ބެއިޖިން، ޗައިނާ (ޑިސެމްބަރު 25) - ޗައިނާގެ ޝިންޖިއާންގް ސަރަހައްދުގައި ރަން ނަގާ މައިނެއްގެ ތެރޭގައި 18 މީހުން ތާށިވެއްޖެ އެވެ.
ޝިންޖިއާންގްގެ ޔިނިންގް ކައުންޓީގެ މައިނުން ބައެއް ވެއްޓި، ބޭރަށް ނިކުންނަން އޮތް މަގު ބަންދުވި އިރު، އެ ތަނުގެ ތެރޭގައި 40 މީހުން މަސައްކަތް ކުރަމުން ދިޔަ އެވެ.
ހޮނިހިރު ދުވަހުގެ މެންދުރު އެ ހާދިސާ ހިނގީ ކަޒަކިސްތާނުގެ ބޯޑަރާ 100 ކިލޯމީޓަރުން ދުރުން އޮންނަ ބިމުއަޑީގެ މައިނެއްގަ އެވެ.
މައިނުގެ ތެރޭގައި ތިބި މީހުންގެ ތެރެއިން 22 މީހުން ސަލާމަތް ކުރެވުނު އިރު، 18 މީހުން އަދިވެސް ތިބީ ތާށިވެފަ އެވެ.
ޝިންހުއާ ނިއުސް އެޖެންސީއިން ބުނީ ތާށިވެފައި ތިބި މީހުން ސަލާމަތް ކުރަން ބޮޑު ރެސްކިއު އޮޕަރޭޝަނެއް ހިންގަމުންދާ ކަމަށެވެ.
މަައިނުތަކުގެ ރައްކާތެރިކަން ކަށަަވަރު ކުރުމަށް މިހާރު ގިނަ ފިޔަވަޅުތަކެއް އަޅަމުން ދިޔަ ނަމަވެސް، އަދިވެސް ދޭތެރެ ދޭތެރެއިން މިފަދަ ހާދިސާތައް ހިނގަ އެވެ.
އެގޮތުން މިދިޔަ އަހަރުގެ ސެޕްޓެމްބަަރު މަހުން ގިންގްހައި ޕްރޮވިންސްގެ މައިނެއްގެ ތެރޭގައި 19 މީހުން ތާށިވި އެވެ. އެ މީހުން ސަލާމަތް ކުރުމަށް މަސައްކަތް ކުރި ނަމަވެސް، އެ އެންމެން ވެސް މަރުވީ އެވެ.
އެކަމަކު ޑިސެމްބަރު 2021 ގައި ޝަންޒީ ޕްރޮވިންސްގެ ބޯޓުދެލި ނަގާ މައިނެއްގެ ތެރޭގައި ފެންބޮޑުވެ ތާށިވި 20 މީހުން ސަލާމަތް ކުރި އެވެ. އެ ފަހަރު މަރުވީ ދެ މީހުންނެވެ.
