ލަންޑަން (ޖެނުއަރީ 22) - އިނގިރޭސި ޕްރިމިއާ ލީގުގައި މިރޭ ކުޅޭ މެޗުން އާސެނަލް ދަނޑުގައި އެ ޓީމު ބަލިކުރަން މެންޗެސްޓާ ޔުނައިޓެޑަށް އެނގޭނެ ކަމަށާއި އެކަން ކުރަން ޕްލޭނެއް ވެސް އެބައޮތް ކަމަށް ޔުނައިޓެޑްގެ ކޯޗު އެރިކް ޓެން ހާގް ބުނެފި އެވެ.
ލީގުގެ އެއް ވަަނައިގައި އޮތް އާސެނަލާއި ހަތަރު ވަނައިގައި އޮތް ޔުނައިޓެޑްގެ ކުރިމަތިލުމަށް ގިނަ ބަޔެއްގެ ސަމާލުކަން ހުއްޓިފައިވާ ސަބަބަކީ މި މެޗަކީ ލީގު ހޯދުމުގެ ރޭހަށް ބަލާއިރު ވެސް މުހިންމު މެޗަކަށް ވާތީ އެވެ. އާސެނަލާއި ޔުނައިޓެޑާ ދެމެދު އަށް ޕޮއިންޓުގެ ފަރަގެއް އޮތްއިރު، އެ އަށް މި މެޗުގެ ނަތީޖާ އަށް ފަހު އެ ޓީމެއް ބޭނުންވާނެ ގޮތަށް، ބަދަލު އަންނާނެ ގޮތެއް ހެދުމަށް ދެ ޓީމުން ވެސް ސަމާލުކަން ދޭނެ އެެވެ.
ޔުނައިޓެޑުން މި މެޗާ ކުރިމަތިލާއިރު، ދިމާވި އެންމެ ބޮޑު މައްސަލަ އަކީ އެންމެ ފަހުން، ކްރިސްޓަލް ޕެލަސްއާ ދެކޮޅަށް ކުޅުނު މެޗުގައި ޔުނައިޓެޑްގެ މިޑްފީލްޑަރު، ކަސެމީރޯ ހޯދި ރީނދޫ ކާޑާ އެކު، ޑޮމެސްޓިކް ސީޒަނުގައި ޖުމްލަ ފަސް ރީނދޫ ކާޑު ހަމަވެ، އާސެނަލް މެޗަށް ސަސްޕެންޑްވުމެވެ.
ޓެން ހާގް ބުނީ ކަސެމީރޯ ނުލައި، ވެސް އާސެނަލް ބަލިކުރެވޭނެ ކަމަށެވެ.
ކުރިން އަޔަކްސް އަށް ކޯޗުކޮށްދިން، ޓެން ހާގް، މި ސީޒަނުގައި ޔުނައިޓެޑާ ހަވާލުވެ، މިހާތަނަށް ނުކުތް 29 މެޗުގެ ތެރެއިން 21 މެޗުން ވަނީ މޮޅުވެފަ އެވެ. މޮޅުވި މެޗުތަކުގެ ތެރޭގައި ސެޕްޓެމްބަރު މަހުގައި އާސެނަލް އަތުން މޮޅުވި މެޗު ވެސް ހިމެނެ އެވެ.
"އަހަރެން ބުނާނީ އާސެނަލް އެ އޮތް މަގާމުގައި އޮންނަން އެ ޓީމަށް ހައްގޭ، އެ މީހުން ވަރަށް ރަނގަޅު ސްޓްރަކްޗާއެއްގެ ތެެރެއިން ރަނގަޅު ސިސްޓަމެއްގެ ތެރެއިން ވިސްނުންތެރިކަމާ އެކު އެ މަސައްކަތް ކުރަނީ. މުޅި ޓީމުގެ ވިސްނުން ވެސް އެއްގޮތްވެފައި، ޓިމެއްގެ ގޮތުގައި އެ ކުރާ ހިތްވަރުން އެ މީހުން އެއް ވަނައިގައި އެ އޮތީ،" ޓެން ހާގް ބުންޏެވެ.
"ތެދެއް، ސެޕްޓެމްބަރު މަހު އަހަރެމެން ދެ ޓީމު ބައްދަލުކުރި މެޗާ އަޅާކިޔާއިރު، ވަރަށް ގިނަ ކަންތައްތައް ބަދަލުވެއްޖެ، އެކަމަކު، އަހަރެން ބުނާނީ ޔުނައިޓެޑަށް އަދިވެސް އާސެނަލް ބަލިކުރަން އެނގޭނެއޭ، އަހަރެމެން އަތުގައި އެކަން ކުރެވޭނެ ޕްލޭނެއް ވެސް އެބައޮތް،"
ޔުނައިޓެޑް އެންމެ ފަހުން ކުުޅުނު 10 މެޗުން ވެސް ބަލިވެފައިނުވެ އެވެ. އެކަމަކު، ބުދަ ދުވަހުގެރޭ ކްރިސްޓަލް ޕެލަސްއާ އެއްވަރުވުމުން ޔުނައިޓެޑުން ދަމަހައްޓަމުން އައި މޮޅުވުމުގެ ސިލްސިލާ އަށް ވަނީ ނުވަ މެޗަށް ފަހު ނިމުން އަތުވެފަ އެވެ.
ލީގުގައި އެންމެ ފަހުން ޔުނައިޓެޑާ ދެކޮޅަށް އާސެނަލުން އަމިއްލަ ދަނޑުގައި ކުޅުނު ހަތް މެޗުގެ ތެރެއިން ފަސް މެޗުން ވަނީ މޮޅުވެފަ އެވެ.
އާސެނަލްގެ ކޯޗު މިކޭލް އާޓެޓާ ބުނީ މިރޭގެ މެޗަށް ނުކުންނައިރު، ކުރިން ކުޅުުނު އެއްވެސް މެޗެއްގައި ކަންތައްތައް ހިނގާފައިވާ ގޮތާ މެދު ނުވިސްނާނެ ކަމަށެެވެ. އަބަދުވެސް ފޯކަސް އަކީ ކުރިއަށް އޮތް މެޗުގައި ޓީމު މޮޅުކުރެވޭނެ ހުރިހާ ކަމަކަށް ވިސްނުމަށް ކަމަށް އާޓެޓާ ވަނީ ބުނެފަ އެވެ.
އެމިރޭޓްސް ސްޓޭޑިއަމްގައި އާސެނަލާއި ޔުނައިޓެޑް ބައްދަލުކުރާ މެޗު ފަށާނީ މިރޭ 21:30 ގަ އެވެ.
