ރިޔާދް (ޖެނުއަރީ 5) - ސައުދީ އަރަބިއްޔާގެ ޕްރޯ ލީގުގައި މިރޭ އަލް ތާއީއާ ދެކޮޅަށް އަލް ނަސްރު ކުޅޭ މެޗުގައި އެ ޓީމާ އަލަށް ގުޅުނު ތަރި ކްރިސްޓިއާނޯ ރޮނާލްޑޯ ކުޅޭނެ ކަމަށް ގިނަ ބަޔަކު އުންމީދު ކުރިޔަސް، ސަސްޕެންޝަންގެ ސަބަބުން މިރޭގެ މެޗުގައި ރޮނާލްޑޯ ނުފެންނާނެއެވެ.
ދުނިޔޭގެ އެންމެ މުސާރަ ބޮޑު ކުޅުންތެރިޔާގެ ގޮތުގައި އަލް ނަސްރާ ގުޅުނު ރޮނާލްޑޯ، 37، ދެ މެޗުގެ ސަސްޕެންޝަނެއް އައީ އިނގިރޭސި ޕްރިމިއާ ލީގުގައި މިދިޔަ އަހަރުގެ އޭޕްރީލްް މަހު އެވަޓަން އަތުން މެންޗެސްޓާ ޔުނައިޓަޑް ބަލިވި މެޗުގައި ހިނގި އަހުލާގީ މައްސަލައަކާ ގުޅިގެންނެވެ.
އޭރު، ޔުނައިޓަޑްގައި ހުރި ރޮނާލްޑޯ އެ މެޗަށް ފަހު ޗޭންޖިން ރޫމަށް ވަންނަން ދަމުން، އަތުން ޖަހައި ކުޑަކުޖެއްގެ ފޯނު ހަލާކުކޮށްލި މައްސަލައިގަ އެވެ. މި މައްސަލަ ބެލުމަށް ފަހު އިނގިރޭސި އެފްއޭ އިން ވަނީ ރޮނާލްޑޯ ދެ މެޗަށް ސަސްޕެންޑްކޮށް، 50،000 ޕައުންޑުން ޖޫރިމަނާކޮށްފަ އެވެ. އެފްއޭ އިން ރޮނާލްޑޯ އަށް އަދަބު ދިންއިރު، ރޮނާލްޑޯ ވަނީ ޔުނައިޓެޑާ އެކު އޭނާ ހަދާފައިވާ ކޮންޓުރެކްޓް ބާތިލްކޮށްފައެވެ.
އެހެންކަމުން، ދެ މެޗުގެ ސަސްޕެންޝަން އޮތީ ތަންފީޒު ނުކުރެވިއެވެ. އެކަމަކު، އެހެން ގައުމެއްގެ ލީގެއްގައި ރޮނާލްޑޯ ކުޅުނަސް، އެ އަދަބު އޭނާ އަށް ހިނގާނެއެވެ.
އެހެންކަމުން މިރޭ އަލް ތާއީއާ ދެކޮޅަށް ކުޅޭ މެޗާއި މި މަހުގެ 14 ވަނަ ދުވަހު އަލް ޝަބާބްއާ ދެކޮޅަށް ކުޅޭ މެޗުގައި ރޮނާލްޑޯ އަކަށް ނުކުޅެވޭނެއެވެ.
އިންސާނީ ހައްގުތަކުގެ ވާހަކަ ރޮނާލްޑޯ ދައްކަންޖެހޭ: އެމްނެސްޓީ
އަލް ނަސްރުގެ ކުޅުންތެރިއެއްގެ ގޮތުގައި ރޮނާލްޑޯ އަންގާރަ ދުވަހުގެ ރޭ ތައާރަފްކުރިއިރު، ގިނަ އަދަދެއްގެ ސަޕޯޓަރުން ސްޓޭޑިއަމް އަށް ވަނެވެ. އަދި، ރޮނާލްޑޯ އެ ކްލަބާ ގުޅުމާ އެކު، ސައުދީ ލީގަށް ވަނީ ގިނަ ބައެއްގެ ސަމާލުކަން ހުއްޓިފަ އެވެ.
ބޮޑު އަގެއްގައި އަލް ނަސްރަަށް ބަދަލުވި ރޮނާލްޑޯ ވަނީ ސައުދީ އަރަބިއްޔާ އަށް ވަރަށް ބޮޑަށް ތައުރީފު ކޮށްފަ އެވެ.
އެކަމަކު، އިންސާނީ ހައްގުތަކަށް ވަކާލާތުކުރާ ޖަމިއްޔާއެއް ކަމަށްވާ އެމްނެސްޓީ އިންޓަނޭޝަނަލް އިން ވަނީ ސައުދީ އަރަބިއްޔާ އަށް ހަމައެކަނި ތައުރީފް ނުކޮށް، ސައުދީ އަރަބިއްޔާގައި ބޮޑު މައްސަލައަކަށް ވެފައިވާ އިންސާނީ ހައްގުތަކުގެ ވާހަކަތައް ވެސް ދެއްކުމަށް ރޮނާލްޑޯ އަށް ގޮވާލައިފަ އެވެ.
"ސައުދީ އަރަބިއްޔާ އަށް ސަނާ ކިއުމާ އެކު، އެ ގައުމުގައި އޮތް އިންސާނީ ހައްގުތަކުގެ ވާހަކަތައް ވެސް ރޮނާލްޑޯ ދައްކަންވާނެ،" އެމްނެސްޓީ މިޑިލް އީސްޓްގެ ރިސާޗަރު ޑާނާ އަހުމަދު ބުންޏެވެ.
މީގެ ކުރިން ސައުދީ އަރަބިއްޔާގެ އިންވެސްޓްމަންޓެއް މެދުވެރިކޮށް އިނގިރޭސި ޕްރިމިއާ ލީގުގެ ކްލަބް، ނިއުކާސަލް ޔުނައިޓެޑް ގަތްއިރު ވެސް އެމްނެސްޓީ އިންޓަނޭޝަަނަލުން ވަނީ އެ ޑީލް ހުއްޓުވަން ގިނަ ގޮތްގޮތުން ޕްރެޝަރުކޮށްފަ އެވެ.
ދެ ފަހަރެއްގެ މަތިން މަސައްކަތް ކުރައްވައި، ސައުދީގެ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ނިއުކާސަލް ގަތުމުގެ ޑީލް، ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ފުރިހަމަކުރީ 2021 ވަަނަ އަހަރުގެ އޮކްޓޫބަރު މަހުގެ ތެރޭގަ އެވެ. އެ ޑީލް ނިމުމާ އެކު އިންސާނީ ހައްގުތަކަށް ވަކާލާތު ކުރާ ބައިނަލްއަގުވާމީ ޖަމިއްޔާ، އެމްނެސްޓީ އިންޓަނޭޝަނަލް އިން ބުނީ މިއީ ނިއުކާސަލް، ނިވައި ފަތްގަނޑަކަށް ހަދައިގެން ސައުދީ އަރަބިއްޔާ އިން އިންސާނީ ހައްގުތަކާ ދެކޮޅަށް ހިންގާ ކަންކަން ފޮރުވަން ކުޅިވަރުގެ ތެރެއިން ކުރާ ކަމެއް ކަމަށް ބުނެފަ އެވެ.
