އިންޑިއާގެ ވެރިރަށް ނިއު ދިއްލީގައި ޖެނުއަރީ އެއް ވަނަ ދުވަހު ހިނގި މަގުމަތީގެ އެކްސިޑެންޓެއްގައި އުމުރުން 20 އަހަރުގެ އަންހެނަކު މަރުވި ގޮތާ މެދު ކަންބޮޑުވުން އުފެދިއްޖެ އެވެ.
ނޫސްތަކުން ރިޕޯޓު ކުރާ ގޮތުގައި މަރުވީ އިވެންޓް މެނޭޖަރެއްގެ ވަޒީފާގައި އުޅޭ އަންހެނެކެވެ. އޭނާގެ ސައިކަލު ކާރެއްގައި ޖެހުނީ މަސައްކަތަށް ފަހު ގެޔަށް ދިޔަ މަގުމަތީގަ އެވެ.
ފުލުހުން ބުނީ ކާރުގައި ޑްރައިވަރުގެ އިތުރުން ހަތަރު މީހުން ތިބި ކަމަށާއި އެކްސިޑެންޓުވުމުން ކާރު ނުހުއްޓައި، އަންހެން މީހާ ފުރޮޅު ދަށުކޮށްގެން އެތައް މޭލަކަށް ދުއްވި ކަމަށެވެ.
އަންހެން މީހާ ކާރުގެ ދަށުވެފައި އޮތް މަންޒަަރު ފެންނަ ގިނަ ސީސީޓީވީ ވީޑިއޯ ވަނީ އާއްމުވެފަ އެވެ.
އިންޑިއާގައި މަގުމަތީގެ އެކްސިޑެންޓުތައް ވަރަށް އާއްމެވެ. ކޮންމެ އަހަރަކު ވެސް އެތައް ހާސް މީހުން އެކްސިޑެންޓުތަކުގައި މަރުވެ އެވެ. އެކަމަކު މި ހާދިސާއަށް މުޅި ގައުމުގެ ސަމާލުކަން ވަނީ ލިބިފަ އެވެ.
އިންޑިއަން އެކްސްޕްރެސް ނޫހުން ބުނީ އަންހެން މީހާ ކާރުގެ ދަށުވެފައި އޮތް އިރު، ނުހުއްޓައި އެއް ގަޑިއިރު ވަންދެން އެ ކާރު ދަތުރުކުރި ކަމަށެވެ. މަންޒަރު ދުށް މީހުން ފަސް ފަހަރު ފުލުހުންނަށް ރިޕޯޓު ކުރި އެވެ.
ހާދިސާ ހިނގީ އާ އަހަރުގެ ފުރަތަމަ ދުވަހު އެވެ. އެއީ އެތައް ހާސް ފުލުހުން ދިއްލީގެ މަގުތައް ޕެޓްރޯލް ކުރަން އުޅެމުން ދިޔަ ދުވަހެކެވެ. އެހެންވެ، އެ ކާރު ނުހުއްޓުވުމުން ގިނަ ބަޔަކު ސުވާލު އުފައްދަ އެވެ. ކާރުގައި ތިބި ފަސް ފިރިހެނުން މިހާރު ތިބީ ފުލުހުންގެ ބަންދުގަ އެވެ.
އަވަސް ތަހުގީގެއް ހިންގަން ހޯމް މިނިސްޓްރީއިން ފުލުހުންނަށް އަމުރުކޮށްފަައިވާ އިރު، މަރުވި އަންހެން މީހާގެ އާއިލާއަަށް ވަނީ ބޮޑު ޝޮކެއް ލިބިފަ އެވެ.
"އަހަރެންގެ ދަރިފުޅަކީ ވަރަށް އުފާވެރި ކުއްޖެއް. އިންސްޓަގްރާމް ރީލްތައް ހެދުމަކީ އޭނާ ވަރަށް ކުރާހިތްވި ކަމެއް،" އޭނާގެ މަންމަ ބީބީސީއަށް ބުންޏެވެ.
އެ އަަންހެން މީހާއަކީ އެ އާއިލާގައި އާމްދަނީ ލިބޭ ހަމައެކަނި މެމްބަރެވެ. މީގެ އަހަރުތަކެއް ކުރިން ބައްޕަ މަރުވެފައިވާ އިރު، ބަލި ހާލަތާ ގުޅިގެން މަންމަ މަސައްކަތް ކުރުން ހުއްޓާލަން ޖެހުނެވެ.
"ޖަނާޒާގެ ކަންކަން ކުރާނެ ފައިސާއެއް ވެސް ނެތް،" އޭނާގެ މަންމަ ބުންޏެވެ.
އަންހެން މީހާ ފެނުނު އިރު ހަށިގަނޑުގައި އެއްވެސް އަންނައުނެއް ނެތެވެ. އެހެންވެ، އާއިލާއިން ތުހުމަތު ކުރަނީ ޖިންސީ އަނިޔާކޮށްފައިވާ ކަމަށެވެ. އެކަމަކު ފުލުހުން ބުނީ ޕޯސްޓް މޯޓަމް ރިޕޯޓުން އެކަހަލަ އެއްވެސް ކަމެއް ފާހަގަނުވާ ކަމަށެވެ.
ފުލުހުން ބުނީ ހާދިސާ ހިނގި އިރު ސައިކަލު ފަހަތުގައި އެހެން އަންހެނަކު ވެސް އިން ކަމަށާއި އެ މީހާ އެ ތަނުން ދުވެ ފިލީ ބިރުން ކަމަށެވެ. އޭނާ ދެނެގަނެ ތަހުގީގަށް އޭނާގެ އެއްބާރުލުން ލިބެމުންދާ ކަމަށް ފުލުހުން ބުންޏެވެ.
ފުލުހުންގެ ބަންދުގައި ތިބި ފަސް ފިރިހެނުން ބުނީ އެކްސިޑެންޓުވުމުން ކާރު ނުހުއްޓައި ދިޔައީ ހާސްވެގެން ކަމަށެވެ. އަންހެން މީހާގެ ހަޅޭކުގެ އަޑު ނީވުނީ ބާރަށް ލަވަ ޖަހާފައި ހުރުމުން ކަމަށް ވެސް ބުންޏެވެ. އެކަމަކު ބައެއް ރިޕޯޓުތައް ބުނާ ގޮތުން އެ މީހުން ތިބީ މަސްތުގެ ހާލަތުގަ އެވެ.
އެ ހާދިސާއަށް ފަހު ދިއްލީގައި ވެރިކަން ކުރާ އާއްމު އާދްމީ ޕާޓީ (އޭއޭޕީ) އިން ވަނީ ކަންބޮޑުވުން ފާޅުކޮށްފަ އެވެ. އެ ޕާޓީއިން ބުނީ ގައުމުގެ ވެރިރަށުގެ ސެކިއުރިޓީ ވަރަށް ދެރަ ކަމަށެވެ.
ދިއްލީގެ ޗީފް މިނިސްޓަރަކީ އޭއޭޕީގެ މެމްބަރެއް ނަމަވެސް ފުލުހުންގެ މައްޗަށް ޕާޓީގެ ބާރެއް ނުހިނގަ އެވެ. ފުލުހުން ކޮންޓްރޯލް ކުރަނީ ސީދާ ހޯމް މިނިސްޓްރީންނެވެ.
