ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) ގެ ވެހިކަލަކުން ގިނަ އަދަދެއްގެ ބަނގުރާ ފުޅިތަކެއް އަތުލައިގެންފި އެވެ.
އާރުސީސީގެ ވޭނެއް ފުލުހުން ބަލައިފާސްކުރާ މަންޒަރާއި، އެ ވެހިކަލްގެ ތެރެއިން ބަނގުރާ ފުޅިތަކެއް ނަގައިގެން ބަލަމުންދާ މަންޒަރު ހުރި ވީޑިއޯތަކެއް ސޯޝަލް މީޑިއާގައި ދަނީ ދައުރުވަމުންނެވެ.
ފުލުހުން ބުނީ ހުޅުމާލޭގައި ދުއްވާފައި ދިޔަ ވޭނަކާ މެދު ޝައްކު ކުރެވިގެން ބެލިއިރު ބަނގުރާ ފުޅިތަކަކާއި ދަޅުތަކެއް ފެނިފައިވާ ކަމަށެވެ.
އެ މައްސަލައާ ގުޅިގެން ބިދޭސީ ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ބުނެފައިވެ އެވެ. ބެެލެވޭ ގޮތުގައި އެއީ އޭރު ވޭން ދުއްވަން އިން މީހާ އެވެ.
މި މައްސަލަ ފުލުހުން އިތުރަށް ތަހުގީގު ކުރަމުންދާ ކަމަށް ބުންޏެވެ.
އާރުސީސީއަކީ، އެމްއެންޕީގެ ރިޔާސީ ކެންޑިޑޭޓް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް (ކާނަލް ނާޒިމް) ގެ މަސްލަހަތު އޮންނަ ކުންފުންޏެކެވެ.
"އާރްސީސީގެ ވޭނެއްގެ ތެރެއިން ބަނގުރާ ފުޅިތަކެއްް ފެނުނު މައްސަލައަކީ ކުންފުނިން ނުހަނު ކަންބޮޑުވާ ކަމެއް. މިކަމާ ގުޅިގެން ކުންފުނީގެ އެތެރޭގެ ތަހުގީގެއް ކޮށް ފުލުހުންގެ ތަހުގީގަށް ކުންފުނިން އެއްބާރުލުން ދޭނެ،" ނާޒިމް މިއަދު ކުރެއްވި ޓްވީޓެއްގައި ވިދާޅުވެފައިވެ އެވެ.
އަދި، ނާޒިމް ވަނީ އާރުސީސީން ރާއްޖޭގެ ގާނޫނަކާ ހިލާފު އެއްވެސް ކަމެއް ނުކުރާނެ ކަމަށާއި އެފަދަ އެއްވެސް ކަމަކަށް ހިތްވަރު ވެސް ނުދޭނެ ކަމަށް ވިދާޅުވެފަ އެވެ.
