އިނގިރޭސި ފުޓްބޯޅައިގެ ރެފްރީންގެ އިސް މަގާމަކަށް ކުރީގެ އެއް ވަނަ ރެފްރީ، ހޮވާޑް ވެބް ރަަސްމީކޮށް މިދިޔަ އަހަރު ފަހުކޮޅުގައި ހަމަޖައްސާފައިވާއިރު، އެ މަގާމުގައި ހުރެ އޭނާ އެންމެ ބޮޑަށް ކުރަން ބޭނުންވާ ކަމަކީ، ވީޑިއޯ އެސިސްޓަންޓް ރެފްރީ (ވީއޭއާރް)ގެ ކަންކަން އިނގިރޭސި ފުޓްބޯޅައިގައި ހިނގާ ގޮތް ރަނގަޅުކުރުން ކަމަށް ވަނީ ބުނެފަ އެވެ.
މީގެ އަށް އަހަރު ކުރިން، 2014 ވަނަ އަހަރު، ޕްރޮފެޝަނަލްކޮށް ރެފްރީކަން ކުރުމުން، ވެބް، ރިޓަޔާކުރިއިރު، އޭނާ އަކީ އިނގިރޭސި ފުޓްބޯޅައިގެ އިތުރުން ދުނިޔޭގެ ލެވަލަށް ބެލިޔަސް ފާހަގަކޮށްލެވޭ ގިނަ މަސައްކަތްތަކެއް ކޮށްފައިވާ ރެފްރީ އެކެވެ.
އޭގެ ފަހުން، ސައުދީ އަރަބިއްޔާގެ ފުޓްބޯޅަ ފެޑެރޭޝަން، ސާފްގެ ޑިރެކްޓާ އޮފް ރެފްރީސްގެ މަގާމު، 2017 ވަނަ އަހަރުގެ ޖެނުއަރީއާ ހަމައަށް ފުރުމަށް ފަހު، ދެން އުޅެފައިވަނީ ފީފާގެ އެކި ޕްރޮގްރާމްތަކުގަ އެވެ.
ވެބް، ދެން ހަވާލުވެފައިވަނީ، އެމެރިކާގެ ފުޓްބޯޅަ ލީގު، މޭޖަ ލީގު ސޮކާ (އެމްއެލްއެސް)ގެ މެނޭޖާ އޮފް ވީޑިއޯ އެސިސްޓަންޓް ރެފްރީ (ވީއޭއާރް) އޮޕަރޭޝަންސްގެ މަގާމާ އެވެ. އެއީ 2017 ވަނަ އަހަރުގެ މާޗް މަހު އެވެ.
އިނގިރޭސި ފުޓްބޯޅައިގެ ރެފްރީންގެ ކަންކަން ބަލަހައްޓާ، ޕްރޮފެޝަނަލް ގޭމްސް އޮފިޝަލްސް ލިމިޓެޑް (ޕީޖީއެމްއޯއެލް)ގެ ޗީފް ރެފްރީން އޮފިސަރުގެ މަގާމަށް މިދިޔަ އަހަރު، އޮގަސްޓް މަހު، ވެބް ގެނައިކަން އިއުލާނުކުރި އެވެ. އެމްއެލްއެސްގެ މަގާމު ދޫކޮށް، ރަސްމީކޮށް، ޕީޖީއެމްއޯއެލް އިން މުޅިން އަލަށް އުފެއްދި މަގާމުގެ ޒިންމާތަކާ ވެބް ވަނީ މީގެ ދޮޅު މަހެއްހާ ދުވަސްކުރިން ހަވާލުވެފަ އެވެ.
ވެބް، 51، ސްކައި ސްޕޯޓްސް އަށް ދިން އިންޓަވިއުއެއްގައި ބުނީ، ވީއޭއާރްގެ ސަބަބުން ފުޓްބޯޅަ އަށް އައި ހެޔޮ ބަދަލުތައް ގިނަ ކަމަށާއި އޭގެ ގޯސްކަންކަން ފެންނަނީ ދެމެހެއްޓެނިވި ގޮތެއްގައި ނިންމުންތައް ނުގެނެވޭތީ ކަމަށެވެ. އެމްއެލްއެސްގެ ވީއޭއާރް މެނޭޖަރަކަށް ހުރިއިރު، ވީއޭއާރްގެ ވާހަކަތައް ވަރަށް ގިނަ ގޮތްގޮތުން ދެކެވިފައިވާ ކަމަށާއި އެ ވާހަކަތައް އިނގިރޭސި ފުޓްބޯޅައިގައި ވެސް ދައްކައިގެން، ހައްލުުކުރަން ޖެހޭ ކަންކަން ބަދަލުކުރާނެ ކަމަށް ވެބް ވަނީ ބުނެފަ އެވެ.
މީގެ ކުރިން ވެސް ވެބް ވަނީ ވީއޭއާރް އިން ބަލާފައި ރެފްރީ ނިންމާ ނިންމުމުގެ ކަންކަން ދަނޑުގައި ދެއްކުމަކީ ސަޕޯޓަރުން ވެސް ބޭނުންވާނެ ކަމެއް ކަމަށް ބުނެފަ އެވެ. އިނގިރޭސި ފުޓްބޯޅައިގައި އެކަން ކުރުމުގެ ވިސްނުން ވެބްގެ އެބައޮތެވެ.
"މީގެ ފޮރުވަން ޖެހޭ އެއްވެސް ކަމެއް ނެތް. ވީއޭއާރްގެ އެ ނިންމުން އަންނަ ގޮތް، ރެފްރީން މުއާމަަލާތުކުރާ ގޮތް، ސަޕޯޓަރުންނަށް ފެނުމަކީ ރަނގަޅު ގޮތެއް، އެކަމަކު، އެކަން އެ ގޮތަށް ކުރަން ފުރިހަމަކުރަން ޖެހޭ ކަންކަން ވެސް ހުންނާނެ، އެންމެ މުހިންމު ކަމަކީ، ފީފާގެ ހުއްދަ ހޯދުން،" 2005 އިން 2014 އަށް ފީފާ ރެފްރީއެއްގެ ގޮތުގައި ގިނަ މުބާރާތްތަކުގައި އިންސާފުކުރި ވެބް ބުންޏެވެ.
އިނގިރޭސި ޕްރިމިއާ ލީގުގެ މެޗެއްގެ ތެރެއިން ވެބް: އޭނާ އަކީ އިނގިރޭސި ރެފްރީންގެ ކަންކަން އިންތިޒާމުކުރުމުގެ އިސް ޒިންމާއަކާ ހަވާލުވެ ހުރި ފަރާތެއް.
ވެބް ބުނީ މި ސީޒަނުގެ މިހާ ހިސާބަށް އެއްކުރެވިފައިވާ މައުލޫމާތުތަކަށް ބަލާއިރު، މެޗުގެ ނަތީޖާ އަށް އަަސަރުކުރާ ފަދަ ގޯސް ހަ ނިންމުމެއް މި ފަހަރުގެ ޕްރިމިއާ ލީގުން ފެނިފައިވާ ކަމަށެވެ. އަދި މެޗުގެ ނަތީޖާ އަށް އަސަރުކުރާ 42 ނިންމުމެއް ރަނގަޅަށް އައިސްފައިވާ ކަމަށް ވެސް ވެބް ވަނީ ފާހަގަކޮށްފަ އެވެ.
"ވިއޭއާރްގެ ނިންމުން ދެފުށްފެންނަ ރަނގަޅު އުސޫލަކުން، ހުރިހާ މެޗެއްގައި އެއް ހަމައަކުން ނިންމުން އަންނަން ޖެހޭ، އޭރުން ރެފްރީންގެ މަސައްކަތަށް ފަސޭހަވާނީ، ފަހުގެ އީޖާދުތަކަށް މީހުންގެ އިތުބާރު އޮންނާނީ ވެސް،" 2010 ވަނަ އަހަރުގެ ވޯލްޑް ކަޕް ފައިނަލާއި ޗެމްޕިއަންސް ލީގުގެ ފައިނަލްގެ ރެފްރީކަން ކުރި ވެބް ބުންޏެވެ.
އިނގިރޭސި ފުޓްބޯޅައިގައި ރެފްރީންނާ މެދު އޮތް އިތުބާރު ބޮޑުކުރަން މި އަހަރު ތެރޭ ގިނަ ޕްރޮގްރާމްތަކެއް ވެބް ވަނީ ރާވައިފަ އެވެ. އޭގެ ތެރެއިން އެންމެ އިސް މަސައްކަތްތަކެއްގެ ގޮތުގައި ކުރަން ނިންމާފައިވަނީ، އިނގިރޭސި އެފްއޭގައި ރަޖިސްޓްރީވެފައިވާ ކްލަބްތަކުގެ އޮފިޝަލުން ހިމެނޭ ގޮތަށް ސެމިނާތަކެއް ހިންގުމެވެ.
ވެބް ދެކޭ ގޮތުގައި އޯޕަން ފޯރަަމެއްގައި ކޮންމެ މީހަކަށް ވެސް އިނގިރޭސި ފުޓްބޯޅަ ރަނގަޅުކުރަން ހިޔާލު ހުށަހެޅުމުގެ ފުރުސަތު އޮންނަން ޖެހޭނެ އެވެ.
ދުނިޔޭގައި އެންމެ ފުރަތަމަ ރަސްމީކޮށް ފުޓްބޯޅަ ކުޅެން ފެށި ގައުމުތަކުގެ ތެރޭގައި އިނގިރޭސިން ހިމެނޭކަން ފާހަގަކޮށް، ވެބް ބުނީ ރެފްރީންގެ ކަންކަމުގައި ތަފާތު ބަދަލުތަކެއް އިނގިރޭސި ފުޓްބޯޅައިން ފެށެން ޖެހޭ ކަމަށެވެ. މިސާލެއްގެ ގޮތުގައި ވެބް ފާހަގަކޮށްފައިވާ އެއް ކަމަކީ، ކުރިން ކުޅެފައި، މިހާރު ރިޓަޔާވެފައި ތިބި ކުޅުންތެރިންގެ ތެރެއިން ޝައުގުވެރިވާ ފަރާތްތަކުން ރެފްރީކަން ކުރުމަށް އާދެވޭ ގޮތަށް ފުރުސަތު އޮތުން ރަނގަޅުވާނެ ކަމަށެވެ.
ކުރީގެ ކޮންމެ ކުޅުންތެރިއަކީ މޮޅު ކޯޗަކަށް ނޫނީ ފުޓްބޯޅަ އެނަލިސްޓަކަށް ނުވެދާނެ ކަމަށާއި އެެ ފަދަ މީހުންގެ ތެރެއިން ފެންވަރު ރަނގަޅު ރެފްރީއެއް ފެނުމުގެ ފުރުސަތު ވެސް އޮވެދާނެ ކަމަށް ވެބް ވަނީ ބުނެފަ އެވެ.
