ކޮވިޑާ މެދު ފަރުވާތެރިވުމުގެ ގޮތުން އިންޑިއާއިން އިތުރުން ފިޔަވަޅުތައް އަޅަން ފަށާފައިވާ މި ދަނޑިވަޅުގައި އާއްމުން އަލުން މާސްކު އަޅަން ފެށުމަށް ބޮޑު ވަޒީރު ނަރެންދްރަ މޯދީ ބާރު އަޅުއްވައިފި އެވެ.
އަވައްޓެރި ޗައިނާގައި ވަރަށް ބޮޑަށް ކޭސްތައް އިތުރުވަމުން ދާތީ އިންޑިއާ އެލާޓަށް ގެނެސް، މިދިޔަ ބުރާސްފަތި ދުވަހު ބޭއްވި މުރާޖައާ ބައްދަަލުވުމުގައި މޯދީ ބައިވެރިވެވަޑައިގެންނެވި އެވެ.
މޯދީ ގޮވާލެއްވީ ޓެސްޓު ކުރުން އިތުރުކޮށް، ކޮވިޑް ފެތުރުން ކޮންޓްރޯލް ކުރުމަށް ކުރިން ވެސް އަޅަމުން ދިޔަ ފިޔަވަޅުތައް އާއްމު ދިރިއުޅުމުގައި އަލުން ތަންފީޒު ކުރަން ފެށުމަށެވެ.
އިންޑިއާގައި ކޭސްތައް މަދުވުމުން، މާސްކު އެޅުން ފަދަ ފިޔަވަޅުތައް ލުއި ދިނީ މި އަހަރުގެ ކުރީކޮޅު އެވެ. އޭގެ ކުރިން 2020 އަދި 2021 ގައި ބަލީގެ ނުރައްކާތެރި ދެ ރާޅު ކުރިމަތިވި އެވެ.
ބުރާސްފަތި ދުވަހުގެ ބައްދަލުވުމުގައި މޯދީ ސްޓޭޓުތަކަށް އެންގެވީ ހޮސްޕިޓަލްތަކުގެ އިންފްރާސްޓްރަކްޗާ ވަރުގަދަކޮށް، އޮކްސިޖަން ސިލިންޑަރު އަދި ވެންޓިލޭޓަރުގެ ސްޓޮކް އިތުރު ކުރުމަށެވެ.
މޯދީ ވިދާޅުވީ ކަންބޮޑުވާން ޖެހޭ ސަބަބެއް މިހާތަނަށް ނެތް ނަމަވެސް، ފަރުވާ ކުޑަކޮށްގެން ނުވާނެ ކަމަށާއި ރައްކާތެރިކަމުގެ ހުރިހާ ފިޔަވަޅެއް އަޅަން ޖެހޭނެ ކަމަށެވެ.
ސަރުކާރުގެ ޑޭޓާ ދައްކާ ގޮތުން އިންޑިއާގައި މި ވަގުތު އުޅެނީ އެކްޓިވް 3،400 ކޭސް އެވެ. އެހެން ނަމަވެސް، ޗައިނާގައި ކޭސްތައް އިތުރުވުމުން އާއްމުން ކަންބޮޑުވެ އެވެ.
ޗައިނާގެ ކޭސްތަކާ ގުޅިފައިވަނީ އޮމިކްރޯންގެ ސަބްވޭރިއެންޓް ބީއެފް.7 އެވެ. އޭގެ ހަތަރު ކޭސް މިހާތަނަށް އިންޑިއާއިން ވެސް ފެނިފައިވެ އެވެ.
