"ސުލްހައިގެ ފޯމިއުލާ" ތަަންފީޒް ކުރުމަށް އިންޑިއާގެ އެހީތެރިކަމަށް އެދިފައިވާނެ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ޒެލެންސްކީ ވިދާޅުވީ އިންޑިއާގެ ބޮޑު ވަޒީރު ނަރެންދްރަ މޯދީއާ ފޯނުން މަޝްވަރާ ކުރެއްވި ކަމަށާއި "ސުލްހައިގެ ފޯމިއުލާ" ތަންފީޒު ކުރުމުގައި އިންޑިއާގެ ބައިވެރިވުން ލިބޭނެ ކަމަށް އުއްމީދު ކުރައްވ ކަމަށެވެ.
ސުލްހަ ގެނައުމާ ގުޅޭ ގޮތުން ޒެލެންސްކީ މަޝްވަރާ ކުރެއްވި އިރު، ހޯމަ ދުވަހު އެ ގައުމުން ގޮވާލީ އދ. ގެ މެމްބަރުކަމުން ރަޝިއާ ވަކިކުރުމަށެވެ.
ރަޝިއާއަކީ އދ. ގެ ސަލާމަތީ މަޖިލީހުގެ ދާއިމީ މެމްބަރެކެވެ. އެހެންކަމުން އެ ގައުމާ ދެކޮޅަށް ނިންމާާ ހުރިހާ ގަރާރެއް ވީޓޯ ކުރުމުގެ ބާރު ރަޝިއާއަށް އެބަ އޮތެވެ.
"ޔޫކްރެއިނުން އދ. ގެ މެމްބަަރު ގައުމުތަކަށް މި ގޮވާލަނީ އދ. ގެ ސަލާމަތީ މަޖިލީހުގެ ދާއިމީ މެމްބަރުކަމުން ރަޝިއާ ވަކިކޮށް، އދ. ގެ އާއްމު މެމްބަރުކަމުން ވެސް ވަކިކުރަން،" ޔޫކްރެއިން ފޮރިން މިނިސްޓްރީގެ ބަޔާނެއްގައި ބުންޏެވެ.
އެ ބަޔާނުގައި ބުނީ 1991 ވަނަ އަަހަރު ސޯވިއެޓް ޔޫނިއަން ރޫޅިފައިވާ ކަމަށާއި އދ. ގެ ސަލާމަތީ މަޖިލީހުގެ ދާއިމީ މެމްބަރުކަން އޮތީ ސޯވިއެޓް ޔޫނިއަންއަށް ކަމަށެވެ.
އެހެންކަމުން، މިހާރު ރަޝިއާއިން ސޯވިއެޓް ޔޫނިއަންގެ ގޮނޑި ހިފަހައްޓައިގެން އުޅެނީ ގާނޫނާ ހިލާފަށް ކަމަށް ޔޫކްރެއިނުން ގަބޫލުކުރެ އެވެ.
