އިންޑިއާއަށް އެތެރެވާ މީހުންގެ ތެރެއިން އަލުން ރޭންޑަމްކޮށް ކޮވިޑަށް ޓެސްޓު ކުރަން ފަށައި، ބައެއް ގައުމުތަކުން އެތެރެވާ މީހުންގެ ޕީސީއާރް ނަތީޖާ ހުށަހަޅަން މަޖުބޫރުކޮށްފި އެވެ.
އަލަށް ނެރުނު އުސޫލުގައި ބުނީ ޗައިނާ، ޖަަޕާން، ދެކުނު ކޮރެއާ، ހޮންކޮން އަދި ތައިލޭންޑުން ދަތުރު ކުރާ މީހުންގެ ނެގެޓިވް ޕީސީއާރް ނަތީޖާ ހުށަހަޅަން ޖެހޭނެ ކަމަށެވެ.
އެހެން ނަމަވެސް އެ ގައުމުތަކުން ދަތުރު ކުރާ މީހުން ނެގެޓިވް ޕީސީއާރް ނަތީޖާ އާއި އެއާ ސުވިދާ ފޯމު ހުށަހަޅަން ފަށަން ޖެހޭނީ ކޮން ތާރީހަކުން ފެށިގެން ކަމެއް ސާފެއް ނޫނެވެ.
އެގޮތަށް ބަދަލުކުރީ އަވައްޓެރި ޗައިނާ އާއި ބައެއް އެހެން ގައުމުތަކުން ކޮވިޑް ކޭސްތައް ވަރަށް ބޮޑަށް އިތުރުވަމުން ދާތީ ރައްކާތެރިވުމުގެ ގޮތުންނެވެ.
އިންޑިއާގެ ހެލްތު މިނިސްޓްރީން ބުނީ އާ އުސޫލުގެ ދަށުން ބައިނަލްއަގްވާމީ ޕަސެންޖަރުންގެ ތެރެއިން ދެ ޕަސެންޓު މީހުން ހޮނިހިރު ދުވަހުން ރޭންޑަމްކޮށް ކޮވިޑަށް ޓެސްޓު ކުރާނެ ކަމަށެވެ.
އޭގެ އިތުރުން ކޮވިޑްގެ އަލާމާތްތައް ފާހަގަވާ ޕަސެންޖަރުން މާސްކު އަޅަން އަންގައި، ފްލައިޓް ތެރޭގައި އެހެން ޕަސެންޖަރުންނާ އައިސޮލޭޓް ކުރެވޭނެ ކަމަށް ބުންޏެވެ.
ރޭންޑަމް ޓެސްޓު ހަދާ އިރު، 12 އަހަރުން ދަށުގެ ކުދިން ނުހިމަނާނެ އެވެ. އެހެން ނަމަވެސް، 12 އަހަރުން ދަށުގެ ކުއްޖެއްގެ އަލާމާތެއް ފާހަގަވެއްޖެ ނަމަ ޓެސްޓު ކުރަން އަންގައި އައިސޮލޭޓް ކުރާނެ އެވެ.
ޗައިނާގައި ވަރަށް ބޮޑަށް ކޭސްތައް އިތުރުވަމުން ދާތީ އިންޑިއާ އެލާޓަށް ގެނެސް، މިދިޔަ ބުރާސްފަތި ދުވަހު ބޭއްވި މުރާޖައާ ބައްދަަލުވުމުގައި ބޮޑު ވަޒީރު ނަރެންދްރަ މޯދީ ބައިވެރިވެވަޑައިގެންނެވި އެވެ.
މޯދީ ގޮވާލެއްވީ ޓެސްޓު ކުރުން އިތުރުކޮށް، ކޮވިޑް ފެތުރުން ކޮންޓްރޯލް ކުރުމަށް ކުރިން ވެސް އަޅަމުން ދިޔަ ފިޔަވަޅުތައް އާއްމު ދިރިއުޅުމުގައި އަލުން ތަންފީޒު ކުރަން ފެށުމަށެވެ.
އިންޑިއާގައި ކޭސްތައް މަދުވުމުން، މާސްކު އެޅުން ފަދަ ފިޔަވަޅުތައް ލުއި ދިނީ މި އަހަރުގެ ކުރީކޮޅު އެވެ. އޭގެ ކުރިން 2020 އަދި 2021 ގައި ބަލީގެ ނުރައްކާތެރި ދެ ރާޅު ކުރިމަތިވި އެވެ.
ބުރާސްފަތި ދުވަހުގެ ބައްދަލުވުމުގައި މޯދީ ސްޓޭޓުތަކަށް އެންގެވީ ހޮސްޕިޓަލްތަކުގެ އިންފްރާސްޓްރަކްޗާ ވަރުގަދަކޮށް، އޮކްސިޖަން ސިލިންޑަރު އަދި ވެންޓިލޭޓަރުގެ ސްޓޮކް އިތުރު ކުރުމަށެވެ.
ޗައިނާގެ ކޭސްތަކާ ގުޅިފައިވަނީ އޮމިކްރޯންގެ ސަބްވޭރިއެންޓް ބީއެފް.7 އެވެ. އޭގެ ހަތަރު ކޭސް މިހާތަނަށް އިންޑިއާއިން ވެސް ފެނިފައިވެ އެވެ.
