ޗައިނާގައި ވިހެއުމުގެ ނިސްބަތް ރެކޯޑް މިންވަރަށް ދަށްވެ، ފާއިތުވި 60 އަހަރުގެ ތެރޭގައި ފުރަތަމަ ފަހަރަށް އާބާދީ ވެއްޓިއްޖެ އެވެ.
ވިހި ބާވީސް ވަނަ އަހަރު ޗައިނާގެ ޖުމްލަ އާބާދީއަކީ 1.4118 ބިލިއަނެވެ. އެއީ 2021 އަށް ވުރެ 850،000 މީހުން މަދެވެ.
ޗައިނާގެ ވިހެއުމުގެ ނިސްބަތް ދަށްވަމުންދާތާ އަހަރުތަކެއް ވެއްޖެ އެވެ. އޭގެ ސަބަބުން ލިބިދާނެ އިގުތިސާދީ ގެއްލުންތަކުން ސަލާމަތްވުމަށް ސިޔާސަތުތައް ބަދަލުކުރަމުންދެ އެވެ.
ގިނަ އަހަރުތަކެއް ވަންދެން ތަންފީޒު ކުރި "ވަން ޗައިލްޑް" ސިޔާސަތު އުވާލިތާ ހަތް އަހަރު ފަހުން ވެސް ވިހެއުމުގެ ނިސްބަތް ހަމައަކަށް ނޭޅުނެވެ.
އޭގެ އިތުރުން، 1976 ވަނަ އަހަރަށް ފަހު ޗައިނާގައި އެންމެ ގިނައިން މީހުން މަރުވީ ވެސް 2022 ގަ އެވެ. އެގޮތުން ވިހެއުމުގެ ނިސްބަތަށް ވުރެ މަރުގެ ނިސްބަތް މައްޗެވެ.
އާބާދީ އޮތް ގޮތުގެ ސަބަބުން ބޮޑު ކާރިސާއެއް އުފެދިދާނެތީ ޗައިނާއިން ކަންބޮޑުވެ އެވެ. ދިގު މުއްދަތުގައި ވަޒީފާ އަދާކުރާ އުމުރުގެ މީހުން މަދުވެ، އުމުރުން ދުވަސްވީ މީހުން ގިނަވެ، ސިއްހީ ފަރުވާ އާއި އިޖުތިމާއީ ރައްކާތެރިކަމަށް ކުރަން ޖެހޭ ހޭދަ ބޮޑުވާނެ ކަމަށް ބެލެވެ އެވެ.
ޗައިނާގެ އިތުރުން ޖަޕާނާއި ދެކުނު ކޮރެއާއަށް ވަނީ ޒުވާނުންގެ އާބާދީ ދަށްވެ، އުމުރުން ދުވަސްވީ މީހުން ގިނަވުމުގެ މައްސަލަ ކުރިމަތިވެފަ އެވެ.
