ގާހިރާ، މިސްރު (ޖެނުއަރީ 19) - މި މަހުގެ ކުރީކޮޅު މިސްރުގެ ތިން ކޯޓު އޮފިޝަލުންނާ ދެމެދު ހިނގި ހަމަނުޖެހުމެއްގެ ސަބަބުން ހަ ވަކީލަކު ޖަލަށް ލާފައި ވާތީ އެ ގައުމުގެ ބާ އެސޯސިއޭޝަނުން އިހްތިޖާޖު ކުރަން ފަށައިފި އެވެ.
"މި ވަގުތުން ފެށިގެން އަޅުގަނޑުމެންގެ ހުރިހާ މަސައްކަތެއް ހުއްޓާލައިފިން. ކޯޓުތަކަށް ދެން ނުދެވޭނެ، ޖެނުއަރީ 19 ވަނަ ދުވަހުން ފެށިގެން ޕްރޮސެކިއުޝަން ތަހުގީގުތަކުގައި ވެސް ބައިވެރިނުވާނަން،" ބާ އެސޯސިއޭޝަނުން ނެރުނު ބަޔާނުގައި ބުންޏެވެ.
ދައުލަތުގެ އަލް އަހްރާމް ނޫހުން ބުނީ މިސްރުގެ އުތުރު މެޑިޓެރޭނިއަން އައްސޭރިފަށުގައި އޮންނަ މަރްސާ މަތްރޫހް ކޯޓުގެ އަޑުއެހުމެއްގެ ތެރެއިން ތިން އޮފިޝަލުންނާއި ހަ ވަކީލުންނާ ދެމެދު ދެބަސްވުން އުފެދި ހަމަނުޖެހުން ހިންގީ ޖެނުއަރީ ފަސް ވަނަ ދުވަހު ކަމަށެވެ.
އެ މައްސަލަ ބެލުމަށް ފަހު ވަކީލުންތައް ދެ އަހަރަށް ޖަލަށް ހުކުމް ކުރީ ބުދަ ދުވަހު އެވެ. ބާ އެސޯސިއޭޝަނުން ބުނީ "އެއްވެސް އަސްލު ސަބަބެއް ނެތި" އެ ހަ ވަކީލުން ބަންދުކޮށްފައި ބައިތިއްބައިން އިދާރާތަކުން "ބޭނުންވާކަމުގެ ސާފު ހެކި" އެބަހުރި ކަމަށެވެ.
އެގޮތުން ފުރިހަމަ ތަހުގީގެއް ނުހިންގައި އަވަސް އަރުވާލައިގެން ޝަރީއަތްކޮށް ނިންމާލުމުން އެކަަން ބަލައިނުގަންނަ ކަމަށް ބަޔާނުގައި ބުންޏެވެ. ޖަލަށް ހުކުމްކުރި ވަކީލުންތައް ވަނީ މައްސަލަ އިސްތިއުނާފުކޮށްފަ އެވެ. އިސްތިއުނާފު އަޑުއެހުމެއް އާދީއްތަ ދުވަހަށް ވަނީ ތާވަލުކޮށްފަ އެވެ.
