ޕެރިސް (ޖެނުއަރީ 9) - ފްރާންސްގެ ކުރީގެ ކެޕްޓަން ޒިނެދީން ޒިދާނަށް އިހުތިރާމް ކުޑަކޮށް ފްރާންސްގެ ފުޓްބޯލް ފެޑަރޭޝަން (އެފްއެފްއެފް)ގެ ރައީސް, ނޮއެލް ލަ ގްރައެޓް ދެއްކެވި ވާހަކަތަކާ ގުޅިގެން، ފްރާންސްގެ ތަރި, ކިލިއަން އެމްބާޕޭ ހިތްހަމަނުޖެހުން ފާޅުކޮށް، ޒިދާންގެ ދިފާއުގައި ވާހަކަދައްކަައިފި އެވެ.
ފްރާންސްގެ ގައުމީ ޓީމުގެ ކޯޗުކަމަށް ޒިދާން ޝައުގުވެރިކަން ފާޅުކޮށްފައިވޭތޯ ފްރާންސްގެ ރެޑިއޯ ސްޓޭޝަނަކުން ސުވާލުކުރުމުން، އެފްއެފްއެފްގެ ރައީސް ލަ ގްރައެޓް ވިދާޅުވީ "ޒިޔާން ގުޅިޔަސް ފޯނަށް ޖަވާބު ނުދޭނެ،" ކަމަށެވެ. އަދި ޒިދާނަކީ ފްރާންސްގެ ޓީމަށް އެކަށީގެންވާ ކޯޗެއް ނޫން ކަމަށް އޭނާ ސިފަކުރެއްވި އެވެ.
"އަަހަރެން ފޯނުވެސް ނުގާނަން. އަހަރެން އޭނާ އަށް ކީއޭ ކިޔާފަ ޖަވާބު ދޭނީ؟ އަހަރެން ބުނަންވީ އަހަރަމެން ޑިޑިއޭ (ޑެޝޯމްޕްސް)ގެ ކޮންޓުރެކްޓް އާކޮށްފީމޭ ދެން ޒިދާން އެހެން ކްލަބެއް ހޯދާށޭތަ ބުނަންވީ،" ލަ ގްރައެޓް، 81، ވިދާޅުވި އެވެ.
ވޯލްޑް ކަޕްގެ ފައިނަލް މެޗުގައި އާޖެންޓީނާ ކޮޅަށް ގޯލު ޖެހުމަށް ފަހު އެމްބާޕޭ އުފާފާޅުކުރަނީ.
ލަ ގްރައެޓްގެ ވާހަަކަތަކަށް ރައްދު ދެމުން، އެމްބާޕޭ ކުރި ޓުވީޓެއްގައި އޭނާ ބުނީ "ޒިދާން ފަދަ ލެޖެންޑަކަށް އެގޮތަށް އިހުތިރާމް ކުޑަކުރާކަށް ނުވާނެ" ކަމަށެވެ.
ލަ ގްރައެޓް ވިދާޅުވީ ފްރާންސްގެ ކޯޗުކަމުން ޑެޝޯމްޕްސްގެ ބަދަލުގައި އެހެން ކޯޗެއް ހޯދުމަކީ އެފްއެފްއެފްގެ ވިސްނުމެއް ނޫން ކަމަށެވެ.
ޑެޝޯމްޕްސް ފްރާންސްގެ ޓީމާ އެކު ހަދާފައިވާ ކޮންޓުރެކްޓް މިދިޔަ އަހަރުގެ ވޯލްޑް ކަޕްގެ ނިޔަލަށް ހަމަވިޔަސް، އެފްއެފްއެފް އިން ވަނީ 2026 ވަނަ އަހަރުގެ ވޯލްޑް ކަޕްގެ ނިޔަލަށް އޭނާގެ ކޮންޓުރެކްޓް އާކޮށްފަ އެވެ.
ފްރާންސްގެ ކޯޗުކަމަށް ޒިދާން ގެންނަން އުޅޭ ކަމަށް މިދިޔަ ދެ އަހަރު ތެރޭ މީޑިއާގައި ގިނަ ވާހަކަތަކެއް ދެކެވުނުއިރު, އެކަމަށް ފްރާންސް ފެޑެރޭޝަން ތެރެއިން ހުރަސްއަޅާ ކަމަށް ފްރާންސްގެ ނޫސްތަކުން މީގެ ކުރިން ވަނީ ރިޕޯޓްކޮށްފަ އެވެ. ލަ ގްރައެޓްގެ މި އިންޓަވިއުއާ އެކު، ފްރާންސް ފެޑެރޭޝަނާއި ޒިދާނާ ދެމެދު ގުޅުން ގޯސްކަން ހާމަވެގެންދެ އެވެ.
