ހިޔާ ޓަވަރުތަކުގައި ދިރިއުޅޭ އަންހެނުންނަށް ހާއްސަކޮށް އަލިފާނުގެ ހާދިސާއަކުން ސަލަމަތްވާނެ ގޮތުގެ ތަމުރީން ޕްރޮގުރާމެއް ހިންގައިފި އެވެ.
ހިޔާ ޕާކު ސަރަހައްދުގައި މިދިޔަ ހޮނިހިރު ދުވަހު އެ ޕްރޮގުރާމު ކުރިއަށް ގެންގޮސްފައި ވަނީ ވިލާ މާޓާއި ހުޅުމާލެ ކޮމިއުނިޓީ އެލަޔަންސް އަދި އެމްއެންޑީއެފް ގުޅިގެންނެވެ.
އެފަދަ ޕްރޮގުރާމެއް އަންހެނުންނަށް ހާއްސަކޮށް ކުރިއަށް ގެންގޮސްފައި ވަނީ އެ ސަރަހައްދުގައި މިފަހަކަށް އައިސް އަލިފާނުގެ ހާދިސާތައް އާންމުވެފައި ވާތީ ކަމަށް ވިލާ މާޓުން ބުނެ އެވެ.
"އަލިފާނުގެ ހާދިސާއެއް ހިނގުމަށް މެދުވެރި ވާނެ އެއްޗެހި ދެނެގަނެ، އެފަދަ އެމަޖެންސީ ހާލަތެއް ކުރިމަތި ވެއްޖެނަމަ ކަންކުރަންވީ އެންމެ ރައްކާތެރި ގޮތް އެނގުމަކީ މީހެއްގެ ފުރާނަވެސް ސަލާމަތްކުރެވޭނެފަދަ މުހިއްމު ކަމެއް، ނަތީޖާއަކީ ދިރިއުޅޭ އާންމު މުޖަތަމައުއާއި ގެދޮރު އަދި މަސައްކަތް ކުރާ ތަންތަން އަލިފާނުގެ ހާދިސާއަކުން ރައްކާތެރިވުން،" ވިލާ މާޓުގެ އޮފިޝަލް ބުންޏެވެ.
ވިލާ މާޓުގެ އިސްނެގުމާ އެކު ކުރިއަށް ގެންދިޔަ އެ ޕްރޮގުރާމުގައި އާންމު ގޮތެއްގައި އަލިފާނުފެ ހާދިސާއެއް ހިނގަން މެދުވެރިވާ ސަބަބުތަކާއި އަލިފާން އެންމެ ފަސޭހައިން ފެތުރޭ ގޮތްތަކާއި އަލިފާން ނިއްވާނެ ގޮތްތަކާއި އަލިފާން ނިވީގެ ވައްތަރުތަކުގެ އިތުރުން އަލިފާން ނިއްވަން ބޭނުންކުރާ ރަޖާ ނުވަތަ ފޮތީގެ ވައްތަރުތައް ވަނީ ކިޔައިދީފަ އެވެ.
އެ މައުލޫމާތަކީ ކުއްލިޔަކަށް ނޭނގި ހުއްޓާ ދިމާވާ އަލިފާނުގެ ހާދިސާއަކުން ރައްކާތެރިވުމަށް އެޅޭނެ ވަރަށް ބޮޑު ފިޔަވަޅެއް ކަމަށް ވިލާ މާޓުގެ އޮފިޝަލް ބުންޏެވެ.
