ސިޔާސީ ޕާޓީތަކުގެ ގާނޫނުގައި ބުނާ މިންވަރަށް މެމްބަރުން ހަމަނުވާތީ ދިވެހި ރައްޔިތުންގެ ޕާޓީ (ޑީއާރުޕީ) އުވާލަން އިލެކްޝަންސް ކޮމިޝަން (އީސީ) އިން ނިންމި މައްސަލަ އެ ޕާޓީން އިއްޔެ ހައި ކޯޓަށް ހުށަހަޅައިފި އެވެ.
ޑީއާރްޕީ އުވާލަން އީސީން ނިންމާފައިވަނީ މިދިޔަ މަހު އެވެ. އަދި، އެޕާޓީން އެއްވެސް ސިޔާސީ ހަރަކާތެއް ނުހިންގުމަށް އިލެކްޝަންސް ކޮމިޝަނުން ވަނީ އަންގާފަ އެވެ.
ޑީއާރުޕީ އުވާލަން ނިންމި މައްސަލަ އެ ޕާޓީން ހައި ކޯޓަށް ހުށަހެޅި ނަމަވެސް އެ މައްސަލަ ބަލައިގަތުމާއި މެދު އެ ކޯޓުން އަދި ވަކި ގޮތެއް ނިންމިކަން ސާފެއް ނުވެ އެވެ.
ޑީއާރްޕީން ވަނީ ކޯޓަށް ގޮސް އެޕާޓީ އުވާލުން ކެންސަލް ނުކުރެވިއްޖެ ނަމަ ޖޭޑީޕީގެ ނަމުގައި ޕާޓީއެއް އުފައްދާނެ ކަމަށް ވެސް ބުނެފަ އެވެ.
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ލީޑަރުކަމުގެ ދަށުން ހިންގާ ޑީއާރްޕީ އުވާލަން ނިންމީ ސިޔާސީ ޕާޓީއެއްގައި ހަމަވާންޖެހޭ 3000 މެމްބަރުން ހަމަނުވުމުންނެވެ.
ސިޔާސީ ޕާޓީތަކުގެ ގާނޫނު ބުނާ ގޮތުން މެމްބަރުން ހަމަނުވާ ޕާޓީތަކަށް މެމްބަރުން ހަމަކުރުމަށް މުއްދަތެއް ދިނުމަށްފަހު ވެސް އެކަން ނުވެއްޖެ ނަމަ ކޮމިޝަނުން ޕާޓީ އުވާލަންޖެހެ އެވެ.
ޑީއާރްޕީއަކީ، އިސްލާހީ މަސައްކަތްތަކަށް ރާއްޖޭގައި ތާއީދު ލިބި ސިޔާސީ ޕާޓީތައް ހިންގުމަށް އެއިރުގެ ރައީސް މައުމޫން އަބްދުލްގައްޔޫމް ހުއްދަ ދެއްވުމަށްފަހު ވެރިކަމުގައި ހުންނަވައިގެން އެމަނިކުފާނު 2005 ވަނަ އަހަރު ހެއްދެވި ޕާޓީއެކެވެ.
