ޓައިވާން ކައިރިން ކަނޑާއި ވައިގެ ބޮޑު އަސްކަރީ އޮޕަރޭޝަނެއް ޗައިނާއިން ހިންގަމުންދާ ކަމަށް ޓައިވާންގެ ޑިފެންސް މިނިސްޓްރީން ބުނެފި އެވެ.
އެ މިނިސްޓްރީން ބުނީ ޗައިނާގެ ވައިގެ ފައުޖުގެ 71 އުޅަނދު ޓައިވާންގެ ޑިފެންސް އައިޑެންޓިފިކޭޝަން ޒޯނަށް އެތެރެވި ކަމަށެވެ. އޭގެ ތެރޭގައި ޑްރޯން އާއި ހަނގުރާމަ މަތީ ޖެޓުތައް ހިމެނެ އެވެ.
ޓައިވާނުގައި އަމިއްލަ ވެރިކަމެއް އޮތް ނަމަވެސް ޗައިނާއިން ދެކެނީ އެއީ އެ ގައުމާ ވަކިވެގެން އުޅޭ ޕްރޮވިންސެއް ކަމަށެވެ.
މި އަހަރުގެ ތެރޭގައި އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީ ޓައިވާނަށް ދަތުރު ކުރެއްވުމުން މަޝްރަހު ގޯސްވި އެވެ.
އެ ދަތުރާ ދިމާކޮށް، މިދިޔަ އޯގަސްޓު މަހު ޗައިނާއިން ބޮޑު އޮޕަރޭޝަނެއް ހިންގި އެވެ. ޕެލޯސީއަކީ ފާއިތުވި 25 އަހަރުގެ ތެރޭގައި ޓައިވާނަށް ވަޑައިގެންނެވި އެމެރިކާގެ އެންމެ އިސް އޮފިޝަލެވެ.
ހޯމަ ދުވަަހު ބޭއްވި އަސްކަަރީ އޮޕަރޭޝަނާ ގުޅޭ ގޮތުން ޗައިނާއިން ބުނީ މައްސަލަ ގޯސްކުރަނީ އެމެރިކާ އާއި ޓައިވާނުން ކަމަށާއި ކުރިއަށް ގެންދަނީ ތަަމްރީނެއް ކަމަށެވެ.
