މީގެ ހަތް އަހަރު ކުރިން، 20 މާޗް 2015 ވަނަ ދުވަހުގެ ރޭ މުންޑޫ ވަގުތީ ހިޔާގޭ ކައިރިން ހިނގާފައި ދަނިކޮށް ލ. މުންޑޫ، ނޫވިލު، އަލީ ޒިޔަދަމްގެ ވާރިސުން ޔަގީންކުރަން އެ ރަށު ދެ މީހެއްގެ ހެކިބަސް މިއަދު ނަގައި، އަންނަ ހަފުތާ ވާރިސުންގެ ބަސް ނެގުމަށް މަސައްކަތް ކުރުމަށް ނިންމައިފި އެވެ.
ޒިޔަދަމަށް މަސް ކަނޑާ ވަޅިއަކުން ހަމަލާ ދިން ދެ މީހުންނަކީ އެ ރަށަށް ނިސްބަތްވާ އަލީ ސިފާމް އާއި މުހައްމަދު ޝަނޫން ކަމަށް ކޯޓަށް ހުށަހެޅި މައްސަލާގައިވެ އެވެ. އޭގެ ތެރެއިން ޝަނޫންގެ މައްޗަށް މަރާލުމުގެ ކުށް ސާބިތުވިއިރު، ސިފާމްގެ މައްޗަށް މަރާލުމުގައި ބައިވެރިވުމުގެ ކުށް ވަނީ ސާބިތުވެފަ އެވެ.
މިއަދު ބޭއްވި އަޑުއެހުމުގައި އޮތީ ޒިޔަދަމްގެ ވާރިސުންނަކީ ކޮބައިކަން ޔަގީންކުރަން ދެ މީހެއްގެ ބަސް ނެގުމެވެ. ދެ މީހުން ވެސް ބުނެދިން ގޮތުގައި ޒިޔަދަމްގެ މަންމަ މިހާރު ދުނިޔެއަކު ނެތެވެ. ބައްޕަ ދުނިޔޭގައި ހުރިއިރު، އޭނާ ދިރިއުޅެނީ އެހެން މީހަކާ ކައިވެނިކޮށް ތުޅާދޫގަ އެވެ.
ޒިޔަދަމްގެ އެއްބަނޑު އެއްބަފާ ހަ މީހަކު އަދި އެއްބަފާ ދެ މީހަކު ދުނިޔޭގައި އެބަ ހުއްޓެވެ. އަދި ޒިޔަދަމްގެ ދަރިފުޅު، މުހައްމަދު އަޔުޝް ބިން ޒިޔަދަމް ވެސް ދުނިޔޭގައި އެބަހުއްޓެވެ. ދަރިފުޅުގެ މަންމައާ ޒިޔަދަމް ތިބީ ވަރިވެފަ އެވެ.
މައްސަލަ ބައްލަވާ ގާޒީ އިސްމާއީލް ޝަފީއު ވިދާޅުވީ ވާރިސުން ޔަގީން ކުރެވިފައި އޮތުމުން، ވާރިސުންގެ މައުލޫމާތު ހޯދުމަށް އަދިވެސް އިދާރީ ބައެއް މަސައްކަތްތައް ކުރަން ހުރުމުން ވާރިސުންގެ ބަސް ނެގޭނެ ސީދާ ދުވަހެއް އަދި ނޭނގޭ ކަމަށެވެ. ނަމަވެސް އަންނަ ހަފުތާއަށް ވާރިސުންގެ ބަސް ނެގުމަށް މަސައްކަތް ކުރައްވަމުން ގެންދަވާ ކަމަށް ގާޒީ ވިދާޅުވި އެވެ.
ވާރިސުންގެ ބަސް ނެގުމަށް ފަހު، ދެން އޮންނާނީ އަދަބާ ގުޅޭ ގޮތުން ދައުލަތާއި ދިފާއުން ވާހަކަ ދެއްކުމެވެ. މައްސަލައިގެ ހުކުމް ކަނޑައަޅާނީ އެއަށް ފަހުގަ އެވެ.
މައްސަލަ ހިނގައި ދިޔަ ގޮތް;
މި އަހަރުގެ ޖެނުއަރީ މަހު ބޭއްވި އަޑުއެހުމުގައި، ދައުލަތުން ހުށަހެޅި ސިއްރު ހެކިވެރިއެއް ބުނާ ގޮތުން ޒިޔަދަމް މަރާލުމުގެ ކުރިން ހޫނު ގަދަ ޒުވާބެއް ހިނގި ކަމަށް ވެއެވެ. އަދި އެ ޒުވާބު ހިނގާ ދިޔައީ ސިފާމްގެ ކޮއްކޮ އާއި ޒިޔަދަމާ ދެމެދު ހިނގި ކަންތައްތަކެއްގެ ސަބަބުންކަން އެނގޭ ކަމަށް ވެސް އެ ހެކިވެރިޔާ ބުންޏެވެ.
އޭނާ ބުނާ ގޮތުން ޒިޔަދަމް މަރާލާފައި އޮއްވާ ފެނުނީ ޒިޔަދަމްގެ ޅިޔަނުގެ ގޭގެ ބަދިގެ ތެރެއިންނެވެ.
އެ ގޭގެ ބަދިގެއިން އޭނާގެ ހަށިގަނޑު ނަގައިގެން ސިއްހީ މަރުކަޒާ ހަމައަށް ގެންދިޔައިރު ވެސް ހެކިވެރިޔާ ހުރި ކަމަށާއި ސިއްހީ މަރުކަޒު ކައިރިން މައްސަލައިގައި ތުހުމަތު ކުރެވޭ ޝަނޫނު ފެނުނު ކަމަށާއި އޭނާ އެތަނުގައި ވަރަށް އަޑުގަދަކުރި ކަމަށް ހެކިބަސް ދެމުން އޭނާ ކިޔައިދިނެވެ. އަދި ޝަނޫނުގެ ސޯޓުގައި އާއި އަތުގައި އެވަގުތު ލޭ ހުރިތަން ފެނުނު ކަމަށް ވެސް ހެކިވެރިޔާ ބުންޏެވެ.
ހާދިސާ ހިނގި ކަމަށް ބުނާ ތަނުން ޒިޔަދަމްއާއި ޝަނޫންގެ ލޭ ވެސް ފެނިފައިވެ އެވެ. ޒިޔަދަމަށް ހަމަލާ ދިނީ ޝަނޫން ކަމަށާއި، ޝަނޫނަށް އެ ކަމަށް އެއްބާރުލުން ދިނުމުގައި ސިފާމް ބައިވެރިވާ ކަން ސާބިތުވާ ކަމަށް މިއަދުގެ އަޑުއެހުމުގައި ގާޒީ ޝަފީއު ވެސް ވިދާޅުވި އެވެ.
