އުތުރު އިންޑިއާގެ ބައެއް ހިސާބުތަކަށް މާ ބޮޑަށް ފިނިގަދަވެ، އާއްމު ދިރިއުޅުމަށް ބުރޫ އަރައިފި އެވެ.
ދުންފިނި ނުވަތަ ފޮގްގެ ސަބަބުން އެތައް ސަތޭކަ ފްލައިޓާއި ރޭލު ދަތުރު ލަސްކޮށްފައިވާ އިރު، އެއާޕޯޓުތަކާ ރޭލު ސްޓޭޝަންތަކުގައި ކާރޫބާރޫ ބޮޑެވެ.
ވެރިރަށް ނިއު ދިއްލީގެ އިދާރާތަކުން ބުނީ ފިނި މޫސުމާ ދިމާކޮށް ދަރިވަރުންނަށް ދިން ޗުއްޓީގެ މުއްދަތު އިތުރު ކުރަން ސްކޫލްތަކަށް އަންގާފައިވާ ކަމަށެވެ.
އާދީއްތަ ދުވަހު އެ ސިޓީގެ ބައެއް ހިސާބުތަކުގެ ފިނިހޫނުމިން ހުރީ 1.9 ޑިގްރީ ސެލްސިއަސްގަ އެވެ.
ދިއްލީގެ އިތުރުން އުތުރުގެ އެހެން ސްޓޭޓްތަކަށް ވެސް ދަނީ ވަރަށް ބޮޑަށް ފިނިވަމުންނެވެ. އެގޮތުން ކަޝްމީރުގެ ފިނިހޫނުމިން ހުރީ -6 ޑިގްރީ ސެލްސިއަސްގަ އެވެ.
އިންޑިއާގެ މޫސުމާ ބެހޭ ޑިޕާޓްމަންޓުން މާ ބޮޑަށް ފިނިގަދަވާ ކަމަށް ކަނޑައަޅަނީ ފިނިހޫނުމިން 4 ޑިގްރީ ސެލްސިއަސްއަށް ވުރެ ދަށުގައި ހުންނަން ފެށުމުންނެވެ.
މީޓިއޮރޮލޮޖިކަލް ޑިޕާޓްމަންޓުން އެދިފައި ވަނީ މި ދުވަސްވަރު ބޭރަށް ނުނިކުތުމަށެވެ. އަދި އުޅަނދު ދުއްވާ އިރު ވިޒިބިލިޓީ ދަށްވުމުން ވަކިން ހާއްސަކޮށް ސަމާލުވުމަށް އެންގި އެވެ.
އޮފިޝަލުން ބުނީ މި "ފިނީގެ ރާޅު" މަޑުމަޑުން ރަނގަޅުވާން ފަށާނެ ކަމަށް ބެލެވެނީ ޖެނުއަރީ 10 ވަނަ ދުވަހުގައި ކަމަށެވެ.
