ވިހި އެކާވީސް ވަނަ އަހަރު އިންޑިއާގެ މުއްސަނދިކަމުގެ 40.5 ޕަސެންޓް އޮތީ އާބާދީގެ އެންމެ ޕަސެންޓަކަށް ކަމަށް އޮކްސްފަމްއިން ނެރުނު ރިޕޯޓެއްގައި ބުނެފި އެވެ.
ފަގީރުކަމާ ދެކޮޅަށް މަސައްކަތް ކުރާ ޖަމިއްޔާގެ ރިޕޯޓުގައި ބުނީ 2020 ވަނަ އަހަރު އިންޑިއާގައި ތިބީ 102 ބިލިއަނަރުން ކަމަށެވެ. ވިހި ބާވީސް ވަނަ އަހަރު އިންޑިއާގެ ބިލިއަނަރުންގެ އަދަދަކީ 166 އެވެ.
ރިޕޯޓުގައި ބުނީ "ދިރިއުޅުމަށް ބޭނުންވާ އެންމެ އަސާސީ ކަންކަން ހޯދުމުގެ ގާބިލްކަން" އިންޑިއާގެ އެންމެ ފަގީރު މީހުންނަށް ލިބިފައި ނުވާ ކަމަށެވެ.
އެ ޖަމިއްޔާއިން އިންޑިއާގެ ފިނޭންސް މިނިސްޓަރަށް ގޮވާލީ އެންމެ ބޮޑެތި މަހުޖަނުންގެ އަތުން ޓެކްސްއެއް ނަގައިގެން ނަހަމަކަން ނައްތާލުމަށެވެ.
އޮކްސްފަމްގެ ރިޕޯޓު "ސަވައިވަލް އޮފް ދަ ރިޗަސްޓް" ނެރުނީ ސްވިޓްޒަލޭންޑްގެ ޑާވޯސްގައި ވޯލްޑް އިކޮނޮމިކް ފޯރަމް ފެށުމާ ދިމާކޮށްފަ އެވެ.
އެ ރިޕޯޓުގައި ބުނީ އިންޑިއާގެ މުއްސަނދިކަން އާބާދީގެ މެދުގައި ބެހިފައި އޮތީ ވަރަށް ނަހަމަ ގޮތެއްގައި ކަމަށާއި 2012 އިން 2021 އަށް އުފެދުނު 40 ޕަސެންޓް މުއްސަނދިކަން އޮތީ އާބާދީގެ އެންމެ ޕަސެންޓަކަށް ކަމަށެވެ.
އެންމެ ފަގީރުންގެ ގޮތުގައި ހިމެނޭ އާބާދީއަށް ލިބުނީ އެ މުއްސަނދިކަމުގެ އެންމެ ތިން ޕަސެންޓެވެ.
ވިހި ބާވީސް ވަނަ އަހަރު އިންޑިއާގެ އެންމެ ބޮޑު މަހުޖަނު ގޯތަމް އަދަނީގެ މުއްސަނދިކަން 46 ޕަސެންޓު އިތުރުވި އެވެ. އިންޑިއާގެ އެންމެ މުއްސަނދި 100 މީހުންގެ ޖުމްލަ މުއްސަނދިކަން 660 ބިލިއަން ޑޮލަރަށް އަރަ އެވެ.
މުއްސަނދިންގެ އިންޑެކްސްގައި 2022 ވަނަ އަހަރު އަދަނީ ހިމެނުނީ ދުނިޔޭގެ ދެ ވަނައަށް އެންމެ ބޮޑު މަހުޖަނުގެ ގޮތުގަ އެވެ. އޭގެ އިތުރުން މިދިޔަ އަހަރު އެންމެ ބޮޑު މުއްސަނދިކަމެއް ލިބުނު މީހުންގެ ލިސްޓުގެ އެންމެ ކުރީގައި ވެސް އޮތީ އޭނާގެ ނަމެވެ.
އޮކްސްފަމްއިން ބުނީ މުއްސަނދިން މުއްސނދިވަމުން ދާއިރު، އެންމެ ފަގީރު މީހުންނާއި މެދު ފަންތީގެ މީހުންގެ އަތުން ނަގާ ޓެކްސް މުއްސަނދިންގެ އަތުން ނަގާ ޓެކްސްއަށް ވުރެ ގިނަ ކަމަށެވެ.
މުދަލާއި ހިދުމަތުގެ އަގުން ނަގާ ޖީއެސްޓީގެ 64 ޕަސެންޓު ލިބުނީ އާބާދީގެ އެންމެ ފަގީރު 50 ޕަސެންޓު މީހުންގެ އަތުންނެވެ. އެންމެ މުއްސަނދި 10 ޕަސެންޓު މީހުންގެ އަތުން ޖީއެސްޓީގެ ގޮތުގައި އެންމެ ހަތަރު ޕަސެންޓެވެ.
"އިންޑިއާގެ މިސްރާބު ހުރީ ހަމައެކަނި މުއްސަނދިންނަށް ހާއްސަ ގައުމެއްގެ ގޮތުގައި ތަރައްގީވުމަށް،" އޮކްސްފަމްގެ ސީއީއޯ އަމީތާބް ބޭހަރް ވިދާޅުވި އެވެ.
"އިންޑިއާގެ ހިންދޫއިންގެ ތެރެއިން އޮންނަ އެންމެ ދަށް ފަންތީގެ ދާލިތު މީހުންނާއި، އަދިވާސީންނާއި، މުސްލިމުންނާއި، އަންހެނުން އަދި ނުރަސްމީ މަސައްކަތްތައް ކުރާ މީހުންގެ ދިރިއުޅުން ވަރަށް ބޮޑަށް ދަތި،" އޭނާ ވިދާޅުވި އެވެ.
ރިޕޯޓުގައި ބުނީ ކޯޕޮރޭޓް ޓެކްސް ކުޑަވުމާއި، ޓެކްސް ނެގުމުގައި ހުރި ލުއިތަކާއި އެހެނިހެން އުސޫލުތަކާ ހެދި މި ވަގުތު މުއްސަނދިންނަށް ވަރަށް ފައިދާވަމުންދާ ކަމަށެވެ.
އެކަން ރަނގަޅު ކުރުމަށް އޮކްސްފަމްއިން އިންޑިއާގެ ފިނޭންސް މިނިސްޓަރަށް ގޮވާލީ މުއްސަނދިކަމުން ނަގާ ޓެކްސްއެއް ކުރިއަށް އޮތް ބަޖެޓާ އެކު ތައާރަފު ކުރުމަށެވެ.
ރިޕޯޓުގައި ބުނީ އިންޑިއާގެ ބިލިއަނަރުންގެ އަތުން ދެ ޕަސެންޓުގެ ޓެކުހެއް ނެގި ނަމަވެސް، އެ ގައުމުގެ ބަނޑަށް ޖެހިފައިވާ މީހުންނަށް ކުރިއަށް އޮތް ތިން އަހަރުގެ ކެއުން ހަމަޖެހޭނެ ކަމަށެވެ.
