އުރުދުން އާއި އިރާގު ގުޅޭ ބޯޑަރު ކައިރިން އެއް ޓަނުގެ އެމްފެޓަމައިން ގުޅަ، ކަދުރު ޕޭސްޓުގެ ތެރޭގައި ފޮރުވައިގެން އުރުދުންއަށް އެތެރެ ކުރަން އުޅެނިކޮށް ހިފަހައްޓައިފި އެވެ.
ކެޕްޓެގަންގެ ނަމުން މަގްބޫލުވެފައިވާ މަސްތުވާ ބޭހުގެ ހަ މިލިއަން ގުޅަ އޭގެ ތެރޭގައި ހިމެނެ އެވެ. އެ ތަކެތި ހުރީ ދެ ލޮރީތެރޭގަ އެވެ.
އުރުދުންގެ ކަސްޓަމްސް ޑިޕާޓްމަންޓުން ބުނީ މިއީ މިހާތަނަށް ހިފެހެއްޓި ކެޕްޓެގަންގެ އެންމެ ބޮޑު އެއް ޝިޕްމަންޓަށް ވާނެ ކަމަށެވެ.
ކެޕްޓެގަން ގިނަ އަދަދަކަށް އުފައްދަނީ ހަނގުރާމައިގައި ސުންނާފަތިވެފައިވާ ސީރިއާގަ އެވެ. "ފަގީރުންގެ ކޮކެއިން"ގެ ގޮތުގައި މަގްބޫލު އެ މަސްތުވާތަކެތި އެންމެ ގިނައިން ފޮނުވަނީ މެދުއިރުމަތީގެ ގައުމުތަކަށެވެ.
ސީރިއާގައި ކެޕްޓެގަން އުފެއްދުމާއި ތަންތަން ފޮނުވުމުގައި އެ ގައުމުގެ ބޮޑެތި ވިޔަފާރިވެރިންނާއި އަސްކަރީ އޮފިޝަލުންގެ ބައިވެރިވުން އޮންނަ ކަމަަށް ތުހުމަތު ކުރެވެ އެވެ. އެކަމަކު ސީރިއާއިން އެކަން ދޮގުކުރެ އެވެ.
އުރުދުންގެ ސިފައިންނާއި މަސްތުވާތަކެތި ޓްރެފިކް ކުރާ މީހުންނާ ދެމެދު ހަމަނުޖެހުންތައް ހިނގުން މިހާރު ދަނީ އިތުރުވަމުންނެވެ. އެއް ޓަނުގެ ކެޕްޓެގަން ހިފަހެއްޓި ނަމަވެސް، ހައްޔަރު ކުރީ ކިތައް މީހުން ކަމެއް ސާފެއް ނޫނެވެ.
