އިންޑިއާގެ ކެރަލާ ސްޓޭޓުގައި ކާނާ ވިހަވެ މީހަކު މަރުވި މައްސަލައާ ގުޅިގެން ރެސްޓޯރެންޓެއްގެ ވެރިޔާ އާއި އެންމެ އިސް ކައްކާ ހައްޔަަރުކޮށްފި އެވެ.
އެ ރެސްޓޯރެންޓަށް އޮންލައިންކޮށް އޯޑަރު ދިނީ ކޮއްތަޔަމް ޑިސްޓްރިކްޓުގައި އުޅޭ ނަރުހެކެވެ. އޭނާ މަރުވި އިރު، އިތުރު 21 މީހުން ވެސް ކާނާ ވިހަވި ކަމަށް ފުލުހުން ބުނެ އެވެ.
ރާޝްމީ ރާޖް ނަމަކަށް ކިޔާ ނަރުސް ބަލިވެގެން އެޑްމިޓް ކުރީ ޑިސެމްބަރު 30 ވަނަ ދުވަހު އެވެ. ހާލު ދެރަވެ އޭނާ މަރުވީ ޖެނުއަރީ ދެ ވަނަ ދުވަހު އެވެ.
ކެރަލާގެ ނޫސްތަކުން ބުނާ ގޮތުގައި ޕޯސްޓް މޯޓަމް ރިޕޯޓުން ދައްކަނީ އޭނާ މަރުވީ އެތެރެހަށީގެ ގުނަވަންތަކަށް އިންފެކްޝަނެއް ދިމާވެގެން ކަމަށެވެ.
ރެސްޓޯރެންޓުގެ ވެރިޔާ އާއި ކައްކާއާ ދެކޮޅަށް މަރުގެ ދައުވާ އުފުލާފައިވާ އިރު، މިހާތަނަށް އެމީހުން ވަކި އެއްޗެއް ނުބުނެ އެވެ.
ކެރަލާ ސްޓޭޓުގައި ފަހަކަށް އައިސް ކާނާ ވިހަވުމުގެ މައްސަލަތައް އިތުރުވަމުން ދާތީ ރެސްޓޯރެންޓުތަކުން ތައްޔާރު ކުރާ ކާބޯތަކެތީގެ ރައްކާތެރިކަމާ މެދު އާއްމުން ކަންބޮޑުވެ އެވެ.
މިދިޔަ ހަފުތާގައި އެ ސްޓޭޓުގެ އެކި ހިސާބުތަކުން އެފަދަ މައްސަަލަތައް ރިޕޯޓުކުރި އެވެ. އެގޮތުން ޕަތަނަމްތިއްޓަ ޑިސްޓްރިކްޓުން ސްކޫލް ކެއުމެއްގައި ބައިވެރިވި ކުދިންނާއި ބެލެނިވެރިން ބަލިވި އެވެ.
ހަމަ އެ ސްޓޭޓުގައި ނަސާރާ ދީނުގެ ފައްޅިއެއްގައި އޮތް ކެއުމެއްގައި 100 އެއްހާ މީހުން ކާނާ ވިހަވި އެވެ. އޭގެ ފަހުން ރެގިއުލޭޓަރީ އިދާރާތަކުން ވަނީ ތަންތަން ބަލައި ފާސްކުރަން ފަށައިފަ އެވެ.
މިހާތަނަށް 48 ތަނެއް ވަނީ ބަންދުކޮށްފަ އެވެ. އޮފިޝަލުން ބުނީ ބަލައި ފާސްކުރުމުގެ އޮޕަރޭޝަން އަދިވެސް ކުރިއަށް ދާނެ ކަމަށެވެ.
މިދިޔަ އަހަރުގެ މޭ މަހު ކާނާ ވިހަވެގެން 16 އަހަރުގެ ކުއްޖަކު މަރުވެ، އިތުރު ބަޔަކު ބަލިވުމުން ވެސް ބަލައި ފާސްކުރުމުގެ އޮޕަރޭޝަނެއް ހިންގި އެވެ.
