ހަނގުރާމައިގެ ސަބަބަން ކަރަންޓު ކެނޑިފައިވާ ގެތަކަށް ފިނި މޫސުމުގައި ކަރަންޓު ފޯރުކޮށްދިނުމަށް ޔޫއޭއީއިން ޔޫކްރެއިނަށް 2500 ޖެނެރޭޓަރު ފޮނުވަން ނިންމައިފި އެވެ.
އެމިރޭޓްސް ނިއުސް އެޖެންސީއިން ބުނީ 1200 ޖެނެރޭޓަރު މިހާރު ފޮނުވާފައިވާ ކަމަށާއި ވާކީ ޖެނެރޭޓަރުތައް ޖެނުއަރީ ފެށުމުގެ ކުރިން ފޮނުވާނެ ކަމަށެވެ.
ޔޫއޭއީގެ މިނިސްޓާ އޮފް ސްޓޭޓް ފޯ އިންޓަނޭޝަަނަލް ކޯޕޮރޭޝަން ރީމް ބިންތި އަލް ހާޝެމީ ވިދާޅުވީ ޔޫކްރެއިން ކާރިސާއާ ގުޅިގެން ކުރަމުންދާ އަސަރު ކުޑަކުރަން ޔޫއޭއީއިން ބޭނުންވާ ކަމަށެވެ.
ރިޕޯޓުތައް ބުނާ ގޮތުން ޔޫއޭއީއިން ފޮނުވަނީ 3.5 އަދި 8 ކިލޯވޮޓުގެ ޖެނެރޭޓަރުތަކެވެ. އެއަށް ބޭނުންކުރާ ބާވަތެއްގެ ތެލުން، 5-8 ގަޑިއިރު ގެޔަކަށް މެދުނުކެނޑި ކަރަންޓު ލިބޭނެ އެވެ.
ޔޫއޭއީއިން ވަނީ ޔޫކްރެއިނަށް އިންސާނީ އެހީ ފޯރުކޮށްދިނުމަށް 100 މިލިއަން ޑޮލަރުގެ ޕެކޭޖެއް އިއުލާންކޮށްފަ އެވެ. ޖެނެރޭޓަރުތައް ދެނީ އެ ޕެކޭޖުގެ ދަށުންނެވެ.
މީގެ ކުރިން ޔޫއޭއީއިން ވަނީ 360 ޓަނުގެ ކާބޯތަކެއްޗާއި ބޭސް އަދި އެމްބިއުލާންސް ފޮނުވައިފަ އެވެ. އެއީ ޕޮލޭންޑާއި މޮލްޑޯވާ އަދި ބަލްގޭރިއާގައި ތިބި ޔޫކްރެއިން ރެފިއުޖީންނަށް ފޮނުވި ތަކެއްޗެވެ.
ހަނގުރާމައިގައި ރަޝިއާއިން ގެންގުޅޭ ސްޓްރެޓެޖީއަަކީ އިންފްރާސްޓްރަކްޗާއަށް ވައިގެ ހަމަލާ ދިނުމެވެ. އޭގެ ސަބަބުން މި ފިނި މޫސުމުގައި އެތައް މިލިއަން ބަޔަކަށް ކަރަންޓު ނުލިބެ އެވެ.
