ކިންގްސްޓަން، ޖެމެއިކާ (ޖެނުއަރީ 24) - މަޝްހޫރު ސްޕްރިންޓަރު، އުސައިން ބޯލްޓް، ޖެމެއިކާގެ ކުންފުންޏެއް ކަމަށްވާ، ސްޓޮކް އެންޑް ސެކިއުރިޓީސް ލިމިޓެޑް (އެސްއެސްއެލް)ގެ އެކައުންޓެއްގައި އިންވެސްޓްކުރިއިރު، ކުރިން އެކައުންޓްގައި ހުރި 12.7 މިލިއަން ޑޮލަރުގެ ތެރެއިން މިހާރު އެކައުންޓްގައި ބާކީ ހުރި އަދަދަކީ 12000 ޑޮލަރު ކަމަށް ރިޕޯޓްތައް ބުނެފި އެވެ.
މީގެ ކުރިން، ޖެމެއިކާގެ ފިނޭންޝިއަލް ސާވިސަސް ކޮމިޝަން (އެފްއެސްސީ) އިން އާންމުކޮށްފައިވާ ރިޕޯޓެއްގައި ބުނެފައިވަނީ، އެސްއެސްއެލްގެ މާލީ މުއާމަލާތްތަކާ ގުޅޭ މައްސަލަތަކެއް ބަލަމުން އަންނަ ކަމަށެވެ. އެ ގޮތުން، ބަލަމުން އަންނަ މައްސަލަތަކުގެ ތެރޭގައި އިންވެސްޓްކޮށްފައިވާ ފައިސާތަކެއް ވީނުވީއެއް ނޭނގި މަދުވެފައިވުމުގެ ކަންތައްތަކެއް ވެސް ބަލަމުން އަންނަ ކަމަށް އެ ރިޕޯޓްގައިވެ އެވެ.
ތަހުގީގު މިހާތަނަށް ގޮސްފައިވާ ހިސާބު އޮޅުންފިލުވަން، ޖެމެއިކާގެ މިޑިއާ އިން ބޯލްޓްގެ ގާނޫނީ ޓީމުގައި ހިމެނޭ ވަކީލް، ލިންޓަން ގޯޑަންއާ ސުވާލުކުރުމުން ބުނެފައިވަނީ ކުރިން 12.7 މިލިއަން ޑޮލަރު ހުރި ބޯލްޓްގެ އެސްއެސްއެލްގެ އެކައުންޓްގައި މި ވަގުތު ހުރި ކަމަށް ލިޔެކިޔުންތަކުން ފެންނަނީ 12،000 ޑޮލަރު ކަމަށެވެ.
ލިންޓަން ބުނީ މިކަމުގެ ފުރިހަމަ ތަފްސީލްތައް ހޯދަމުން އަންނަ ކަމަށާއި ރިޕޯޓްތަކުގައިވާ ގޮތަށް ބޯލްޓް އެކައުންޓުން ގެއްލިފައިވާ ފައިސާގެ ޖުމްލަ އަދަދު ރަސްމީކޮށް އެގުނުހާ އަވަހަކަށް ކޯޓަށް މައްސަަލަ ހުށަހަޅައިގެން ކުރިއަށްދާނެ ކަމަށެވެ.
ބޯލްޓްގެ މެނޭޖަރު، ނިއުޖެންޓް ވޯކާ، މީގެ ކުރިން، މީޑިއާ އަށް ދިން އިންޓަވިއުއެއްގައި ބުނެފައިވަނީ ބޯލްޓް، 10 އަހަރަށް ވުރެ ގިނަ ދުވަހު، އެސްއެސްއެލްގައި އިންވެސްޓްކޮށްފައިވާ ކަމަށެވެ.
ޖެެމެއިކާގެ ފިނޭންސް މިނިސްޓަރު، ނައިޖެލް ކްލާކް ވިދާޅުވީ ސްޓޮކް އެންޑް ސެކިއުރިޓީސް ލިމިޓެޑް (އެސްއެސްއެލް)އާ ގުޅިގެން ދިމާވެފައިވާ މައްސަލަތައް ވީހާވެސް އަވަހަކަށް ހައްލުކުރަން މަސައްކަތް ކުރަމުން އަންނަ ކަމަށެވެ. އެކަމަކު، ގެއްލުނު ފައިސާ އަނބުރާ ލިބޭނެ ކަމުގެ ޔަގީންކަމެއް ދޭން ނައިޖެލް ބޭނުމެއް ނުވި އެވެ.
މީގެ ހަ ވަރަކަށް އަހަރު ކުރިން، 2017 ވަނަ އަހަރު، އެތުލެޓިކްސް އިން ރިޓަޔާކުރި ބޯލްޓް ވަނީ އޮލިމްޕިކްސް އިން އަށް ރަން މެޑަލް އަދި ވޯލްޑް ޗެމްޕިއަންޝިޕުން 11 ރަން މެޑަލް ހޯދައިފަ އެވެ. އެތުލެޓިކްސް ކެރިއަރަށް ފަހު، ބޯލްޓް ވަނީ މަޝްހޫރު ފުޓްބޯޅަ ޓީމުތަކާ އެކު ޓްރަޔަލްތަކެއް ވެސް ފުރިހަމަ ކޮށް، ބައެއް ޓީމުތަކަށް ކުޅެފަ އެެެވެ.
