ޗައިނާއިން ދަތުރުކުރާ މީހުންނާ މެދު ބައެއް ގައުމުތަކުން އަޅަން ނިންމީ ސިޔާސީ ފިޔަވަޅުތަކެއް ކަމަށް ޗައިނާ ސަރުކާރުން ތުހުމަތުކޮށްފި އެވެ.
ޗައިނާއިން ދަތުރުކުރާ މީހުން ކޮވިޑަށް ޓެސްޓު ކުރަން ޖެހޭނެ ކަމަށް ނިންމި ބައެއް ގައުމުތަކަކީ އެމެރިކާ، އިންޑިއާ އަދި އިނގިރޭސިވިލާތެވެ.
ޗައިނގައި ލުއިތައް ދިނުމުން ކޭސްތައް އިތުރުވެފައިވާ އިރު، ހުޅަނގުގެ ނޫސްތަކުން ބުނަނީ ކޭސްތަކުގެ އަސްލު އަދަަދު ހާމަނުކުރާ ކަމަށެވެ.
އެންމެ ފަހުން ޑިސެމްބަރު 24 ވަނަ ދުވަހު އާއްމުކުރި ތަފާސްހިސާބުން ދައްކާ ގޮތުގައި ކޮވިޑް ޖެހުނީ 5000 މީހުންނަށެވެ. އެކަމަކު އެނެލިސްޓުން ބުނީ ކޮންމެ ދުވަހަކު ވެސް ދެ މިލިއަން ކޭސް ފެންނަ ކަމަށެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވެސް ވަނީ "ރިއަލް ޓައިމް" ތަފާސްހިސާބް ފޯރުކޮށްދިނުމަށް ގޮވާލައިފަ އެވެ. ރައްދުގައި ޗައިނާ ފޮރިން މިނިސްޓްރީން ބުނީ މައުލޫމާތު ފޯރުކޮށްދޭ ގޮތް ރަނގަޅު ކުރާނެ ކަމަށެވެ.
އެހެން ނަމަވެސް ސަރުކާރުގެ ތަރުޖަމާނު މާއޯ ނިންގް ވިދާޅުވީ "ސިޔާސީ ބޭނުމަށް" މި ހާލަތުގެ ފައިދާ ނަގަން އުޅުން ކުށްވެރި ކުރާ ކަމަށެވެ.
މާޗް 20202 އިން ފެށިގެން ޗައިނާގެ ބޯޑަރު އޮތީ ބަންދުކޮށްފަ އެވެ. އެ ގައުމުގެ ބޯޑަރުތައް ރަސްމީކޮށް އަލުން ހުޅުވާލާނީ ޖެނުއަރީ އަށް ވަނަ ދުވަހު އެވެ.
