ޔޫރޮޕްގެ ގިނަ ގައުމުތަކެއްގައި ޖެނުއަރީ މަހު އާއްމުކޮށް ހޫނު ނުވާ މިންވަރަށް މި އަހަރު ހޫނުވަމުންދާ ކަމަށް ދައްކައިފި އެވެ.
އަށް ގައުމެއްގައި އާ ރެކޯޑެއް ގާއިމްވެފައިވާ އިރު، އިތުރު ތިން ސަރަހައްދަކަށް ވެސް ރެކޯޑް މިންވަރަށް ހޫނުވަމުންދެ އެވެ.
ޕޮލޭންޑްގެ ވޯސޯގައި އާދީއްތަަ ދުވަހު ފިނިހޫނުމިން ހުރީ 18.9 ޑިގްރީ ސެލްސިއަސްގަ އެވެ. ސްޕެއިންގެ ބިލްބާއޯގައި ހުރީ 25.1 ޑިގްރީ ސެލްސިއަސްގަ އެވެ. އެއީ އާއްމުކޮށް ހުންނަ އެވްރެޖަށް ވުރެ 10 ޑިގްރީ ސެލްސިއަސް ހޫނެވެ.
ޔޫރޮޕަށް އާދަޔާާ ހިލާފަށް ހޫނުވާ އިރު، އުތުރު އެމެރިކާއަށް ދަނީ އާދަޔާ ހިލާފަށް ފިނިވަމުންނެވެ. ފިނީގެ ތޫފާނުގައި މިހާތަނަށް 60 އަށް ވުރެ ގިނަ މީހުން މަރުވެފައިވެ އެވެ.
ބޯކޮށް ސްނޯ ފޭބުމާއި ބޯކޮށް ވާރޭ ވެހޭނެ ކަމަށް އުތުރުގެ ހިސާބުތަކަށް ލަފާކޮށްފައިވާ އިރު، ޓެކްސަސް، އޮކްލަހޯމާ، އާކަންސާ އަދި ލުއިޒިއާނާއަށް ވިދާ ގުގުރައި، ނަގޫރޯޅި އަރާނެކަމަށް ލަފާކުރެވެ އެވެ.
އެއާ ހިލާފަށް ޔޫރޮޕްގައި އާއްމުކޮށް ފިނި މޫސުމުގައި ހޫނު ނުވާ މިންވަރަށް މި އަހަރު ދަނީ ހޫނުވަމުންނެވެ. އެގޮތުން ނެދަލޭންޑްސް، ލިޗްޓެންސްޓެއިން، ލިތުއޭނިއާ، ޗެކް ރިޕަބްލިކް، ޕޮލޭންޑް، ޑެންމާކް އަދި ބެލަަރޫސްގައި ރެކޯޑް މިންވަރަށް ހޫނުވި އެވެ.
ޖަރުމަނާއި ފްރާންސާއި ޔޫކްރެއިންގެ ބައެއް ހިސާބުތަަކަށް ވެސް ރެކޯޑް މިންވަރަށް ދަނީ ހޫނުވަމުންނެވެ.
ފިނިވުމާއި ހޫނުވުމުގެ ރެކޯޑްތައް ގާއިމްވުމަކީ އާއްމު ކަމެކެވެ. އެހެން ނަމަވެސް 10 ޑިގްރީ ސެލްސިއަސްގެ ތަފާތެއް ފެންނަނީ ވަރަށް މަދުންނެވެ.
ސްޕެއިންގެ ބިލްބާއޯގެ ފިނިހޫނުމިން މިހާރު ހުރީ އާއްމުކޮށް ޖުލައި މަހުގެ ތެރޭގައި ހުންނަަ ވަރަށެވެ. ސްވިޓްޒަލޭންޑްގައި ވެސް 20 ޑިގްރީ ސެލްސިއަސްއަށް ފިނިހޫނުމިން މަތިވެ، އެލްޕްސް ފަރުބަދަތަކުގެ ސްކީ ރިސޯޓުތަކަށް ސްނޯގެ ދަތިކަން ވަނީ ކުރިމަތިވެފަ އެވެ.
