ހޯމަ ދުވަހު ބޯޑަރު ހުރަސްކޮށް ދެކުނު ކޮރެއާގެ ސަރަހައްދަށް އެތެރެވި "ދުޝްމަނުންގެ" ޑްރޯންތައް ވައްޓާލުމުގައި ފެއިލްވުމުން، ދެކުނު ކޮރެއާގެ ސިފައިން މައާފަށް އެދެފި އެވެ.
އުތުރު ކޮރެއާގެ ފަސް ޑްރޯން ދެކުނު ކޮރެއާގެ ސަރަހައްދުގައި އުޅުނު އިރު، އޭގެ ތެރެއިން އެކަތި ވެރިރަށް ސޯލްއާ ވެސް ވަރަށް ބޮޑަށް ގާތްވި އެވެ.
ދެކުނު ކޮރެއާގެ ސިފައިން އިންޒާރު ދިނުމަށް ބަޑި ޖެހި އެވެ. އޭގެ ފަހުން ޑްރޯންތައް ވައްޓާލުމަށް ޖެޓުތަކާއި ހެލިކޮޕްޓަރުތައް ފޮނުވި އެވެ. އެކަމަކު އެއްވެސް ޑްރޯންއެއް ވެއްޓޭ ގޮތެއް ނުވި އެވެ.
ރިޕޯޓުތައް ބުނާ ގޮތުން ޑްރޯންތައް ވައްޓާލަން ފަސް ގަޑިއިރު ވަންދެން މަސައްކަަތް ކުރި އެވެ. އެހެން ނަމަވެސް، އެ ތަކެތި ވަނީ އެނބުރި އުތުރު ކޮރެއާއަށް ގޮސްފަ އެވެ.
ދެކުނު ކޮރެއާގެ ރައީސް ވިދާޅުވީ އެ ހާދިސާއިން އަންގައިދެނީ ގައުމުގެ ސިފައިން ތައްޔާރީ ހާލަތުގައި ތިބެން ޖެހޭ އިރު އެކަން ހާސިލްކުރުމުގައި ވަރަށް ބޮޑަށް ފެއިލްވާ މަންޒަރު ކަމަށެވެ.
އެކަމާ ގުޅިގެން ސިފައިން މައާފަށް އެދި ބުނީ ދުޝްމަނުންގެ ޑްރޯންތައް ދުރުން ދެނެގަނެ ވައްޓާލުމުގެ މަސައްކަތް ކުރެވޭ ފަދަ އާލާތްތައް ހޯދައި މަސައްކަތް ހަރުދަނާ ކުރާނެ ކަމަށެވެ.
އުތުރު ކޮރެއާގެ ޑްރޯންތަކެއް ދެކުނު ކޮރެއާގެ ސަރަހައްދަށް ވަދެފައިވާ އިރު، މި އަހަރު އުތުރު ކޮރެއާއިން ރެކޯޑު އަދަދަށް ހަތިޔާރު ޓެސްޓުކޮށް ދެ ކޮރެއާގެ މަޝްރަހު އޮތީ ވަރަށް ނުތަނަވަސްވެފަ އެވެ.
އެންމެ ފަހުން އުތުރު ކޮރެއާގެ ޑްރޯންއެއް ބޯޑަރު ހުރަސްކޮށް ދެކުނު ކޮރެއާއަށް އެތެރެވީ މީގެ ފަސް އަހަރު ކުރިން ޖޫން 2017 ގަ އެވެ.
ޑްރޯންތައް ބޭނުންކޮށްގެން ޖާސޫސްކޮށް، ހަމަލާދެވޭނެތީ ދެކުނު ކޮރެއާއިން ވަރަށް ބޮޑަަށް ކަންބޮޑުވެ އެވެ.
