ޗައިނާގައި ކޮވިޑް ޓެސްޓު ކިޓު އުފައްދާ ފެކްޓްރީއެއްގެ މުވައްޒަފުންނާއި ފުލުހުންނާ ދެމެދު ކުރިމަތިލުންތަކެއް ހިނގައިފި އެވެ.
ހޮނިހިރު ދުވަަހު މުވައްޒަފުން މުޒާހަރާ ފެށީ ހުޅަނގު ދެކުނު ޗޮންގިންގް ސިޓީގެ ފެކްޓްރީއިން ވަޒީފާތައް ކުއްލިއަކަށް މަދު ކުރަން ނިންމުމާ ގުޅިގެންނެވެ.
އެއީ އިން ވިޓްރޯ ޑަޔަގްނޯސްޓިކް ރީޖެންޓް އަދި އިކުއިޕްމަންޓް އުފެއްދުމުގައި ސްޕެޝަލައިޒްވެފައިވާ ޒީބަޔޯ ކުންފުނީގެ ފެކްޓްރީއެކެވެ.
ޗައިނާގެ "ޒީރޯ ކޮވިޑް" ސިޔާސަތު އުވާލުމުން ޓެސްޓު ކުރަން ޖެހޭ މިންވަރު ވަނީ ދަށްވެފަ އެވެ. އެހެންވެ، ޓެސްޓް ކިޓަށް އޮތް ޑިމާންޑް ވެސް ވަނީ ވެއްޓިފަ އެވެ.
ފެކްޓްރީގައި ކުރިމަތިލުންތައް ހިނގާ ވީޑިއޯތައް އާއްމުވެފައިވާ އިރު، މުވައްޒަފުން ގޮވަމުން ދިޔައީ އެ މީހުންނަށް ހައްގުވާ ފައިސާ ދިނުމަށެވެ.
ޗައިނާގައި ސިޔާސީ މުޒާހަރާތައް ފެންނަނީ މަދު ފަހަރަކު އެވެ. އެހެން ނަމަވެސް މަސައްކަތްތެރިންގެ ހައްގުތަކާ ގުޅުން ހުރި މައްސަލަތަކުގައި ވަކިވަކި ކުންފުނިތަކާ ދެކޮޅަށް ވަރަށް ގިނައިން މުޒާހަރާ ކުރެ އެވެ.
