ކޮވިޑް ބަލިމަަޑުކަމާ ގުޅިގެން މާޗް 2020 ވަނަ އަހަރުގައި ބަންދުކުރި ޗައިނާގެ ބޯޑަރުތައް ބައިނަލްއަގްވާމީ ދަތުރުވެރިންނަށް ހުޅުވާލައިފި އެވެ.
ޗައިނާގެ ކޮވިޑް ސިޔާސަތަށް ގެނައި ބަދަލުގެ ދަށުން އެ ގައުމަށް އެތެރެވާ މީހުން ކަރަންޓީނު ވާން ނުޖެހޭނެ އެވެ. އެހެން ނަމަވެސް، ކޮވިޑަށް ނެގެޓިވް ނަތީޖާ ހުށަހަޅަން ޖެހޭނެ އެވެ.
ބޯޑަރުތައް ހުޅުވާލުމަކީ ގިނަ ބަޔަކު ހިތްހަމަޖެހޭ ނިންމުމެކެވެ. ހޮންކޮންގުން އެކަނިވެސް ކުރިއަށް އޮތް ހަފުތާތަކުގައި 400،000 މީހުން ޗައިނާގެ ސިޓީތަކަށް ދަތުރުކުރާނެ ކަމަށް ލަފާކުރެވެ އެވެ.
އެގޮތުން، ބެއިޖިންގް އާއި ޝިއަމެން ސިޓީގެ ފްލައިޓްތަކަށް ޑިމާންޑު ބޮޑެވެ. އެ ސިޓީތަކަށް ދަތުރުކުރުމަށް ވެއިޓްލިސްޓުކޮށްފައި ގިނަ ބަޔަކު އެބަ ތިއްބެވެ.
ބޯޑަރު ހުޅުވާލުމުން ގިނަ ބަޔަކަށް ހިތްހަމަޖެހުން ލިބުނު ނަމަވެސް، އޭގެ ސަބަބުން ކޮވިޑް ފެތުރުން ހަލުވިވެދާނެތީ ބައެއް ފަރާތްތަކުން ކަންބޮޑުވެ އެވެ.
ފާއިތުވި ތިން އަހަރު ޗައިނާގައި ތަންފީޒު ކުރި "ޒީރޯ ކޮވިޑް" ސިޔާސަތުގެ ދަށުން ސިޓީތަކުގައި އެތައް މިލިއަން މީހުން ލޮކްޑައުންކޮށް، ޓެސްޓުކޮށް، އައިސޮލޭޓް ކުރަމުން ދިޔަ އެވެ.
ކުއްލިއަކަށް އެ ސިޔާސަތު އުވާލައި ބޮޑެތި ލުއިތައް ދޭން ފެށީ ސަރުކާރާ ދެކޮޅު މުޒާހަރާތައް ފެތުރުމުންނެވެ. ނަތީޖާއެއްގެ ގޮތުން ކޭސްތައް އިތުރުވެފައިވާ ކަމަށް ރިޕޯޓުތައް ބުނެ އެވެ.
