި، އަނެއް ބުރަށް ދަތުރުކޮށްފަ އެވެ.
ހއ. ގެ ގްރޫޕް އެކެެއްގައި ރޭ މާރަންދޫ އަތުން ތުރާކުނު ވަނީ 3-2 އިން މޮޅުވެފަ އެވެ. މި ގްރޫޕްގައި ބާރަށާއި ކެލާ ބައްދަލުކުރި މެޗު ވަނީ 1-1 އިން އެއްވަރުވެފަ އެެވެ. މި ގްރޫޕުން ކެލާ އާއި ބާރަށް ވެސް ވަނީ އަނެއް ބުރަށް ގޮސްފަ އެވެ. ހއ. ގެ ދެ ވަނަ ގްރޫޕްގައި ރޭ އުތީމުން ވަނީ 2-1 އިން އިހަވަންދޫ ބަލިކޮށްފަ އެވެ. މި ގްރޫޕްގެ އަނެއް މެޗުން ހޯރަފުށި އަތުން ވަށަފަރު ވަނީ މޮޅުވެފަ އެވެ. ވަށަފަރާއި އުތީމަށް ވަނީ ދެ ވަނަ ބުރުން ފުރުސަތު ލިބިފަ އެވެ. އަނެއް ޖާގަ އަށް ވާދަކުރަނީ އިހަވަންދޫ އާއި ހޯރަފުށި އެވެ.
ހއ.ގެ ތިން ވަނަ ގްރޫޕްގައި ދިއްދޫ އިން ފިއްލަދޫ ބަލިކުރިއިރު، ތަކަންދޫ އަތުން މުރައިދޫ ވަނީ 2-1 އިން މޮޅުވެފަ އެވެ.
ވައިކަރަދޫ ޓީމުގެ އަގީލް (ވ) ރޭގެ މެޗުގެ ތެރެއިން ގޯލަށް ބޯޅައެއް ފޮނުވާލަނީ---- ފޮޓޯ: މުހައްމަދު ޝާބިން/ އަދަދު
ރޭ ކުޅުނު ހދ. ގެ ގްރޫޕް ދޭއްގެ މެޗުން ނެއްލައިދޫ އަތުން ވައިކަރަދޫ މޮޅުވެ، ފެށުން ރަނގަޅުކުރިއިރު، ފިނޭ އިން ވަނީ 2-1 އިން މަކުނުދޫ ބަލިކޮށް ފުރަތަމަ މޮޅު ހޯދައިފަ އެވެ. ފިނޭ ވަނީ ފުރަތަމަ މެޗުން ކުމުންދޫ އަތުން ބަލިވެފަ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި ވައިކަަރަދޫގެ ދެ ގޯލު ވެސް ޖެހީ މެޗުގެ މޮޅު ކުޅުންތެރިޔާ އިބްރާހިމް އަގީލް އެވެ. އަގީލް ފުރަތަމަ ލަނޑު ޖެހީ އޭރިއާބޭރުން ގޯލުގެ ތިރީ ކަަނަށް ބޯޅަ އަމާޒުކޮށްލައިގެންނެވެ. ދެ ވަނަ ލަނޑު ޖެހީ ދެ ވަނަ ހާފުގައި ފަސް ފައުލު ހަމަވެގެން ލިބުނު ދުރު ޕެނަލްޓީ އަކުންނެވެ. ނެއްލައިދޫގެ ހަމައެކަނި ގޯލު ޖެހީ މުހައްމަދު ސާވިން އެވެ.
ފިނޭގެ ގޯލުތައް ރޭ ޖެހީ އަހުމަދު އަފްރާހު އެވެ. މަކުނުދޫގެ ހަމައެކަނި ގޯލު ޖެހީ ޝައިހާން އަހުމަދު އެވެ.
ފޯރިގަދަ މެޗެއް ފެނުނުއިރު، ވަށަފަރުން ހޯރަފުށި ކައިރިން ލީޑުނެގީ ސާޖިދު ރަޝީދު ޖެހި ޕެނަލްޓީންނެެވެ. މިއީ އޭރިއާތެރެއިން ހޯރަފުށި ކުޅުންތެރިއަކު އަތުގައި ބޯޅަ ޖެހުމުން ދިން ޕެނަލްޓީ އަކުން ސާޖިދު ޖެހި ގޯލެކެވެ. ހޯރަފުށްޓަށް އެއްވަރުކޮށްދިނީ އަލީ ޒިޔާދު މުހައްމަދު އެވެ. ހޯރަފުށީގެ ކީޕަރު ހަސަން އަލީފް ހެދި ގޯހެއްގެ ފައިދާނަގައި ވަށަފަރު މޮޅުކޮށްދިން ގޯލު ޖެހީ އަބްދުﷲ ސިނާން އެވެ. އެ ގްރޫޕްގައި ރޭ އިހަވަންދޫ ދެ ވަނަ މެޗުން ވެސް ބަލިވިއިރު، އެ ޓީމު ކޮޅަށް ރޭ އުތީމުން ގޯލުތައް ޖެހީ މުހައްމަދު މަޒީން، ރިޝްވާން އިބްރާހިމް ރަޝީދު މޫސާ އަދި އަލީ އިލްހާމް އެވެ. މި ތިން ގޯލު ވެސް ޖެހީ އޭރިއާބޭރުން ފޮނުވާލި ހަމަލާތަކުންނެވެ.
ވަށަފަރު ޓީމުގެ ސާޖިދު (ކ) ރޭގެ މެޗުގެ ތެރެއިން ހޯރަފުށީގެ ޝިމާހު ކައިރިން ބޯޅަ ފޮނުވާލަނީ.--- ފޮޓޯ: މުހައްމަދު ޝާބިން/ އަދަދު
ހއ. ގެ ގްރޫޕް އެކެއްގައި މާރަންދޫ ކޮޅަށް ތުރާކުނުގެ ގޯލުތައް ޖެހީ އަހުމަދު ސިރާޖު ދެ ގޯލާއި އަހުމަދު ހުޝާމް އެވެ. މާރަންދޫގެ ލަނޑުތައް ޖެހީ އަހުމަދު މުހައްމަދާއި ހުމައިދު ހުސެއިން އެވެ. އެ ގްރޫޕްގެ އަނެއް މެޗުގައި ކެލާގެ އަލީ އިމާދު ގޯލުޖެހިއިރު، ބާރަށް ލަނޑު ޖަހައިދިނީ އަބްދުﷲ މިސްބާހު އެވެ.
ހއ.ގެ ގްރޫޕް ތިނެއްގައި ފިއްލަދޫން ވަނީ އާދަމް އަބްދުލް ރަހީމްގެ ހިލޭ ޖެހުމުން ލީޑުނަގައިފަ އެވެ. ދިއްދޫން ދެ ވަނަ ހާފުގައި ނަތީޖާ އަނބުރާލީ ތައުމީން ނޫހު އޭރިއާތެރެއިން ރީބައުންސް ބޯޅައަކުން ޖެހި ގޯލުންނާއި އޭރިއާބޭރުން ދިއްދޫގެ ކެޕްޓަން، ހައިޝަމް ރަޝީދު (ހައި) ޖެހި ގޯލުންނެވެ. މި ގްރޫޕްގައި މުރައިދޫގެ ގޯލުތައް ޖަހައިދިނީ އިޔާން އަހުމަދު ރަޝީދު އާއި އަހުމަދު ނައުފަލް އެވެ. ތަކަންދޫގެ ހަމައެކަނި ގޯލު ޖެހީ ހަމްދާން އަހުމަދު ސަލީމް އެވެ.
މުބާރާތުގައި މިރޭ ވެސް އަށް މެޗު ކުޅޭނެ އެވެ.
8:00
ކ. ތުލުސްދޫ - ކ. ގާފަރު
ތ. ގާދިއްފުށި - ތ. ވޭމަންޑޫ
9:00
ކ. ގުރައިދޫ - ކ. ދިއްފުށި
ތ. އޮމަދޫ - ތ. ހިރިލަންދޫ
10:00
ށ. ފީވަށް - ށ. ޅައިމަގު
އއ. ރަސްދޫ - އއ. ފެރިދޫ
11:00
ރ. އިނގުރައިދޫ - ރ. އިންނަމާދޫ
އއ. ތޮއްޑޫ - އއ. މަތިވެރި
