ޗައިނާގެ ބޯޑަރުތައް އަންނަ މަހު ހުޅުވާލާނެކަން އިއުލާނު ކުރުމާ އެކު އެހެން ގައުމުތަކަށް ދަތުރު ކުރުމަށް ޓިކެޓު ގަންނަން އާއްމުން އަވަސްވެގަނެއްޖެ އެވެ.
އިމިގްރޭޝަން އިދާރާއިން ބުނީ ގައުމުން ބޭރަށް ދަތުރުކުރަން ބޭނުންވާ ޗައިނާ ރައްޔިތުންގެ ޕާސްޕޯޓް ހެއްދުމުގެ މަސައްކަތް ޖެނުއަރީ އަށަކުން ފެށިގެން އަލުން ހުޅުވާލާނެ ކަމަށެވެ.
މިދިޔަ ހޯމަ ދުވަހު ޗައިނާއިން ވަނީ އެ ގައުމަށް އެތެރެވާ މީހުން ކަރަންޓީނު ވާން ޖެހޭ ގޮތަށް ތަންފީޒު ކުރަމުން ދިޔަ ސިޔާސަތު ވެސް އުވާލައިފަ އެވެ.
އޭގެ ފަހުން، ގިނަ ޓްރެވަލް ސައިޓުތަކަށް ޓްރެފިކް ބާރު ބޮޑުވާން ފެށި އެވެ. އެހެން ނަމަވެސް، ޗައިނާގެ ފަތުރުވެރިންނަށް ބައެއް ގައުމުތަކަށް ދިޔުމުގައި ހުރަސްތަކާ ދިމާވާނެ އެވެ.
ޗައިނާ ފަތުރުވެރިންގެ މެދުގައި އެންމެ މަގްބޫލު އެއް މަންޒިލުކަމުގައިވާ ޖަޕާނުން ބުނީ ޗައިނާއިން އެތެރެވާ މީހުން ކޮވިޑަށް ނެގެޓިވް ނަތީޖާ ހުށަހަޅަން ޖެހޭނެ ކަމަށެވެ. ނަތީޖާ ނުގެންނަ މީހުން ހަފުތާއެއް ވަންދެން ކަރަންޓީނު ކުރަން ޖެހޭނެ އެވެ.
އިންޑިއާއިން ވެސް ބުނީ ޗައިނާއިން އެތެރެވާ މީހުންގެ ނެގެޓިވް ނަތީޖާ ހުށަހަޅަން ވާނެ ކަމަށެވެ.
ޗައިނާއިން ކޮވިޑާ ގުޅިގެން އެޅި ހުރިހާ ފިޔަވަޅުތަކެއް އުވާލަމުންދާ އިރު، މި ވަގުތު އެ ގައުމުގައި ކޭސްތައް ދަނީ ވަރަށް ބޮޑަށް އިތުރުވަމުންނެވެ.
