ޗައިނާގައި ކޮވިޑްގެ ތަފާސްހިސާބު، ވަކިން ހާއްސަކޮށް ކޮވިޑް މަރުތަކުގެ ޑޭޓާ، ސައްހަ ގޮތެއްގައި ލިބެމުން ނުދާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ކޮވިޑް ކޮންޓްރޯލް ކުރަން ތަންފީޒު ކުރަމުން ދިޔަ ގިނަ ފިޔަވަޅުތައް ޗައިނާގައި އުވާލި މިދިޔަ މަހު އެވެ. އެއާ އެކު ކޭސްތައް ވަނީ ވަރަށް ބޮޑަށް އިތުރުވެފަ އެވެ.
އެހެން ނަމަވެސް ކޮވިޑާ ގުޅިން ހުރި ޑޭޓާ ދުވަހުން ދުވަހަށް އާއްމުކުރުން ޗައިނާއިން ވަނީ ހުއްޓާލައިފަ އެވެ. ޑިސެމްބަރު މަހުން ފެށިގެން އެ ބަލީގައި މަރުވީ އެންމެ 22 މީހުން ކަމަށް ޑޭޓާއިން ދައްކަ އެވެ.
"އަޅުގަނޑުމެން ގަބޫލުކުރާ ގޮތުގައި ޗައިނާގައި ކޮވިޑް މަރެއްގެ ގޮތުގައި މިހާރު ބަލައިގަންނަ މިންގަނޑު މާ ހަނި،" ޑަބްލިއުއެޗްއޯގެ އެމެޖެންސީޒް ޑިރެކްޓަރު ޑރ. މައިކަލް ރަޔަން ވިދާޅުވި އެވެ.
ރަޔަން ވިދާޅުވީ ކޮވިޑް މަރެއް ކަމަށް ބަލާ މިންގަނޑު ހަނިކުރުމުން، ސައްހަ އަދަދުތައް ނުފެންނަ ކަމަށެވެ. އެގޮތުން ހޮސްޕިޓަލުގައި އެޑްމިޓު ކުރުމާއި، އައިސީޔޫ ފަރުވާ އާއި މަރާ ގުޅުން ހުރި އަދަދުތައް ޗައިނާއިން ރިޕޯޓުކުރަނީ މާ މަދުން ކަމަށް އޭނާ ވިދާޅުވި އެވެ.
މިދިޔަ މަހު ޗައިނާއިން ގެނައި ބަދަލުގެ ދަށުން ކޮވިޑް މަރެއްގެ ގޮތުގައި ބަލަނީ ހަމައެކަނި ނޭވާލުމުގެ މައްސަލަ ދިމާވެ މަރުވާ މީހުންނެވެ. އެއީ ޑަބްލިއުއެޗްއޯގެ ލަފައާ ހިލާފު ބަދަލެކެވެ.
ޑަބްލިއުއެޗްއޯގެ ލަފަޔަކީ "އެކްސެސް" މަރުތައް ވެސް ގުނުމެވެ. އެއީ ބަލިމަޑުކަމުގެ ކުރިން އެވްރެޖުކޮށް މީހުން މަރުވި މިންވަރަށް ވުރެ އިތުރުވާ ހުރިހާ މަރެއް ކޮވިޑް މަރެއްގެ ގޮތުގައި ބެލުމަށެވެ.
ރަޔަން ވިދާޅުވި ޗައިނާއިން ޑަބްލިއުއެޗްއޯއާ އެކު މުއާމަލާތު ކުރުން އިތުރުކޮށްފައިވާ ކަމަށާއި ކުރިއަށް އޮތް ދުވަސްތަަކުގައި "ތަފްސީލީ ޑޭޓާ" ލިބޭނެ ކަމަށް އުއްމީދު ކުރައްވާ ކަމަށެވެ.
