މެންޗެސްޓާ (ޖެނުއަރީ 11) - އިނގިރޭސި ލީގު ކަޕްގެ ކުއާޓާ ފައިނަލުގައި ފުރަތަމަ ދެ މެޗުން މޮޅުވެ، މެންޗެސްޓާ ޔުނައިޓެޑާއި ނިއުކާސަލް ޔުނައިޓެޑް ސެމީ ފައިނަލްގެ ފުރަތަމަ ޖާގަތަށް ކަށަވަރުކޮށްފި އެވެ.
ޔުނައިޓެޑުން ވަނީ ރޭ އަމިއްލަ ދަނޑުގައި، ތިން ވަނަ ޑިވިޝަނުގައި ކުޅެމުން އަންނަ، ޗާލްޓަން އެތުލެޓިކް އަތުން 3-0 އިން މޮޅުވެފަ އެވެ. ދާދި ފަހުން އެފްއޭ ކަޕް ތިން ވަނަ ބުރުން ކެޓި، ނިއުކާސަލުން ވަނީ ރޭ ލެސްޓާ އަތުން 2-0 އިން މޮޅުވެ، ލީގު ކަޕް ސެމީ އަށް ދަތުރުކޮށްފަ އެވެ.
ރޭގެ މެޗުގައި ޔުނައިޓެޑަށް ލީޑުނަގައިދިނީ 21 ވަނަ މިނިޓްގައި އެންޓޮނީ އެވެ. މިއީ އޭރިއާ ބޭރުން ލިބުނު ބޯޅައެއް ކޮންޓްރޯލް ކުރުމަށް ފަހު ގޯލުގެ ދުުރު ކަނަށް ފޮނުވާލައިގެން އެންޓޮނީ ޖެހި ގޯލެކެވެ. ފުރަތަމަ ހާފުގައި ޔުނައިޓެޑަށް ދެ ވަނަ ލަނޑެއް ޖަހައިދޭން ހިލޭ ޖެހުމަކުން ފްރެޑް ޖެހި ބޯޅަ އަމާޒުވީ ގޯލުގެ ދަނޑިއަށެވެ.
ޗާލްޓަން އިން ނަތީޖާ ހަމަހަމަކުރެވޭތޯ މަސައްކަތް ކުރި ނަމަވެސް އެކަން ކާމިޔާބުވާ ގޮތެއްނުވި އެވެ. ޔުނައިޓެޑުން އަނެއް ދެ ގޯލު ވެސް ޖެހީ މެޗުގެ ފަހުކޮޅުގަ އެެވެ. ޔުނައިޓެޑްގެ ފަހު ދެ ލަނޑު ޖެހީ ބަދަލަކަށް ކުޅެން އެރި މާކަސް ރަޝްފޯޑް އެވެ. މެޗުގެ 90 ވަނަ މިނިޓްގައި، ރަޝްފޯޑް ޖެހި ފުރަތަމަ ލަނޑަކީ، ފަކުންޑޯ ޕެލެސްޓްރީ ދިން ބޯޅައަކުން އޭރިއާތެރެއިން ޖެހި ގޯލެކެވެ. އޭގެ ހަތަރު މިނިޓް ފަހުން ރަޝްފޯޑް އަނެއް ލަނޑު ޖެހީ ކަސެމީރޯ ދިން ބޯޅައަކަށް ހުސްކޮށްއަރަ އެވެ.
މިއީ 2017 ވަނަ އަހަރުގެ ފަހުން، ލީގު ކަޕް ސެމީގައި ޔުނައިޓެޑް ކުޅޭ ފުރަތަމަ ފަހަރެވެ.
އަމިއްލަ ދަނޑުގައި ކުޅުނު ނިއުކާސަލުން ލެސްޓާ ކޮޅަށް ދެ ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ. އެ ގޮތުން، ނިއުކާސަލްގެ ފުރަތަމަ ލަނޑު ޖެހީ 60 ވަނަ މިނިޓްގައި ޖޮއޮލިންޓަން ދިން ބޯޅައަކަށް އޭރިއާތެރެއަށް ވަނުމަށް ފަހު ޑެން ބާން އެވެ. ބާން ވެއްޓިގެންފައި ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ. މިއީ ކުރިން ބްރައިޓަން އަށް ކުޅުނު ބާން، ނިއުކާސަލަށް ޖަހައިދިން ފުރަތަމަ ލަނޑެވެ.
މެޗުގެ 72 ވަަނަ މިނިޓްގައި ނިއުކާސަލުން ދެ ވަނަ ލަނޑު ޖެހިއިރު، މި ގޯލު ކާމިޔާބުކުރީ މެޗުގައި ރަނގަޅު ކުޅުމެއް ދެއްކި ޖޮއެލިންޓަން އެވެ. ނިއުކާސަލްގެ މިގޭލް އަލްމިރޯން ބޯޅަ ހުސްކޮށްލާފައި އޭރިއާތެރެއަށް ދިނުމުން، ޖޮއެލިންޓަން ވަނީ ރަނގަޅު ވަގުތު ކުރިއަށް އަރައި، ތިރިތިިރިން ގޯލުގެ ކަނަށް ބޯޅަ ފޮނުވާލައިފަ އެވެ.
ލީގު ކަޕްގެ ކުއާޓާ ފައިނަލް އަނެއް ދެ މެޗު މިރޭ އޮންނާނެ އެވެ. އެއް މެޗުގައި ނޮޓިންހަމް ފޮރެސްޓް ކުޅޭނީ ވުލްވްސްއާ އެވެ. އަނެއް މެޗުގައި، މެންޗެސްޓާ ސިޓީ އާއި ސައުތެމްޓަން ބައްދަލުކުރާނެ އެވެ.
