ޕާކިސްތާނުގެ ކުރީގެ ބޮޑު ވަޒީރު އިމްރާން ހާންގެ އަމުރަށް، އެ ގައުމުގެ އެންމެ އާބާދީ ބޮޑު ޕަންޖާބް ޕްރޮވިންސްގެ ގާނޫނު ހަދާ މަޖިލިސް އުވާލައިފި އެވެ.
އިމްރާން ހާން މަގާމުން ދުރުކުރީ މިދިޔަ އެޕްރީލް މަހު ނެގި އިތުބާރު ނެތްކަމުގެ ވޯޓަކުންނެވެ. އާ ބޮޑު ވަޒީރު ކަމަށް ވަޑައިގެންނެވީ ޝެހްބާޒް ޝަރީފް އެވެ.
އޭގެ ފަހުން ސިޔާސީ ގޮތުން ހަލަބޮލިވެފައިވާ އިރު އިގުތިސާދީ ބޮޑު ކާރިސާއެއް ވެސް ވަނީ ކުރިމަތިވެފަ އެވެ. ދަރަންޏާއި އިންފްލޭޝަން އަދި ޑޮލަރު ނެތުމުގެ މައްސަލަ ބޮޑެވެ.
އިމްރާން ހާންއާ އެކު ކޯލިޝަން ހަދާފައިވާ ޕެރްވޭޒް އެލާހީގެ ސަރުކާރުގެ ބަދަލުގައި ޕަންޖާބަށް ވަގުތީ ޗީފް މިނިސްޓަރެއް އައްޔަނު ކުރަން އެ ޕްރޮވިންސުގެ ގަވަރުނަރު ބާލިގުއްރެހްމާން އެންގެވި އެވެ.
އެ ޕްރޮވިންސްގެ މަޖިލިސް އުވާލައި އިމްރާން ހާންގެ ޕާކިސްތާން ތެހްރީކޭ އިންސާފް (ޕީޓީއައި) ޕާޓީއާ އެކު އެލާހީ ވެސް ބޭނުންވަނީ އާ އިންތިހާބެކެވެ.
ޕާކިސްތާނުގެ 220 މިލިއަނެއްހާ މީހުން ދިރިއުޅޭ ޕަންޖާބްގެ އާ އިންތިހާބު ކުރިއަށް އޮތް 90 ދުވަހުގެ ތެރޭގައި ބާއްވަން ޖެހޭނެ އެވެ.
ޕަންޖާބްގެ އިތުރުން ޕީޓީއައިގެ މަގްބޫލުކަން ބޮޑު ހައިބަރް ޕަހްތުންހްވާ ޕްރޮވިންސްގެ މަޖިލިސް އުވާލާނެ ކަމަށް ބެލެވެ އެވެ.
ޕާކިސްތާނުގެ ޕްރޮވިންސްތަކުގެ އިންތިހާބު ބާއްވަނީ އާއްމު އިންތިހާބާ އެއްކޮށެވެ. އެހެން ނަމަވެސް، ވަކިން އިންތިހާބު ބޭއްވުމަށް ގާނޫނުން މަނާ ނުކުރެ އެވެ.
އާއްމު އިންތިހާބު ތާވަލުކޮށްފައި ވަނީ އޮކްޓޯބަރު 2023 އަށެވެ. އިންތިހާބުގެ ކުރިން ޕީޓީއައިއިން ހިންގަމުންދާ ކަންކަމުގެ ސަބަބުން ޝަރީފްގެ ސަރުކާރަށް ވަނީ މާލީ ގޮތުންނާއި ލޮޖިސްޓިކްސްގެ ގޮތުން ގޮންޖެހުންތަކާ ކުރިމަތިވެފަ އެވެ.
ޕީޓީއައިގެ ތަރުޖަމާނު ފަވާދު ޗައުދަރީ ބުނީ މަޖިލިސްތައް އުވާލުމަކީ "ސަރުކާރަށް ޕްރެޝަރު ކުރުމުގެ އުކުޅެއް" ކަމަށެވެ. އުމުރުން 76 އަހަރުގެ އިމްރާން ހާން ބޭނުންވަނީ އާއްމު އިންތިހާބު އަވަސް ކުރުމަށެވެ.
އެހެން ނަމަވެސް، ޝަރީފްގެ ސަރުކާރުން އެ ގޮތް ބޭނުމެއް ނުވެ އެވެ. ސަރުކާރުގެ އުއްމީދަކީ އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީ އާއި އިތުރު ލޯނާ އެކު އިގުތިސާދު ހަމައަކަށް އަޅުވައި، ތާއީދު އިތުރުވުމުން އިންތިހާބު ބޭއްވުމަށެވެ.
