ސޯމާލިއާގެ މެދުތެރޭގައި އޮންނަ ހިރާން ޕްރޮވިންސްގައި ދިން ކާރު ބޮމުގެ ހަމަލާއެއްގައި އެއް އާއިލާއެއްގެ ނުވަ މީހުން މަރުވެއްޖެ އެވެ.
އެ ސަރަހައްދުގެ ޑެޕިއުޓީ ޕޮލިސް ކޮމިޝަނަރު ރޮއިޓާޒް ނޫހަަށް ވިދާޅުވީ އެ އާއިލާގެ ނުވަ މެމްބަރުންގެ އިތުރުން ވެސް 26 މީހުން މަރުވި ކަމަށެވެ.
ހަމަލާގެ ޒިންމާ އުފުލީ އަލް ގައިދާއާ ގުޅުން އޮންނަ އަލް ޝަބާބް ޓެރަރިސްޓު ގްރޫޕުންނެވެ.
މަހާސް އަވަށުގެ ޑިސްޓްރިކްޓު ކޮމިޝަނަރު ވިދާޅުވީ ހަމަލާގެ އަމާޒަކީ އޭނާގެ ގެޔާއި އެ ސަރަހައްދުގެ ޕާލަމެންޓް މެމްބަރެއްގެ ގެ ކަމަށެވެ.
ރިޕޯޓުތައް ބުނާ ގޮތުން ގޮވުމުގެ ބާރުގަދަކަމުން ބުރައިގެން ދިޔަ ތަކެތީގެ ސަބަބުން މާ ދުރު ހިސާބުތަކުގައި އުޅުނު މީހުންނަށް ވެސް އަނިޔާވި ކަމަށެވެ.
ސޯމާލިއާގެ ރައީސް ހަސަން ޝެއިހް މުހައްމަދު ވަނީ މިދިޔަ އޯގަސްޓު މަހު އަަލް ޝަބާބްއާ ދެކޮޅަށް ހަނގުރާމަ އިއުލާނު ކުރައްވައިފަ އެވެ.
އެއީ މޮގަދިޝޫގެ މަގްބޫލު ހޮޓަލަކަށް ހަމަލާ ދީ 20 މީހުން މަރާލި ހާދިސާއާ ގުޅިގެންނެވެ. އޭގެ ދެ މަސް ފަހުން މޮގަދިޝޫގައި ކާރޫބާރު ބޮޑު ހިސާބެއްގައި ކާރު ބޮން ގޮއްވާލައި 100 މީހުން މަރާލި އެވެ.
ޓެރަރިސްޓުންނާ ދެކޮޅަށް ސޯމާލިއާގެ ސިފައިންނާއި ސަރުކާރަށް ތާއީދު ކުރާ ހަތިޔާރު އެޅި ގްރޫޕުތައް ވެސް ވަނީ ނެރިފަ އެވެ. އަމާޒަކީ އަލް ޝަބާބުން ކޮންޓްރޯލް ކުރާ އަވަށްތައް އަނބުރާ ހޯދުމެވެ.
އަލް ޝަބާބްއަށް އަވަށްތަކުގެ ކޮންޓްރޯލް ގެއްލެމުން ދިޔަ ނަމަވެސް، ސޯމާލިއާގެ މެދުތެރެ އާއި ދެކުނުގައި ހަމަލާތައް ދިނުން މަދެއް ނުވެ އެވެ.
ޓެރަރިސްޓުން ހުއްޓުވަން ސޯމާލިއާ ސަރުކާރަށް އެހީވުމަށް އެމެރިކާއިން ފައިސާ ފޯރުކޮށްދޭ އިރު، އެފްރިކަން ޔޫނިއަންގެ ފައުޖުތައް ވެސް އެހީވެދެ އެވެ.
