ޗައިނާއިން ކޮވިޑާ ގުޅޭ ރިއަލް ޓައިމް ސައްހަ މައުލޫމާތު ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ގޮވާލައިފި އެވެ.
ކޮވިޑާ ގުޅިގެން އެޅި ގިނަ ފިޔަވަޅުތައް ޗައިނާގައި އުވާލުމާ އެކު، ކޭސްތަކުގެ އަދަދު ވަރަށް ބޮޑަށް އިތުރުވަމުންދާ ކަމަށް ރިޕޯޓުތައް ބުނެ އެވެ.
ޑަބްލިއުއެޗްއޯގެ އޮފިޝަލުން ބުނީ ޗައިނާގައި ކޮވިޑް ޖެހޭ މީހުން އެޑްމިޓު ކުރުމާއި އައިސީޔޫގައި ފަރުވާ ދޭން ޖެހުމާއި މަރުވާ އަދަދުތަކާ ގުޅޭ އިތުރު ޑޭޓާ ބޭނުންވާ ކަމަށެވެ.
އޭގެ އިތުރުން ޗައިނާގައި ކޮވިޑާ ދެކޮޅަށް ވެކްސިން ޖަހާފައިވާ މިންވަރާ ގުޅޭ ތަފާސްހިސާބު ވެސް މުހިއްމު ކަމަށް ޑަބްލިއުއެޗްއޯއިން ބުންޏެވެ.
ޖެނުއަރީ އަށް ވަނަ ދުވަހު ޗައިނާގެ ބޯޑަރު ހުޅުވާލަން ނިންމާފައިވާ އިރު، އެމެރިކާ، ސްޕެއިން، ފްރާންސް، ދެކުނު ކޮރެއާ، އިންޑިއާ، އިޓަލީ، ޖަޕާން އަދި ޓައިވާނުން ބުނީ ޗައިނާއިން ދަތުރުކުރާ މީހުން ކޮވިޑަށް ނެގެޓިވް ނަތީޖާ ހުށަހަޅަން ޖެހޭނެ ކަމަށެވެ.
ކޮވިޑް ވައިރަސް ބަދަލުވަަމުންދާ ގޮތާ ގުޅޭ ޑަބްލިއުއެޗްއޯގެ ޓެކްނިކަލް އެޑްވައިޒަރީ ގްރޫޕުގެ ބައްދަލުވުމެއް އަންގާރަ ދުވަހު އޮންނާނެ އެވެ. އެ ބައްދަލުވުމުގައި ޗައިނާގެ ސައިންސްވެރިން ބައިވެރިވެ ވައިރަލް ސީކުއެންސިންއާ ގުޅޭ ތަފްސީލް ހުށަހެޅުމަށް ދައުވަތު ދީފައިވެ އެވެ.
ޑަބްލިއުއެޗްއޯއިން ބުނީ ޗައިނާއިން ދަތުރު ކުރާ މީހުންނާ މެދު ގައުމުތަކުން ސަމާލުވެ ފިޔަވަޅުތައް އަޅަމުންދާ ސަބަބު ބަލައިގަންނަ ކަމަށެވެ.
ޗައިނާއިން ކުއްލިއަކަށް ފިޔަވަޅުތަކަށް ލުއިދިނީ މުޒާހަރާތައް އިތުރުވުމުން ނޮވެމްބަރު މަހުގެ ތެރޭގަ އެވެ. އޭގެ ކުރިން ޗައިނާއިން ތަންފީޒު ކުރި ޒީރޯ ކޮވިޑް ސިޔާސަތުގައި އެތައް މިލިއަން ބަޔަކު ގަވާއިދުން ލޮކްޑައުން ކުރަމުން ދިޔަ އެވެ.
ކުއްލިއަކަށް ލުއިދިނުމުން ކޭސްތައް އިތުރުވަމުންދާ އިރު، ޗައިނާ ސަރުކާރުން ބުނީ ދުވާލަކު 5000 ކޭސް ރިޕޯޓު ކުރާ ކަމަށެވެ. އެކަމަކު އެނެލިސްޓުން ބުނީ ހަގީގަތުގައި ދުވާލަކު އެއް މިލިއަން ކޭސް ފެނުން އެކަށީގެންވާ ކަމަށެވެ.
ރަސްމީ ތަފާސްހިސާބަށް ބަލާއިރު، މުޅި ޑިސެމްބަރު މަހު ޗައިނާގައި ކޮވިޑް ޖެހިގެން މަރުވީ 13 މީހުންނެވެ. އެހެން ނަމަވެސް، އިނގިރޭސިވިލާތުގެ ސިއްހީ ތަފާސްހިސާބު އެއްކުރާ އެއާފިނިޓީ ކުންފުނިން ބުނީ ދުވާލަކު 9000 މީހުން މަރުވަމުން ދިޔުން އެކަށީގެންވާ ކަމަށެވެ.
