ކްރޮސް ސަބްސިޑީ އުސޫލުން ލ. ކައްދޫ އެއާޕޯޓު އިންޓަނޭޝަނަލް ފެންވަރަށް ތަރައްގީކުރުމަށް ފައިނޭންސް ހޯދަން ހުޅުވާލައިފި އެވެ.
ކްރޮސް ސަބްސިޑީއަށް ތަންތަން ދޫކުރުމަކީ އެއާޕޯޓުތައް އަޅާށާއި، ފެރީ ހިދުމަތް ދޭށާއި ސަރުކާރު ކުންފުނިތަކުގެ ވިޔަފާރި ހަރަދުތައް ފޫބައްދަން އެކި ސަރުކާރުތަކުން އެކިގޮތަށް ގެންގުޅެފައިވާ ސިޔާސަތެކެވެ.
ކްރޮސް ސަބްސިޑީ އުސޫލުން ފައިސާ ހޯދައިގެން ހިންގާ މަޝްރޫއެއް ގޮތަށް މިމަޝްރޫއު ރައީސް އިބްރާހިމް މުހައްމަދު ސޯލިހު ކަނޑައަޅުއްވައި އެކަން އިއުލާންކުރެއްވީ މިއަދު ނެރުއްވި ގަރާރެއްގަ އެވެ.
މި މަޝްރޫއަށް ފައިނޭންސް ކުރަން ޖެހޭ އެންމެ ދަށް އަގަކީ ފަސް މިލިއަން ޑޮލަރު (77 މިލިއަން ރުފިޔާ) ކަމަށް ވަނީ ގަރާރުގައި ކަނޑައަޅާފަ އެވެ.
ކައްދޫ އެއާޕޯޓު އިންޓަނޭޝަނަލް ފެންވަރަށް ތަރައްގީކުރުމަކީ ރައީސް ސޯލިހުގެ ވައުދެކެވެ.
އިގްތިސާދީ ހަބެއްގެ ގޮތުގައި ލ. އަތޮޅު ތަރައްގީ ކުރުމަށްޓަކައި އެންމެ އިސްކަމެއް ދީގެން ކުރަން ޖެހޭ މަސައްކަތަކީ އެ އަތޮޅުގެ ކައްދޫގައި އޮންނަ އެއާޕޯޓް އިތުރަށް ތަރައްގީ ކުރުން ކަމަށް 2020 ވަނަ އަހަރު ލާމު އަތޮޅަށް ކުރެއްވި ދަތުރުފުޅެއްގައި ރައީސް ވިދާޅުވެފައިވެ އެވެ. އެ އަހަރު ތެރޭގައި އެ މަސައްކަތް ފަށާނެ ކަމަށް ވެސް ރައީސް އެއިރު ވިދާޅުވި އެވެ.
ކްރޮސް ސަބްސިޑީއަށް ރަށްތައް ދިނުމުގެ ގަވާއިދުގެ ދަށުން މަޝްރޫއު ހިންގާ ފަރާތުން ސަރުކާރަށް ފައިސާ ދައްކަން ލިބެނީ 60 ދުވަހުގެ މުއްދަތެކެވެ. އެ މުއްދަތު އިތުރުކޮށްދިނުމުގެ ބާރު ލިބެނީ ސީދާ ރައީސްއަށެވެ. އެގޮތުން 180 ދުވަހަށް ވުރެ ދިގު ނޫން މުއްދަތެއް ފައިސާ ދައްކަން ދެވޭނެ އެވެ.
މި އުސޫލުގެ ދަށުން މީގެ ކުރިން ވަނީ ރާއްޖޭގެ ހަ ރަށެއްގައި އެއާޕޯޓް އެޅުމަށް ޕްލޭނިން މިނިސްޓްރީން އިއުލާނުކޮށްފަ އެވެ. އޭގެ އިތުރުން ދެން އިއުލާނުކޮށްފައިވަނީ ގިރާވަރުފަޅު ހިއްކައި އެ ތަނުގައި ރެސިޑެންޝަލް ސިޓީއެއް ގާއިމްކުރުމަށެވެ.
