ލަންޑަން (ޑިސެމްބަރު 28) - އިނގިރޭސި ޕްރިމިއާ ލީގުގައި މިރޭ ބޯންމައުތު އަތުން 2-0 އިން މޮޅުވެ، ޗެލްސީން ހަމަޖެހުމެއް ހޯދިއިރު، ނޮޓިންހަމް ފޮރެސްޓްގެ މައްޗަށް 3-0 އިން ކުރިހޯދައި މެންޗެސްޓާ ޔުނައިޓެޑުން ލީގުގެ ގަދަ ހަތަރަކާ ދިމާލަށް މިސްރާބު ޖަހައިފި އެވެ.
ޗެލްސީން މިރޭގެ މެޗަށް ނުކުތްއިރު، ލީގުގައި އެންމެ ފަހުން ކުޅުުނު ފަސް މެޗުން ވެސް މޮޅެއް ލިބިފައިނުވާއިރު، ޖެހިޖެހިގެން ތިން މެޗުން ވަނީ ބަލިވެފަ އެވެ. ޗެލްސީން ނުކުތީ 1998 ވަނަ އަހަރަަށް ފަހު ފުރަަތަމަ ފަހަރަށް ލީގުގައި ޖެހިޖެހިގެން ހަތަރު މެޗުން ބަލިނުވުމުގެ އަޒުމުގަ އެވެ.
ސްޓެމްފޯޑް ބްރިޖުގައި ކުޅުނު މިރޭގެ މެޗު ފަށައިގެން 16 ވަނަ މިނިޓްގައި ޗެލްސީ އަށް ލީޑުނަގައިދިނީ ކައި ހަވާޓްޒް އެވެ. މިއީ ރަހީމް ސްޓާލިން ނަގައިދިން ހުރަހަކަށް ހުސްކޮށް އަރައި، ހަވާޓްޒް ޖެހި ގޯލެކެވެ. މެޗުގެެ 24 ވަނަ މިނިޓްގައި ހަވާޓްޒް، ދިން ބޯޅައަކުން، ޗެލްސީގެ ލީޑުފުޅާކޮށްދިން ގޯލު ޖެހީ މޭސަން މައުންޓް އެވެ. މިއީ އޭރިއާބޭރުން ގޯލުގެ ތިރީ ކަނަށް ބޯޅަ ފޮނުވާލައިގެން މައުންޓް ޖެހި ގޯލެކެވެ.
ޗެލްސީން މި މެޗުގައި އިތުރު ގޯލު ޖަހަން ކުރި މަސައްކަތް ހުއްޓުވީ ބޯންމައުތުގެ ކީޕަރު، މާކް ޓްރެވާސް އެވެ. ޓްރެވާސް ވަނީ ޗެލްސީގެ ރީސް ޖޭމްސް، ސްޓާލިން އަދި މައުންޓް ފޮނުވާލި ބޯޅަތައް ހުއްޓުވައިފަ އެވެ. މި މެޗުގެ ދެ ވަނަ ހާފުގައި ޖޭމްސްގެ ކަކުލަށް އަނިޔާވެގެން ބަދަލުކުރި އެވެ. ޖޭމްސް އަށް މި ފަހަރުގެ ވޯލްޑް ކަޕްގެ ފުރުސަތު ގެއްލުނީ ވެސް ކަކުލަށް ލިބުނު އަނިޔާގެ ސަބަބުންނެވެ.
ބޯންމައުތަށް މުޅި މެޗުގައި ވެސް ޗެލްސީގެ ކީޕަރު ކެޕާ އަރިއްޒަބަލާގާ ހުރި ގޯލަށް ނުރައްކާތެރިކޮށް ފޮނުވާލެވުނީ މެޗުގެ ފަހު ކޮޅުގައި ޖައިޑަން އެންތަނީ ޖެހި ހިލޭ ޖެހުމެވެ. އެ ބޯޅަ ކެޕާ ވަނީ މަތަކޮށްފަ އެވެ.
ބޯންމައުތުގެ ކުކް (ވ) ކައިރިން ޗެލްސީގެ މައުންޓް ބޯޅަ ހޯދަން މަސައްކަތްކުރަނީ.
މި މޮޅާ އެކު ޗެލްސީ އޮތީ 15 މެޗުން 24 ޕޮއިންޓާ އެކު އަށް ވަނައިގަ އެވެ. ހަމަ އެ އަދަދަށް މެޗު ކުޅެގެން ޕޮއިންޓް ވެސް އެވަރަށް ހޯދައިގެން ހަތް ވަނައިގައި އޮތީ ބްރައިޓަން އެވެ. ހަ ވަނައިގައި އޮތީ 15 މެޗުން 25 ޕޮއިންޓް ހޯދާފައިވާ ލިވަޕޫލް އެވެ. މިރޭގެ މޮޅާ އެކު ޔުނައިޓެޑް ފަސް ވަނައިގައި އޮތީ 15 މެޗުން 29 ޕޮއިންޓާ އެކު އެވެ. ހަތަރެއްގައި އޮތް ޓޮޓެންހަމަށް 16 މެޗުން ލިބިފައިވަނީ 30 ޕޮއިންޓެވެ.
ޔުނައިޓެޑުން މިރޭ ލީޑުނެގީ 19 ވަނަ މިނިޓްގައި މާކަސް ރަޝްފޯޑް ޖެހި ގޯލުންނެވެ. މިއީ ކޯނަރެއްގައި ކްރިސްޓިއަން އެރިކްސަން ތިރިތިރިން ނެގި ބޯޅައަކުން އެއް ފަހަރުން ގޯލުގެ މަތީ ދާގަނޑަށް ބޯޅަ ފޮނުވާލައިގެން ރަޝްފޯޑް ޖެހި ގޯލެކެވެ. އެ ގޯލު ޖެހިތާ ތިން މިނިޓް ފަހުން، ރަޝްފޯޑް ދިން ބޯޅައަކުން އެންތަނީ މާޝިއަލް ޔުނައިޓެޑްގެ ދެ ވަނަ ގޯލު ޖެހި އެވެ. އޭރިއާ ރޮނގުކައިރިން މާޝިއަލް ފޮނުވާލި ބޯޅަ ގޯލަށް ވަނީ ނޮޓިންހަމް ފޮރެސްޓްގެ ކީޕަރު، ވޭން ހެނެސީ އަތުގައި ޖެހިފަ އެވެ.
ފުރަތަމަ ހާފުގެ އިތުރު ވަގުތުގައި ނޮޓިންހަމްގެ ވިލީ ބޮލީ ފައިގައި ޖެހިފައި ވަން ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ވަނީ ގޯލެއް ނޫން ކަމަށް ނިންމައިފަ އެވެ.
ދެ ވަަނަ ހާފުގައި ޔުނައިޓެޑުން އިތުރު ލަނޑެއް ޖެހޭތޯ ކުރި މަސައްކަތް ކާމިޔާބުވީ މެޗުގެ 87 ވަނަ މިނިޓްގަ އެވެ، މި ލަނޑު ޖެހީ ބަދަލަކަށް ކުޅެން އެރި ފްރެޑް އެވެ. މިއީ ކަސެމީރޯ ހުސްކޮށްލާފައި އޭރިއާތެރެއިން ދިން ބޯޅައަކުން ފްރެޑް ޖެހި ގޯލެކެވެ.
މި ނަތީޖާއާ އެކު ޔުނައިޓެޑުން މި ވަނީ އަހަރެއްގެ ތެރޭގައި ފުރަތަމަ ފަހަރަށް ލީގުގައި އަމިއްލަ ދަނޑުގައި ޖެހިޖެހިގެން ތިން މެޗުން މޮޅުވެފަ އެވެ.
ލީގު ތާވަލުގެ 19 ވަނައިގައި އޮތް ނޮޓިންހަަމަށް، ލީގުގައި އެންމެ ފަހުން ރަށުންބޭރުގައި ކުޅުނު ހަ މެޗުގައި ވެސް ގޯލެއް ނުޖެހެ އެވެ. މިއީ 1970 ވަނަ އަހަރުގެ ފަހުން، ނޮޓިންހަމަށް ރަށުންބޭރުގައި ގޯލެއް ނުޖެހި ލީގުގެ ހަ މެޗެއް ފުރިހަމަ ކުރަން ޖެހުނު ފުރަތަމަ ފަހަަރެވެ.
