އއ. މަތިވެރިން ގެއްލިގެން ހޯދަމުން އަންނަ އެރަށު ހަސަން އަލީ (ހަސަންފުޅު) އަދިވެސް ނުފެންނަ ކަމަށާއި، އޭނާ ހޯދުމަށް މިހާރު ބަލަމުން އަންނަނީ ފަޅުތެރެ ކަމަށް ކައުންސިލުން ބުނެފި އެވެ.
ހަސަންފުޅު ހޯދުމަށް ރަށުތެރެ އެއްކޮށް ބެލިއްޖެ ކަމަށާއި، މިހާރު ފަޅުތެރެ ބަލަމުންދާ ކަމަށް މަތިވެރި ކައުންސިލްގެ ރައީސް އަހުމަދު އަސްލަމު "އަދަދު" އަށް މިއަދު ވިދާޅުވި އެވެ.
"މިހާރު ރަށުތެރެ މުޅިންހެން ބަލައި ނިމިއްޖެ. މިހާރު އަޅުގަނޑުމެން މި ދަނީ ރަށުގެ ފަޅުތެރެ ބަލަމުން" އަސްލަމް ވިދާޅުވި އެވެ.
އަދި، ކައިރި ރަށްރަށާއި، ގޮސްދާނެހެން ހީވާ ރަށްރަށަށް ގުޅައިގެން އެ ރަށްރަށުގައި ވެސް އޭނާ ހޯދުމަށް އިއުލާނުކޮށްފައި ވާނެ ކަމަށް އަސްލަމް ވިދާޅުވި އެވެ.
ހަސަންފުޅަކީ އާންމުކޮށް މޫދަށްވެސް ގޮސް އުޅޭ މީހެއް ކަމަށާއި، އޭނާ ހޯދުމަށް މޫދުގެ ބޮޑު ސަރަހައްދެއްވެސް ބެލިފައިވާ ކަމަށް އަސްލަމް ވިދާޅުވީ އެވެ. ހަސަންފުޅު އެންމެ ފަހުން ފެނިފައި ވަނީ މިދިޔަ 31 ވަނަ ދުވަހުގެ ރޭގެ ވަގުތެއްގަ އެވެ.
މި މައްސަލައިގާ ފުލުހުންގެ މީޑިއާ އޮފިޝަލު "އަދަދު" އަށް ވިދާޅުވީ މަތިވެރިން 73 އަހަރުގެ ފިރިހެނަކު ގެއްލިގެން އުޅޭ ކަމުގެ ރިޕޯޓެއް އިއްޔެ ހެދުނު 09:37 ހާއިރު ލިބިފައިވާ ކަމަށާއި އެ މީހާ ހޯދުމުގެ މަސައްކަތް ފުލުހުން ވެސް ކުރަމުންދާ ކަމަށެވެ.
