ރަޝިއާގެ މަހުޖަނު ޕަވެލް އެންޓޯވް އުފަން ދުވަސް ފާހަގަކުރަން އިންޑިއާގެ ހޮޓަލެއްގައި އުޅެނިކޮށް ޝައްކު އުފެދޭ ގޮތަކަށް މަރުވެއްޖެ އެވެ.
އެ ދަތުރުގައި އެންޓޯވްގެ އެކުވެރިޔަކު ވެސް މީގެ ދެ ދުވަސް ކުރިން ކުއްލި ގޮތަކަށް މަރުވި އެވެ. އެ މީހުން ތިބީ އިންޑިއާގެ އިރުމަތީގެ އޮޑިއްޝާ ސްޓޭޓުގަ އެވެ.
މިލިއަނަރު އެންޓޯވްއަކީ ރަޝިއާގެ ވެރިރަށް މޮސްކޯގެ އިރުން އޮންނަ ވްލެޑިމިއާ ސިޓީގައި މަގްބޫލު މީހެކެވެ. އޭނާއަކީ ސިޔާސީ ކަންކަމުގައި ވެސް އުޅޭ މީހެކެވެ.
ރަޝިއާއިން ޔޫކްރެއިންގައި ކުރާ ހަނގުރާމައަށް އެންޓޯވް ފާޑުކިޔާ ކަމަށް، އޭނާގެ ވަޓްސްއެޕް އެކައުންޓުން މެސެޖެއް އާއްމުވުމުން، މި އަހަރުގެ ކުރީކޮޅު އޭނާ އެކަން ދޮގުކުރި އެވެ.
ފަހަކަށް އައިސް ރަޝިއާގެ ބޮޑެތި މަހުޖަނުން ކުއްލިއަކަށް ޝައްކު ކުރެވޭ ގޮތް ގޮތަށް މަރުވުން އިތުރުވެފައިވެ އެވެ. އޭގެ ތެރެއިން ގިނަ މީހުންނަކީ ހަނގުރާމައަށް ފާޑުކީ މީހުންނެވެ.
ރަޝިއާގެ ނޫސްތަކުން ބުނީ އުމުރުން 65 އަހަރުގެ އެންޓޯވް މަރުވީ އާދީއްތަ ދުވަަހު ރަޔަގަޑާ ސިޓީގައި ހުންނަ ހޮޓަލުގެ ކުޑަދޮރުން ވެއްޓިގެން ކަމަށެވެ. ހުކުރު ދުވަހު ހަމަ އެ ހޮޓަލުގައި މަރުވީ އޭނާގެ ވްލެޑިމިއާ ބުޑަނޯވް ގްރޫޕުގެ އެހެން މެމްބަރެކެވެ.
އޮޑިއްޝާ ފުލުހުން ބުނީ އެންމެ ފުރަތަމަ ބުޑަނޯވް މަރުވީ ސްޓްރޯކެއް ޖެހިގެން ކަމަށާއި އެންޓޯވް މަރުވީ އެކަމުގެ ހިތާމައިގައި ޑިޕްރެސްވެގެން ކަމަށެވެ.
ކޮލްކަޓާގައި ހުންނަ ރަޝިއާގެ ކޮންސުލް އެލެކްސެއި އިޑަމްކިން ޓަސް ނިއުސް އެޖެންސީއަށް ވިދާޅުވީ އެކަމުގައި ޖިނާއީ ތުހުމަތެއް ނުކުރެވޭ ކަމަށެވެ.
ޕަވޭލް އެންޓޯވްއަކީ ސޮސެޖް އުފައްދާ "ވްލެޑިމިއާ ސްޓޭންޑާޑް" އުފެއްދި މީހާ އެވެ. ފޯބްސްއިން 2019 ވަނަ އަހަރު ބުނީ އޭނާގެ މުއްސަނދިކަމުގެ އަގު 140 މިލިއަން ޑޮލަރަށް އަރާނެ ކަމަށެވެ.
