ފުވައްމުލަކުގައި މިހާރު ކުރިއަށްދާ އިންޓަ ސްކޫލް އެތުލެޓިކްސް މީޓުގެ 19 އަހަރުން ދަށުގެ އަންހެން ހައި ޖަމްޕް އިވެންޓުގައި ވާދަކޮށް، އައްޑޫ ހައި ސްކޫލްގެ އައިޝަތު ޝައިމް އަޒީޒު، ހައި ޖަމްޕްގެ އަންހެން ގައުމީ ރެކޯޑު މުގުރާލައިފި އެވެ.
އިއްޔެ ކުރިއަށްދިޔަ ހައި ޖަމްޕް އިވެންޓުގައި ވާދަކޮށް ޝައިމް ގައުމީ ރެކޯޑު މުގުރާލީ 1.50 މީޓަރ މަތިން ފުންމައިގެންނެވެ. މި ރެކޯޑު މީގެ 27 އަހަރު ކުރިން ހަދާފައި އޮތީ ރަނާ އަހުމަދު ސޯދިގު އެވެ. އޭނާ މި ރެކޯޑު ހެދީ 1996 ވަނަ އަހަރު މާލޭގައި ބޭއްވުނު ހަތަރު ވަނަ އިންޓަ ސްކޫލް އެތްލެޓިކްސް މުބާރާތުގަ އެވެ.
"މުބާރާތުގައި ބައިވެރިވިއިރު ވެސް ޝައިމް ރެކޯޑު ހަދާނެކަމުގެ ޔަގީންކަން އޮތް، އެއީ ޕްރެކްޓިސްގައި ވެސް ޝައިމްގެ ޕާސަނަލް ބެސްޓަށްވުރެ މަތިން ޖެހި. ޕާސަނަލް ބެސްޓް މިއުޅެނީ ރެކޯޑަސްވުރެ ކުޑަ ތަންކޮޅެއް ތިރީގައި. އެހެންވީމަ އިތުބާރު އޮތް ރެކޯޑު ހަދާނެކަމުގެ" ޝައިމްގެ ކޯޗު ޔަސްމާން ސޯލިހު، "އަދަދު" އަށް ބުންޏެވެ.
ޝައިމް ވަނީ ހައި ޖަމްޕްގެ ގައުމީ ރެކޯޑު ހަދައި ރަން މެޑަލް ހޯދުމުގެ އިތުރުން 19 އަހަރުން ދަށުގެ އަންހެން ބައިގެ ޖެވްލިން އުކުމުން ވެސް އެއް ވަނަ ހޯދައިފަ އެވެ. ޖެވްލިން އުކުމުން އެއް ވަނަ އޭނާ ހޯދީ 22.58 މީޓަރަށް ޖެވްލިން އެއްލައިގެންނެވެ. ދެ ވަނަ އަށް ދިޔަ ހާފިޒު އަހުމަދު ސްކޫލްގެ އައިޝަތު އަދާ އަށް އެއްލުނީ 16.34 މީޓަރަށެވެ.
ފުވައްމުލަކު ސިޓީގައި މިދިޔަ އާދިއްތަ ދުވަހު ފެށި މުބާރާތުގައި 19 އަހަރުން ދަށުގެ އަންހެން ބައިގެ ލޯންގް ޖަމްޕްގައިވެސް ޝައިމް ވާދަކުރާނެ އެވެ. އޭނާގެ ކޯޗުގެ އުއްމީދަކީ މި އިވެންޓުން ވެސް ރެކޯޑަކާ އެކު ޝައިމް ރަން މެޑަލް ހޯދުމެވެ.
މިހާރު ކުރިއަށްދާ އިންޓަ ސްކޫލް އެތުލެޓިކްސް މީޓުގައި މިހާތަނަށް ނިމުނު އިވެންޓުތަކަށް ބަލާއިރު ގައުމީ ސްޕްރިންޓް ޓީމްގެ އިބްރާހިމް ނާހިލް ވަނީ ދެ ރަން މެޑަލް ހޯދައިފަ އެވެ. ޒުވާން އުމުރުގައި ބައިނަލްއަގުވާމީ ލެވަލްގައި ވެސް ވާދަކޮށް ކުރިއެރުން ހޯދަމުން އަންނަ، ގދ. އަތޮޅު ތައުލީމީ މަރުކަޒުގެ ނާހިލް ވަނީ 100 މީޓަރު ދުވުމުންނާއި ލޯންގް ޖަމްޕްގެ ވެސް އެއް ވަނަ ހޯދައިފަ އެވެ.
ނާހިލް، 100 މީޓަރު ދުވުން ކާމިޔާބުކުރީ 11.69 އިން ރޭސް ނިންމައިގެންނެވެ. ދެ ވަނަ އަށް ދިޔައީ އައްޑު ހައި ސްކޫލްގެ އަބްދުﷲ ގާލީ އެވެ. ތިން ވަނަ ހޯދީ ހާފިޒު އަހުމަދު ސްކޫލްގެ އަލީ މައުލޫފް އިބްރާހިމް އެވެ.
ލޯންގް ޖަމްޕްގެ އެއް ވަނަ ނާހިލް ހޯދީ 6.06 މީޓަރަށް ފުންމައިގެންނެވެ. ދެ ވަނަ އަށް ދިޔައީ އައްޑޫ ހައި ސްކޫލްގެ އަލީ ސާއިން ނަސީރު އެވެ. އޭނާ އަށް ފުންމުނީ 5.30 މީޓަރަށެވެ. ތިން ވަނަ އަށްދިޔަ އައްޑޫ ހައި ސްކޫލްގެ ހަސަން ނާއިލް ސައީދަށް ފުންމުނީ 4.92 މީޓަރަށެވެ.
މުބާރާތުގެ 19 އަހަރުން ދަށުގެ އަންހެން ބައިގެ 100 މީޓަރު ދުވުމުން އެއް ވަނަ ހޯދީ ޝަރަފުއްދީން ސްކޫލްގެ ހައްވާ މުޒްނާ ފާއިޒު އެވެ. 12.88 ސިކުންތުން ދުވެގެން އޭނާ ރޭސް ނިންމިއިރު، ދެ ވަނަ ހޯދީ ދާންދޫ ސްކޫލްގެ އައިމިނަތު ލަޔާނާ އެވެ. އޭނާ ރޭސް ނިންމީ 13.26 ސިކުންތުންނެވެ. ތިން ވަނަ އަށް ދިޔަ ވިލާ ކޮލެޖުގެ އާމިނަތު ނުހާއަށް ރޭސް ނިންމުނީ 14.55 ސިކުންތުންނެވެ.
އިންޓަ ސްކޫލް އެތުލެޓިކްސް މީޓުގެ އިވެންޓުތައް އަންނަ ހުކުރު ދުވަހާ ހަމައަށް ކުރިއަށްދާނެ އެވެ. އިންޓަ ސްކޫލް އެތުލެޓިކްސް މީޓަކީ ޖޫނިއާ އެތުލީޓުންނަށް އަމާޒުކޮށް އަތޮޅުތަކުގައި ބައްވާ މުހިންމު އެއް މުބާރާތެވެ. އެތުލެޓިކްސް އެސޯސިއޭޝަނުން އަންނަނީ ސްކޫލް އެތުލެޓިކްސް މީޓުގެ އިތުރުން އިންޓަ ސްކޫލް އެތުލެޓިކްސް ޗެމްޕިއަންޝިޕާއި، އެޓޯލް ޖޫނިއާ ޗެމްޕިއަންޝިޕްގެ އަތޮޅުތަކުގައި ބާއްވަމުންނެވެ.
