ޗައިނާގެ ފައިނޭންޝަލް ޓެކްނޮލޮޖީ ކުންފުނި އޭންޓް ގްރޫޕުގެ ފައުންޑަރު ޖެކް މާ އެ ކުންފުނީގެ ކޮންޓްރޯލް ދޫކޮށްލަން ނިންމައިފި އެވެ.
އޭންޓް ގްރޫޕުން ބުނީ އާ ބަދަލާ އެކު އެއްވެސް މީހަކަށް ކުންފުނީގެ ފުރިހަމަ ކޮންޓްރޯލް ނުލިބޭނެ ކަމަށެވެ.
ބިލިއަނަރު ޖެކް މާއަކީ ކުރިން އިވެންޓުތަކުން ވަރަށް ގިނައިން ފެންނަ ޝަހުސިއްޔަތެކެވެ. އެކަމަކު އޭނާ ޗައިނާގެ މާލީ ސިނާއަތަށް ފާޑުކީ ފަހުން އާއްމު ތަނަކުން ފެނުނީ މަދު ފަހަރަކު އެވެ.
އޭގެ ފަހުން ފަހު އޭންޓް ގްރޫޕްގެ ސްޓޮކް މާކެޓަށް ދޫކޮށްލަން ނިންމި ނިންމުން ވެސް ކުއްލިއަކަށް މަޑުޖެއްސި އެވެ.
ޗައިނާގެ މައި އޮންލައިން ޕޭމަންޓް ނިޒާމް އަލިޕޭ ހިންގަނީ އޭންޓް ގްރޫޕުންނެވެ. ކުރިން އިނގިރޭސި ޓީޗަރެއްގެ ގޮތުގައި އުޅެ، އީކޮމާސް ކުންފުނި އަލީބާބާ އުފެއްދި ޖެކް މާ، އޭންޓް ގްރޫޕްގެ 50 ޕަސެންޓަށް ވުރެ ބޮޑު ބައެއް ކޮންޓްރޯލް ކުރެ އެވެ.
އެހެން ނަމަވެސް، އާ ބަދަލާ އެކު އޭނާގެ ހިއްސާއަކީ އެންމެ ހަ ޕަސެންޓެވެ.
ޗައިނާގެ ރެގިއުލޭޓަރީ އިދާރާތަކުން ޓެކްނޮލޮޖީ ކުންފުނިތަކާ ދެކޮޅަށް ހިންގާ އޮޕަރޭޝަންތަކުގައި އެންމެ ބޮޑަށް ގެއްލުންވަމުންދާ އެއް ކުންފުންޏަކީ އޭންޓް ގްރޫޕެވެ.
