އިކުއިޓޯރިއަލް ގީނިއާގެ ތާރިހުގައި ވެސް ފުރަތަމަ ފަހަރަށް ބޮޑުވަޒީރު ކަމުގެ މަގާމަށް އަންހެނަކު އައްޔަންކޮށްފި އެވެ.
އެ ގައުމުގެ ބޮޑުވަޒީރު ކަމަށް އައްޔަން ކޮށްފައި ވަނީ އެޑިއުކޭޝަންގެ ނައިބު މިނިސްޓަރުގެ މަގާމުގައި ހުންނެވި، މެނުއޭލާ ރޯކާ ބޮޓޭ އެވެ.
އެ ތާރީހީ ހަބަރު އެ ގައުމުގެ ދައުލަތުގެ ޓީވީ މެދުވެރިކޮށް ދެއްވީ އިކުއިޓޯރިއަލް ގީނިއާގެ ރައީސް، ޓިއޮޑޯރޯ އޮބިއަން ގޫމާ އެވެ. މިދިޔަ ނޮވެމްބަރު މަހު ބޭއްވި އިންތިހާބު 95 އިންސައްތައިން ކާމިޔާބު ކުރުމާ އެކު އޭނާ ވެފައި ވަނީ މި ވަގުތު، ގައުމެއްގެ ވެރިކަމުގައި އެންމެ ގިނަ ދުވަހު ވެރިކަން ކުރުމުގައި ދެމި ހުންނެވި ބޭފުޅާއަށެވެ.
އެންމެފަހުން ބޭއްވި އިންތިހާބުގެ ސައްހަ ކަމާ މެދު އެމެރިކާއިން ސުވާލު އުފައްދާފައި ވީނަމަވެސް ނަތީޖާއަކަށް އެއްވެސް ބަދަލެއް އައިސްފައެއް ނުވެ އެވެ.
1.5 މިލިއަން މީހުންގެ އާބާދީއެއް އޮންނަ އެ ގައުމު ސްޕެއިންގެ އަތްދަށުން މިނިވަންވީ 1968 ވަނަ އަހަރު އެވެ. އޭގެފަހުން އެ ގައުމުގައި ވެރިކަން ކުރައްވާފައި ވަނީ އެންމެ ދެ ބޭފުޅުންނެވެ. އެއީ މިހާރު ވެރިކަމުގައި ހުންނެވި އޮބިއަން އާއި އޭނާގެ ބޮޑުބޭބެ، ފްރާންސިސްކޯ މާސިއާސް ގޫމާ އެވެ.
ފްރާންސިސްކޯ މާސިއާސްގެ ވެރިކަން ވައްޓާލީ އޮބިއަން އިސްކޮށް ހުރެ ކުރި ބަގާވާތަކުން 1979 ގަ އެވެ.
