އިންޑިއާގެ އުއްތަރަހާންދް ސްޓޭޓުގެ އަވަށެއްގެ ގެތަކުގައި ރެނދުލައި ފައްޅިއެއް ބިމާ ހަމަވުމުން، އެ އަވަށުގެ މީހުން ވަގުތީ ހިޔާތަކަށް ބަދަލުކޮށްފި އެވެ.
އެއީ ހިމަލަޔާ ފަރުބަދަތައް މަތީ، 1890 މީޓަރު އުހުގަައި އޮންނަ 25،000 މީހުން ދިރިއުޅޭ އަވަށެކެވެ. އެއީ ހިމަލަޔާ ފަރުބަދައަށް އަރަންދާ މީހުންނާއި ހިންދޫ ދީނުގެ އަޅުކަންތައް ކުރުމަށް ދަތުރު ކުރާ މީހުން މަޑުކުރާ އަވަށެކެވެ.
"ޖޯޝިމަތު" އަވަށުގެ ގެތަކާއި ހޮޓެލްތަކާއި މަގުތަކުގައި ބޮޑެތި ރެނދުތައް ވަނީ އުފެދިފަ އެވެ. އަދި ހުކުރު ދުވަހު ވަނީ އެ އަވަށުގެ ފައްޅިއެއް ވެއްޓިފަ އެވެ.
އޮފިޝަލުން ބުނީ 600 އަށް ވުރެ ގިނަ ގޭގައި ރެނދުލާފައިވާ ކަމަށެވެ. އެ ވަށުގެ މީހުންނަށް އެ ރެނދުތައް ފާހަގަވާން ފެށީ 2021 ވަނަ އަހަރު ހިނގި ފެންބޮޑުވުމަށް ފަހުގަ އެވެ.
ފައްޅި ވެއްޓުމުން އެއްވެސް މީހަކަށް އަނިޔާއެއް ނުވެ އެވެ. އެ ހިސާބުގައި ދިރިއުޅޭ މީހުން އޭގެ އެއް ދުވަސް ކުރިން ވަގުތީ ހިޔާތަކަށް ބަދަލުވި އެވެ.
އޮފިޝަލުން ބުނީ 60 އަށް ވުރެ ގިނަ އާއިލާ ވަގުތީ ހިޔާތަކަށް ބަދަލުކޮށްފައިވާ ކަމަށާއި މަދުވެގެން 600 އާއިލާ ބަދަލުކުރަން ޖެހޭ ކަމަށެވެ.
އެ ސަރަހައްދުގެ ވީޑިއޯ އާއި ފޮޓޯތަކުން ފެންނަނީ މަގުމަތީގައި ވެސް ރެނދުލާފައިވާ މަންޒަރެވެ. އޮފިޝަލުން ބުނީ އެއީ ފެން ހިންދާ ނިޒާމުގެ މައްސަލައަކާ ހެދި ދިމާވަމުންދާ ކަމެއްގެ ގޮތުގައި ބެލެވޭ ކަމަށެވެ.
ފެން ހިންދާ ނިޒާމުގެ މައްސަލަ ދިމާވުމުން، ގެތަކުގެ އަޑިއަށް ފެން ވަދެ، ބިމުގެ ފަސްގަނޑު މާ ބޮޑަށް ތިރިވަމުންދާ ކަމަށް ޑިޒާޒްޓާ މެނޭޖްމަންޓް އޮފިޝަލުން ލަފާކުރެ އެވެ.
ޖޯޝިމަތު އަވަށުން ގެދޮރު ދޫކޮށް ނިކުންނަން ޖެހުނު މީހުންނަށް ސަރުކާރުގެ ފަރާތުން ކުރިއަަށް އޮތް ހަ މަސް ވަންދެން ކޮންމެ މަހަކު 50 ޑޮލަރު ފޯރުކޮށްދޭނެ އެވެ.
ބައެއް ތަޖުރިބާކާރުން ބުނާ ގޮތުގައި ރެނދުލާން ދިމާވެފައިވަނީ ބޮޑެތި ކޮންސްޓްރަކްޝަން މަސައްކަތާ ހެދި ކަމަށް ވުން އެކަށީގެންވެ އެވެ. އެހެންވެ، އެ ހުރިހާ މަސައްކަތެއް ވަނީ ހުއްޓާލައިފަ އެވެ.
