ލަންޑަން (ޑިސެމްބަރު 31) - ބެންޗުން އަރައި މާކަސް ރެޝްފޯޑް ޖެހި ގޯލުން 1-0 އިން ވުލްްވްސް ބަލިކޮށް މެންޗެސްޓާ ޔުނައިޓެޑުން އިނގިރޭސި ޕްރިމިއާ ލީގުގެ ހަތަރު ވަނަ އަށް ޖެހިލައިފި އެވެ.
ޔުނައިޓެޑް ހަތަރު ވަނަ އަށް ޖެހިލީ 16 މެޗުން 32 ޕޮއިންޓް ހޯދައިގެންނެވެ. ކުރިން ހަތަރެއްގައި އޮތް ޓޮޓެންހަމް ހޮޓްސްޕާސް ފަސް ވަނައިގައި އޮތީ 16 މެޗުން 30 ޕޮއިންޓާ އެކު އެވެ. ހަ ވަނައިގައި އޮތީ ރޭ ލެސްޓާ ސިޓީ އަތުން މޮޅުވި ލިވަޕޫލް އެވެ. ލިވަޕޫލަށް ވަނީ 16 މެޗުން 28 ޕޮއިންޓް ލިބިފަ އެވެ.
ވުލްވްސް ދަނޑުގައި މިރޭ ކުޅުނު މެޗަށް ޔުނައިޓެޑުން ނެރުނު ފުރަތަމަ އެގާރައިގައި މި ވަގުތު ރަނގަޅު ފޯމެއްގައި ހުރި ރަޝްފޯޑް ނުހިމެނެ އެވެ. ޔުނައިޓެޑްގެ ކޯޗު އެރިކް ޓެން ހާގް ބުނީ އެއީ ކްލަބުން އަޅަން ޖެހުނު އިންޓާނަލް ޑިސިޕްލިނަރީ ފިޔަވަޅެއް ކަމަށެވެ.
ފުރަތަމަ ހާފުގައި ޔުނައިޓެޑްގެ އެންތަނީ މާޝިއަލް އަށް އޭރިއާތެރެއިން ގޯލު ޖަހަން ލިބުނު ފުރުސަތުގައި އޭނާ އަށް ބޮލުން ބޯޅަ ފޮނުވާނުލެވި ފުރުސަތު ގެއްލުނީ އެވެ. ދެ ވަނަ ހާފުގެ ކުރީކޮޅުގައި ޔުނައިޓެޑްގެ ގޯލަށް ނުރައްކާތެރި ހަމަލާއެއް ވުލްވްސް އިން ފޮނުވާލި އެވެ. އެ ޓީމުގެ ކެޕްޓަން ރުބެން ނެވޭސް ޖެހި ހިލޭ ޖެހުން ޔުނައިޓެޑްގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ.
ދެ ވަނަ ހާފުގައި ބަދަލަކަށް ނުކުތް ރަޝްފޯޑް ޔުނައިޓެޑްގެ ހަަމައެކަނި ގޯލު ޖެހީ މެޗުގެ 76 ވަނަ މިނިޓްގަ އެވެ. ޔުނައިޓެޑްގެ ބްރޫނޯ ފެނާންޑޭސް ދިން ބޯޅައެއް އޭރިއާތެރެއިން ކޮންޓްރޯލް ކުރުމަށް ފަހު ރަޝްފޯޑް ވަނީ ވުލްވްސް ކުޅުންތެރިއަކު ކައިރިން ނައްޓާފައި ގޯލަށް ފޮނުވާލައިފަ އެވެ.
އޭގެ ފަހުން، ރަޝްފޯޑް އިތުރު ގޯލެއް ޖެހި ނަމަވެސް އެ ބޯޅަ ގޯލަށް ވަނީ ރަޝްފޯޑް އަތުގައި ޖެހިފައި ކަމަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމުމުން ރެފްރީ ނިންމީ ގޯލު ބަލައިނުގަންނާށެވެ.
މެޗުގެ އިތުރު ވަގުުތުގައި ވުލްވްސްގެ މެކްސިކޯ ފޯވާޑް ރައުލް ހިމެނޭޒް ބޮލުން ޖެހި ބޯޅައެއް ކީޕަރު ޑެހެއާ ވަނީ ހުއްޓުވައިފަ އެވެ.
މި މޮޅާ އެކު ޔުނައިޓެޑުން 2022 ވަނަ އަހަރު ނިންމާލާފައިމިވަނީ އެންމެ ފަހުން ކުޅުނު ފަސް މެޗުން ވެސް މޮޅުވެގެންނެވެ. ޔުނައިޓެޑް އެންމެ ފަހުން ކުޅުނު 15 މެޗުގެ ތެރެއިން ބަލިވެފައިވަނީ އެންމެ މެޗަކުންނެވެ.
