އިންޑިއާގެ އިދިކޮޅު ލީޑަރު ރާހުލް ގާންދީ ގައުމުގެ އެއްކޮޅުން އަނެއް ކޮޅަށް ފެއްޓެވި ދިގު ހިނގާލުން ނިމެން ގާތްވެއްޖެ އެވެ.
ހިނގާލުން ފެއްޓެވިތާ 100 ދުވަސް ފަހުން ހިމާޗަލް ޕްރަދޭޝް ސްޓޭޓުގެ ރަށްފުށު ހިސާބެއްގައި އާއްމުންނާ މުހާތަބު ކުރައްވައި ރާހުލް ވިދާޅުވީ ބޭނުންވަނީ ރައްޔިތުން އެއްބައިވަންތަ ކުރަން ކަމަށެވެ.
އިންޑިއާގެ އެންމެ ދެކުނު ބިތުން ފަށައިގެން 3،570 ކިލޯމީޓަރުގެ ރާސްތާއެއް ފައިމަގުގައި ކަޑައްތުކޮށް ނިމޭނީ އިންޑިއާގެ އެންމެ އުތުރުން ފިނިގަދަ ކަޝްމީރަށެވެ.
މިއީ އުމުރުން 52 އަހަރުގެ ރާހުލްގެ ސިޔާސީ ހަޔާތުގައި މުހިއްމު ވަގުތުކޮޅެކެވެ. ފާއިތުވި ދެ އިންތިހާބުގައި ވެސް އެމަނިކުފާނުގެ ކޮންގްރެސް ޕާޓީއަށް ލިބުނީ ނާކާމިޔާބެވެ.
މީގެ ކުރިން އިންޑިއާގެ އެންމެ ކާމިޔާބު ޕާޓީގެ ގޮތުގައި އޮތް ނަމަވެސް ކޮންގްރެސްގެ މަގްބޫލުކަން ގެއްލެން ފެށީ ކޮރަޕްޝަންގެ ތުހުމަތާއި ލީޑަރުން ޕާޓީން ވަކިވުމާ ގުޅިގެންނެވެ.
އާއްމު އިންތިހާބަށް އެންމެ 15 މަހަށް ވެފައިވާ އިރު، ރާހުލްގެ އަމާޒަކީ ތިން ވަނަ ދައުރަކަށް ވާދަކުރައްވަން ނިންމަވައިގެން ހުންނެވި ބޮޑު ވަޒީރު ނަރެންދްރަ މޯދީއަށް ވުރެ ބޮޑު ސަމާލުކަމެއް ހޯދުމެވެ،
ރާހުލް ގާންދީ ސަޕޯޓަރުންނާ އެކު.
އެގޮތުން ހިނގާލުމުގެ ތެރެއިން އެންމެ ކުދި އަދި އެންމެ ފަގީރު އަވަށްތަކަށް ވެސް ރާހުލް ޒިޔާރަތް ކުރައްވައި، އާއްމުންނާ އެކު ގިނަ ވަގުތުތަކެއް ހޭދަކުރައްވަ އެވެ.
"މި ހިނގާލުމުގެ އަމާޒަކީ އަނިޔާވެރިކަމާއި، ވަޒީފާ ނުލިބުމާއި، އަގުތައް އުފުލުމާއި، އާމްދަނީގެ ނަހަމަކަމާ ދެކޮޅަށް ތެދުވުން،" ރާހުލް ވިދާޅުވެ އެވެ.
ހޯމަ ދުވަހު ހިނގާލުން ނިމޭނީ ކަޝްމީރުގެ ސްރީނިގަރް ސިޓީއިންނެވެ. ހިނގާލުމުގެ ސަބަބުން ވެރިކަމުގައި އޮތް ބީޖޭޕީގެ މަގްބޫލުކަން ދަށްވެއްޖެ ކަމަށް ބައެއް އެނެލިސްޓުން ނުދެކެ އެވެ.
މޯދީގެ މަގްބޫލުކަން އަދިވެސް އުޅެނީ 60 ޕަސެންޓުގަ އެވެ. ބީޖޭޕީގެ އާމްދަނީ އިތުރުވަމުންދާ އިރު، ސިޔާސީ ގޮތުން ހުރިހާ ބާރެއް ވެސް އޮތީ އެ ޕާޓީއަށެވެ.
ރާހުލް ގާންދީ ސަޕޯޓަރުންނާ އެކު ހިނގާލުން ކުރިއަށް ގެންދަނީ.
އިންޑިއާގެ ޕާލަމެންޓުގެ ތިރިގޭގެ 543 ގޮނޑީގެ ތެރެއިން ކޮންގްރެސް ކޮންޓްރޯލް ކުރަނީ އެންމެ 52 ގޮނޑި އެވެ. އެއާ ހިލާފަށް ބީޖޭޕީގެ އަތުގައި 303 ގޮނޑި އެބަ އޮތެވެ.
އެހެން ނަމަވެސް، ހިނގާލުމުގެ ސަބަބުން ރާހުލްގެ މަގްބޫލުކަން އިތުރުވެފައިވާ ކަމަށް ދައްކަ އެވެ. މިދިޔަ ޖޫން މަހު 42 ޕަސެންޓު ތާއީދު އޮތް އިރު، މިހާރު އެ ނިސްބަތް އުޅެނީ 50 ޕަސެންޓުގަ އެވެ.
ހިނގާލުމުގެ އަސަަރު ބޮޑަށް ފެންނާނީ މި އަހަރުގެ ފަހުކޮޅު އެވެ. ބައެއް ސްޓޭޓުތަކުގެ އިންތިހާބު މި އަހަރުގެ ފަހުކޮޅު އޮންނަ އިރު، އާއްމު އިންތިހާބުގެ ކެމްޕެއިން ވެސް ފޯރިގަދަ ވާން ފަށާނެ އެވެ.
