ޕާކިސްތާނުގެ ގައުމީ ކަރަންޓު ވިޔުގަ ކުއްލިއަކަށް ހުއްޓުމަކަށް އައުމުން ހޯމަ ދުވަހުގެ ހެނދުނު ބޮޑު ސަރަހައްދަކުން ކަރަންޓު ކެނޑިއްޖެ އެވެ.
ކަަރަންޓު ކެނޑުމުގެ އަސަރު އެތައް މިލިއަން މީހުންނަށް ކުރި އެވެ. އެގޮތުން އެންމެ ބޮޑު ސިޓީ ކަރާޗީ، ވެރިރަށް އިސްލާމްއާބާދު އަދި ލާހޯރާއި ޕެޝާވަރުން ވެސް ކަރަންޓު ކެނޑުނެވެ.
ހަކަތައާ ބެހޭ މިނިސްޓަރު ހުއްރުމް ދަސްތަގިރް ވިދާޅުވީ ކަރަންޓު ވިޔުގަ ހުއްޓުމަކަށް އައީ ދެކުނު ޕާކިސްތާނުގައި "ފްރީކުއެންސީ ވޭރިއޭޝަން" ދިމާވެގެން ކަމަށެވެ.
އޭނާ ތަކުރާރުކޮށް ވިދާޅުވީ މިއީ "ބޮޑު ކާރިސާއެއް ނޫން" ކަމަށާއި ވަރަށް އަވަހަށް ކަރަންޓު ލިބޭނެ ކަމަށެވެ.
ޕާކިސްތާނަކީ އާއްމުކޮށް ކަރަންޓު ކެނޑުމުގެ މައްސަލަ ދިމާވާ ގައުމެކެވެ. އެއީ އިންފްރާސްޓްރަކްޗާއަށް އެކަށީގެންވާ މިންވަރަށް އިންވެސްޓް ނުކުރުމާއި ރަނގަޅަށް މެނޭޖް ނުކުރުމުގެ ސަބަބުންނެވެ. އެންމެ ފަހުން ބޮޑު ސަރަހައްދަކުން ކަރަންޓު ކެނޑުނީ މިދިޔަ އޮކްޓޯބަރު މަހު އެވެ. އެ ފަހަރު އަލުން ކަރަންޓު ދެވުނީ ގަޑިއިރުތަކެއް ފަހުންނެވެ.
ހަކަތައާ ބެހޭ މިނިސްޓަރު ވިދާޅުވީ ބައެއް ހިސާބުތަކުގެ ކަރަންޓު މިހާރު ލިބެމުންދާ ކަމަށާއި ހުރިހާ ސަރަހައްދަކަށް އަލުން ކަރަންޓު ލިބޭނީ ޕާކިސްތާން ގަޑިން މިރޭ 10:00 ޖަހާއިރު ކަމަށެވެ.
އިގުތިސާދީ ކާރިސާއެއް ކުރިމަތިވެފައިވާ ޕާކިސްތާނުގައި ހަރަދު ކުޑަކުރުމަށް ކަރަންޓު ބޭނުންކުރުން މަދުކުރަން ސަރުކާރުން އެދެ އެވެ.
އެގޮތުން މި މަހުގެ ކުރީކޮޅު ހުރިހާ މޯލްތަކާއި މާކެޓުތަކަށް ސަރުކާރުން އެންގީ ރޭގަނޑުގެ 08:30 ގައި ބަންދު ކުރުމަށެވެ. ރެސްޓޯރެންޓުތައް ބަންދުކުރަން ޖެހެނީ 10:00 ގަ އެވެ.
ކެބިނެޓުން ބުނީ އެ ނިންމުމުގެ ސަަބަަބުން 270 މިލިއަން ޑޮލަރު ސަލާމަތް ކުރެވޭނެ ކަމަށެވެ. ސަރުކާރުގެ އޮފީސްތަކުން ކަރަންޓު ބޭނުންކުރާ މިންވަރު 30 ޕަސެންޓު ކުޑަ ކުރުމަށް ވެސް އަންގާފައިވެ އެވެ.
ޕާކިސްތާނަށް ބޭނުންވާ ކަރަންޓުގެ ބޮޑު ބައި އުފައްދަނީ "ފޮސިލް ފިޔުލް" ނުވަތަ އިއާދަނުކުރެވޭ ހަކަތައިގެ ބާވަތްތައް އިމްޕޯޓްކޮށްގެންނެވެ.
