އިލެކްޓްރިކް ކާރު އުފައްދާ ޓެސްލާ ކުންފުނިން 2022 ވަނަ އަހަރު ރެކޯޑު އަދަދަކަށް އުޅަނދު ޑެލިވާކުރި ކަމަށް އެ ކުންފުނިން ބުނެފި އެވެ.
މިދިޔަ އަހަރު އެ ކުންފުނިން ޑެލިވާކުރީ 1.3 މިލިއަން އުޅަނދެވެ. އެއީ 2021 ވަނަ އަހަރު ޑެލިވާކުރި އުޅަނދަށް ވުރެ 40 ޕަސެންޓު އިތުރެވެ. މިދިޔަ އަހަރުގެ ފަހު ތިން މަހުގައި އެކަނިވެސް 405،000 އުޅަނދު ޑެލިވާކުރި އެވެ.
މި އަހަރު މޮޓޯ އިންޑަސްޓްރީގެ ޑިމާންޑު ދަށްވާނެ ކަމަށް ލަފާކުރެވެ އެވެ. އެއީ އިންޓްރެސްޓް މަތިވުމާއި އިގުތިސާދު މަޑުޖެހުމުގެ ބިރު އޮތުމުންނެވެ.
އިންވެސްޓަރުންނަށް ފޮނުވި މެސެޖެއްގައި ޓެސްލާއިން ބުނީ "ކޮވިޑާއި ސަޕްލައި ޗެއިނާ ގުޅުން ހުރި ބޮޑެތި ގޮންޖެހުންތަކެއް މުޅި 2022 ވަނަ އަހަރު ކުރިމަތިވި" ކަމަށެވެ.
ޓެސްލާއިން ރެކޯޑު އަދަދަށް އުޅަނދު ޑެލިވާކޮށްފައިވާ އިރު، އަންގާރަ ދުވަހު ދެކުނު ކޮރެއާއިން ވަނީ 2.2 މިލިއަން ޑޮލަރުން އެ ކުންފުނި ޖޫރިމަނާކުރަން ނިންމައިފަ އެވެ.
އެގޮތަށް ނިންމީ މާ ބޮޑަށް ފިނިގަދަވުމުން ޓެސްލާގެ އިލެކްޓްރިކް ކާރުތަކަށް ދަތުރުކުރެވޭ ރޭންޖު ކުޑަވާކަން ކަސްޓަމަރުންނަށް އަންގާފައި ނުވާތީ އެވެ.
ކޮރެއާ ފެއާ ޓްރޭޑް ކޮމިޝަނުން ބުނީ އުޅަނދުތައް އެއް ފަހަރު ޗާޖުކޮށްގެން ދަތުރުކުރެވޭ ރޭންޖު ނުވަތަ ދުރުމިން ކަސްޓަމަރުންނަށް އޮޅުވާލާފައިވާ ކަމަށެވެ.
އެކަމާ ގުޅޭ ގޮތުން ޓެސްލާއިން ވަކި އެއްޗެއް ނުބުނެ އެވެ.
މިދިޔަ އަހަރުގެ ފަހު ކުއާޓާގެ މާލީ ހިސާބުތައް ޓެސްލާއިން އާއްމުކުރަަން ވަނީ ތައްޔާރުވެފަ އެވެ. މުޅި 2022 ވަަނަ އަހަރުގެ ހިސާބުތައް އާއްމުކުރާނީ ޖެނުއަރީ 25 ގަ އެވެ.
