އެއް މަސް ތެރޭގައި ޗައިނާއިން ކޮވިޑް ޖެހިގެން 60،000 މީހުން މަރުވެފައިވާ ކަމަށް އެ ގައުމުގެ ރަސްމީ ތަފާސްހިސާބުން ދައްކައިފި އެވެ.
މިއީ "ޒީރޯ ކޮވިޑް" ސިޔާސަތު އުވާލި ފަހުން ރަސްމީކޮށް މަރުތަކުގެ އަދަދު ހާމަކުރި ފުރަތަމަ ފަހަރެވެ. ހަގީގީ ހާލަތު ފޮރުވަން ޗައިނާއިން އުޅޭ ކަމަށް ބައެއް ފަރާތްތަކުން ބުނެ އެވެ.
ހަގީގީ އަދަދުތައް ހާމަަނުކުރާ ކަމަށް ތުހުމަތު ކުރަމުން ދަނިކޮށް، ހޮނިހިރު ދުވަހު އެ ގައުމުގެ އޮފިޝަލުން ބުނީ ޑިސެމްބަރު އަށް ވަނަ ދުވަހުން ޖެނުއަރީ 12 ވަނަ ދުވަހަށް 59،938 މީހުން މަރުވި ކަމަށެވެ.
އޭގެ ތެރެއިން ގިނަ މީހުންނަކީ ސިއްހީ މައްސަލަތައް ހުރި އުމުރުން 80 އަހަރުން މަތީގެ މީހުންނެވެ.
މަރުވި މީހުންގެ ތެރެއިން ސީދާ ކޮވިޑް ވައިރަހުގެ ސަބަބުން ނޭވާލާ ނިޒާމު ފެއިލްވެ 5،503 މީހުން މަރުވި އެވެ. ބާކީ 54،435 މީހުން މަރުވީ ކޮވިޑް ޖެހިފައި ވަނިކޮށް ކުރިން ވެސް ހުރި ސިއްހީ މައްސަލަތައް ގޯސްވެގެންނެވެ.
މިދިޔަ މަހު ޗައިނާއިން ގެނައި ބަދަލުގެ ދަށުން ކޮވިޑް މަރެއްގެ ގޮތުގައި ބަލަނީ ހަމައެކަނި ނޭވާލުމުގެ މައްސަލަ ދިމާވެ މަރުވާ މީހުންނެވެ. އެއީ ޑަބްލިއުއެޗްއޯގެ ލަފައާ ހިލާފު ބަދަލެކެވެ.
ޑަބްލިއުއެޗްއޯގެ ލަފަޔަކީ "އެކްސެސް" މަރުތައް ވެސް ގުނުމެވެ. އެއީ ބަލިމަޑުކަމުގެ ކުރިން އެވްރެޖުކޮށް މީހުން މަރުވި މިންވަރަށް ވުރެ އިތުރުވާ ހުރިހާ މަރެއް ކޮވިޑް މަރެއްގެ ގޮތުގައި ބެލުމަށެވެ.
ޗައިނާ ސަރުކާރުން ބުނީ މިހާރު ކުރިމަތިވެފައިވާ ކޮވިޑް ރާޅުގެ ޕީކް ކުރިމަތިވީ ޖެނުއަރީ މަހުގެ ކުރީކޮޅުގައި ކަމަށެވެ. އެކަމަކު އަދިވެސް އަދަދުތައް ދަށެއް ނުވެ އެވެ.
