އިންޑިއާގެ ހުޅަނގު ގުޖަރާތު ސްޓޭޓުގައި ސިފައިންގެ މީހަކަށް އަނިޔާކޮށް މަރާލި މައްސަލައިގަައި ހަތް މީހުން ހައްޔަރުކޮށްފި އެވެ.
މެލާޖީ ވަގޭލާއަށް ބަޔަކު ހަމަލާދިނީ އޭނާގެ އަންހެން ދަރިފުޅުގެ ވީޑިއޯއެއް ސޯޝަލް މީޑިއާގައި އާއްމު ކުރުމުން އެކަމާ ހިތްހަމަނުޖެހުން ފާޅުކުރުމުންނެވެ.
އޭނާ ހިތްހަމަނުޖެހިގެން ފުލުހުންނަށް ހުށަހެޅި މައްސަލައިގައި ބުނީ ވީޑިއޯ އަޕްލޯޑް ކުރުމުން ވައިރަލްވެފައިވާ ކަމަށެވެ.
ވަގޭލާއަށް ހަމަލާދިނީ އެ ވީޑިއޯ އަޕްލޯޑްކުރި ކަމަށް އޭނާ ތުހުމަތު ކުރާ ފިރިހެން ކުއްޖެއްގެ އާއިލާ މެމްބަރުންނެވެ.
އެ ހަމަލާގައި އޭނާގެ އަންހެނުންނާއި ފިރިހެން ދަރިފުޅަށް ވެސް އަނިޔާވި އެވެ. ވަގޭލާއަކީ އިންޑިއާގެ ބޯޑަރު ސެކިއުރިޓީ ފައުޖުގެ ސިފައިންގެ މީހެކެވެ.
ވަގޭލާގެ އަންހެނުން ފުލުހުންނަށް ހުށަހެޅި މައްސަލައިގައި ބުނީ ހަމަލާ ދިނީ ހޮނިހިރު ދުވަހުގެ ރޭ ގުޖަރާތުގެ ހޭދާ ޑިސްޓްރިކްޓުގައި ކަމަށެވެ.
ވީޑިއޯއާ ގުޅިގެން ހިތްހަމަނުޖެހިގެން ވަގޭލާ އާއި އޭނާގެ އަންހެނުން އަދި ދެ ފިރިހެން ދަރިންނާއި ތިމާގެ އިތުރު ކުއްޖަކު، ތުހުމަތު ކުރެވޭ ފިރިހެން ކުއްޖާގެ ގެ ކައިރިއަށް ދިޔަ އެވެ.
އިންޑިއާގެ ނޫސްތަކުން ބުނީ އެ ފިރިހެން ކުއްޖާ އަޕްލޯޑް ކުރި ކަމަށް ބުނާ ވީޑިއޯގައި ފެންނަނީ އިޖުތިމާއީ މިންގަނޑުތަކާ ހިލާފު މަންޒަރުތަކެއް ކަމަށެވެ.
އެ ގެ ކައިރިއަށް ގޮސް ޒުވާބުކޮށް ހަމަނުޖެހުން ހިނގަން ފަށައި، ފިރިހެން ކުއްޖާގެ އާއިލާ މެމްބަރުން ވަގޭލާއަށް ހަމަލާދިނީ ލަކުޑި އާއި ތޫނު ހަތިޔާރުން ކަމަށްވެ އެވެ.
ވަގޭލާއަށް ލިބުނު ސީރިއަސް ޒަހަމްތަކުގައި ވަގުތުން މަރުވީ އެވެ. އޭނާގެ ފިރިހެން ދަރިއެއްގެ ބޮލަށް ޒަހަމްތަކެއް ލިބި، މިހާރު ދަނީ ހޮސްޕިޓަލުގައި ފަރުވާދެމުންނެވެ.
ވަގޭލާގެ މަރުގެ ތުހުމަތުގައި ހަތް މީހުންނާ ދެކޮޅަށް ފުލުހުން ދަނީ ތަހުގީގު ހިންގަމުންނެވެ.
