މެންޗެސްޓާ (ފެބްރުއަރީ 8) - މެންޗެސްޓާ ޔުނައިޓެޑް އެންމެ ފަހުން ކުޅުނު މެޗުގައި އެ ޓީމުގެ ބްރެޒިލްގެ މިޑްފީލްޑަރު، ކަސެމީރޯ އަށް ދެއްކި ސީދާ ރަތް ކާޑާ އެކު އޭނާ އަށް އައިސްފައިވާ ތިން މެޗުގެ ސަސްޕެންޝަން އެޕީލް ނުކުރަން ޔުނައިޓެޑުން ނިންމާފައިވާ ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.
އިނގިރޭސި ޕްރިމިއާ ލީގުގައި ކްރިސްޓަލް ޕެލަސް އަތުން ޔުނައިޓެޑް 2-1 އިން މޮޅުވި މެޗުގެ 70 ވަނަ މިނިޓްގައި ކަސެމީރޯ އަށް ރަތް ކާޑު ދެއްކީ ކްރިސްޓަލް ޕެލަސްގެ ވިލް ހިއުސް ކަރުގައި ހިފުމުންނެވެ. މިއީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ކަސެމީރޯ އަށް ދެއްކި ރަތް ކާޑެކެވެ. ކަސެމީރޯ އަށް މި ދެއްކި ރަތް ކާޑާ އެކު އޭނާ އަށް ތިން މެޗުގެ ސަސްޕެންޝަނެއް އަންނާނެ އެވެ.
ޔުނައިޓެޑުން ބޭނުންނަމަ ކަސެމީރޯގެ ރަތް ކާޑު އެޕީލް ކުރުމުގެ ފުރުސަތު އޮތެވެ. އެކަމަކު، ޓެން ހާގް ބުނީ އެޕީލް ނުކުރަން ނިންމުމަކީ މުޅި ކްލަބްގެ ވިސްނުން ކަމަށެވެ.
"އަހަރެންގެ އަމިއްލަ ވިސްނުމުގައި ބުނާނަމަ މިއީ އެންމެ ރަނގަޅު ނިންމުން ނޫން ކަމަށް ބުނެވިދާނެ. އެކަމަކު، ލީގަލީ (ގާނޫނީ ގޮތުން) ބަލާއިރު މީގެ އަހަރެމެންނަށް ނެތް ފަސޭހަ ގޮތެއް،" ލީޑްސް ޔުނައިޓެޑާ ދެކޮޅަށް ކުޅޭ މެޗުގެ ކުރިން ޓެން ހާގް ބުންޏެވެ.
ކަސެމީރޯ ޕެލަސްގެ ހިއުސް ކަރުގައި ހިފައިގެން: މިއީ ކްލަބް ކެރިއަރުގައި ކަސެމީރޯ އަށް ދެއްކި ތިން ވަނަ ރަތް ކާޑު.
ޓެން ހާގް ބުނީ އޭނާ އަށް ކަސެމީރޯ އަށް ދެއްކި ރަތް ކާޑުގެ މައްސަލަ އަކީ ހުރިހާ މެޗެއްގައި އެ ކަހަލަ ކަންކަން ދާއިރު ވަކި ކުޅުންތެރިންތަކަކަށް ކާޑު ނުދައްކައި ދޫކޮށްލާތީ އެވެ.
ސަސްޕެންޝަންގެ ސަބަބުން ކަސެމީރޯ އަށް ގެއްލެނީ ލީޑްސް ޔުނައިޓެޑާ ދެކޮޅަށް ކުޅޭ ދެ މެޗާއި ލެސްޓާ ސިޓީއާ ދެކޮޅަށް ކުޅޭ މެޗެވެ. ސަސްޕެންޝަނުން ސަލާމަތްވެ، ކަސެމީރޯ އެނބުރި އަންނާނީ މި މަހު 26 ވަނަ ދުވަހު ޔުނައިޓެޑުން ނިއުކާސަލާ ދެކޮޅަށް ކުޅޭ ލީގު ކަޕް ފައިނަލް މެޗަށެވެ.
ރިޕޯޓްތައް ބުނާގޮތުން ޔުނައިޓެޑުން ކަސެމީރޯގެ ރަތް ކާޑު އެޕީލް ނުކުރަން ނިންމީ، އެ ޓީމު ކޮޅަށް މައްސަލަ ކާމިޔާބުނުވެއްޖެނަމަ ކަސެމީރޯގެ ސަސްޕެންޝަނަށް މެޗެއް އިތުރުވެ، އޭނާ އަށް ލީގު ކަޕް ފައިނަލް ގެއްލިދާނެތީ އެވެ. އެކަމާ ބެހޭގޮތުން ސުވާލުކުރުމުން، ޓެން ހާގް ސީދާ ޖަވާބެއް ދޭން ބޭނުމެއް ނުވި އެވެ.
"އަހަރެން އަބަދުވެސް ކުޅެން ޖެހޭނީ އެ ވަގުތެއްގައި ކުޅެވޭ ހާލަތެއްގައި ތިބި ކުޅުންތެރިން ލައިގެން. އެހެންވެ، އަހަރެމެން ސްކޮޑެއް މި ގެންގުޅެނީ. އަހަރެމެންގެ ސްކޮޑުގައި އެބަތިބި ފުރަތަމަ އެގާރައިގައި އެކި މަގާމުތަކަށް ކުޅެވޭނެ ކުޅުންތެރިން، މެޗެއް ނިންމާފައި އަހަންނަށް ނުބުނެވޭނެ ކަސެމީރޯ ނެތީމައޭ މިހެންވީ،" ޓެން ހާގް ބުންޏެވެ.
ދާދި ފަހުން ލީގުގައި ޔުނައިޓެޑުން އާސެނަލް އަތުން ބަލިވި މެޗަށް ވެސް ކަސެމީރޯ ހުރީ ސަސްޕެންޝަނެއްގަ އެވެ. އެއީ ލީގުގައި ފަސް ރީނދޫ ކާޑު ހަމަވުމުން އައި ސަސްޕެންޝަނެކެވެ.
ޔުނައިޓެޑުން މިރޭ ލީޑްސްއާ ދެކޮޅަށް ކުޅޭއިރު، އެ ޓީމުގައި މި ވަގުތު ހެޑް ކޯޗެއް ނެތެވެ. އެންމެ ފަހުން ލީޑްސް ކުޅުނު މެޗަށް ފަހު، އެ ޓީމާ ހަވާލުވެ ހުރި އެމެރިކާގެ ކޯޗު ޖެސީ މާޝް ވަނީ ވަކިކޮށްފަ އެވެ.
ޓެން ހާގް ބުނީ ލީޑްސް މި ވަގުތު އޮތް ހާލަތަށް ޔުނައިޓެޑުން ނުވިސްނާނެ ކަމަށެެވެ.
